సుందరకాండ - అష్టమ సర్గః
స తస్య మధ్యే బహవనస్య సంస్థితమ్ మహద్విమానం మణివజ్రచిత్రితమ్ |
ప్రతప్త జంబూనదజాలకృత్రిమమ్ దదర్శ వీరః పవనాత్మజం కపిః || ౧ ||
తదప్రమేయా ప్రతికారకృత్రిమమ్ కృతం స్వయం సాధ్వితి విశ్వకర్మణా |
దివం గతం వాయుపథప్రతిష్టితమ్ వ్యరాజతాssదిత్య పథస్య లక్ష్మవత్ || ౨ ||
నతత్ర కించి న్నకృతం ప్రయత్నతో న తత్రకించిన్న మహార్హరత్నవత్ |
న తే విశేషా నియతా స్సురేష్వపి న తత్ర కించిన్న మహావిశేషవత్ || ౩ ||
తపస్సమాధానపరాక్రమార్జితమ్ మనస్సమాధానవిచారచారిణమ్ |
అనేకసంస్థాన విశేషనిర్మితమ్ తతస్తతస్తుల్య విశేషదర్శనమ్ || ౪ ||
మనస్సమాధాయ తు శీఘ్రగామినమ్ దురావరం మారుతతుల్యగామినమ్ |
మహాత్మనాం పుణ్యకృతాం మహార్థినామ్ యశస్వినామగ్ర్యముదా మివాలయమ్ || ౫ ||
విశేషమాలాంబ్య విశేషసంస్థితమ్ విచిత్రకూటం బహుకూటమండితమ్ |
మనోభిరామం శరదిందు నిర్మలమ్ విచిత్రకూటం శిఖరం గిరేర్యథా || ౬ ||
వహంతి యం కుండలశోభితాననాః మహాశనా వ్యోమచరా నిశాచరాః |
వివృత విధ్వస్తవిశాలలోచనాః మహాజవా భూతగణా స్సహస్రశః || ౭ ||
వసంతపుష్కోత్కరచారుదర్శనమ్ వసంతమాసాదపి కాంత దర్శనమ్ |
స పుష్పకం తత్ర విమానముత్తమమ్ దదర్స తద్వానరవీరసత్తమః || ౮ ||
ఇత్యార్షే శ్రీమద్రామాయణే ఆదికావ్యే వాల్మీకీయే
చతుర్వింశత్ సహస్రికాయాం సంహితాయామ్
శ్రీమత్సుందరకాండే అష్టమస్సర్గః ||