శ్రీమద్రామాయణము - బాలకాండ
అష్టావింశ సర్గము
ప్రతిగృహ్య తతోస్త్రాణి ప్రహృష్టవదనశ్శుచి: గచ్ఛన్నేవ చ కాకుత్స్థో విశ్వామిత్రమథాబ్రవీత్ 1
గృహీతాస్త్రోస్మి భగవన్! దురాధర్షస్సురైరపి
అస్త్రాణాం త్వహమిచ్ఛామి సంహారం మునిపుఙ్గవ 2
ఏవం బ్రువతి కాకుత్స్థే విశ్వామిత్రో మహాముని: సంహారం వ్యాజహారాథ ధృతిమాన్ సువ్రతశ్శుచి: 3
సత్యవన్తం సత్యకీర్తిం ధృష్టం రభసమేవ చ
ప్రతిహారతరం నామ పరాఙ్ముఖమవాఙ్ముఖమ్ 4
లక్షాక్షవిషమౌ చైవ దృఢనాభసునాభకౌ
దశాక్షశతవక్త్రౌ చ దశశీర్షశతోదరౌ 5
పద్మనాభమహానాభౌ దున్దునాభసునాభకౌ
జ్యోతిషం కృశనం చైవ నైరాశ్యవిమలావుభౌ 6
యోగన్ధరహరిద్రౌ చ దైత్యప్రశమనౌతథా
సార్చిర్మాలీ ధృతిర్మాలీ వృత్తిమాన్ రుచిరస్తథా 7
పితృసౌమనసం చైవ విధూతమకరావుభౌ
కరవీరకరం చైవ ధనధాన్యౌ చ రాఘవ 8
కామరూపం కామరుచిం మోహమావరణం తథా
జృమ్భకం సర్వనాభం చ సన్తానవరణౌ తథా 9
భృశాశ్వతనయాన్ రామ భాస్వరాన్కామరూపిణ:
ప్రతీచ్ఛ మమ భద్రం తే పాత్రభూతోసి రాఘవ 10
బాఢమిత్యేవ కాకుత్స్థ: ప్రహృష్టేనాన్తారాత్మనా
దివ్యభాస్వరదేహాశ్చ మూర్తిమన్తస్సుఖప్రదా: 11
కేచిదఙ్గారసదృశా: కేచిద్ధూమోపమాస్తథా
చన్ద్రార్కసదృశా: కేచిత్ప్రహ్వాఞ్జలిపుటాస్తథా 12
రామం ప్రాఞ్జలయో భూత్వాబ్రువన్ మధురభాషిణ:
ఇమే స్మ నరశార్దూల శాధి కిం కరవామ తే 13
మానసా: కార్యకాలేషు సాహాయ్యం మే కరిష్యథ
గమ్యతామితి తానాహ యథేష్టం రఘునన్దన: 14
అథ తే రామమామన్త్ర్య కృత్వా చాపి ప్రదక్షిణమ్
ఏవమస్త్వితి కాకుత్స్థముక్త్వాజగ్ముర్యథాగతమ్ 15
స చ తాన్ రాఘవో జ్ఞాత్వా విశ్వామిత్రం మహామునిమ్
గచ్ఛన్నేవాథ మధురం శ్లక్ష్ణం వచనమబ్రవీత్ 16
కిన్న్వేతన్మేఘసఙ్కాశం పర్వతస్యావిదూరత:
వృక్షషణ్డమితో భాతి పరం కౌతూహలం హి మే 17
దర్శనీయం మృగాకీర్ణం మనోరమమతీవ చ
నానాప్రకారైశ్శకునైర్వల్గునాదైరలఙ్కృతమ్ 18
నిస్సృతా: స్మ మునిశ్రేష్ఠ! కాన్తారాద్రోమహర్షణాత్
అనయా త్వవగచ్ఛామి దేశస్య సుఖవత్తయా 19
సర్వం మే శంస భగవన్! కస్యాశ్రమపదం త్విదమ్
సమ్ప్రాప్తా యత్ర తే పాపా బ్రహ్మఘ్నా దుష్టచారిణ: 20
తవ యజ్ఞస్య విఘ్నాయ దురాత్మానో మహామునే
భగవన్ తస్య కో దేశస్సా యత్ర తవ యాజ్ఞికీ 21
రక్షితవ్యా క్రియా బ్రహ్మన్మయా వధ్యాశ్చ రాక్షసా:
ఏతత్సర్వం మునిశ్రేష్ఠ! శ్రోతుమిచ్ఛామ్యహం ప్రభో 22
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే అష్టావింశస్సర్గ: