సుందరకాండ - ఏకోనషష్టితమ సర్గః (హనుమంతుని తదుపరి ఉత్సాహం)
ఏతదాఖ్యాయ తత్సర్వం హనుమాన్ మారుతాత్మజః |
భూయః సముపచక్రామ వచనం వక్తు ముత్తరమ్ || ౧ ||
సఫలో రాఘవోద్యోగః సుగ్రీవస్య చ సంభ్రమః |
శీలమాసాద్య సీతాయా మమ చ ప్రవణం మనః || ౨ ||
తపసా ధారయేల్లోకాన్ క్రుద్ధో వా నిర్దహేదపి |
సర్వధాతి ప్రవృద్ధోఽసౌ రావణో రాక్షసాధిపః || ౩ ||
తస్య తాం స్పృశతో గాత్రం తపసా న వినాశితమ్ |
న తదగ్నిశిఖా కుర్యాత్ సంస్పృష్టా పాణినా సతీ || ౪ ||
జనకస్యాత్మజా కుర్యాద్యత్క్రోధ కలుషీకృతా |
జామ్బవత్ప్రముఖాన్ సర్వాననుజ్ఞాస్య మహాహరీన్ || ౫ ||
అస్మిన్నేవం గతే కార్యే భవతాం చ నివేదితే |
న్యాయం స్మ సహవైదేహ్యా ద్రష్టుం తౌ పార్థివాత్మజౌ || ౬ ||
అహమేకోపి పర్యాప్తః సరాక్షసగణాం పురీ |
తాం లంకాం తరసా హన్తుం రావణం చ మహాబలమ్ || ౭ ||
కిం పునస్సహితో వీరైః బలవద్భిః కృతాత్మభిః |
కృతాస్త్రైః ప్లవగైః శూరైః భవద్భిర్విజయైషిభిః || 8 ||
అహం తు రావణం యుద్ధే ససైన్యం సపురస్సరమ్ |
సహపుత్త్రం వధిష్యామి సహోదరయుతం యుధి || ౯ ||
బ్రాహ్మమైన్ద్రం చ రౌద్రం చ వాయువ్యం వారుణం తథా |
యది శక్రజితోఽస్త్రాణి దుర్నిరీక్షాణి సంయుగే || ౧౦ ||
తాన్యహం విధమిష్యామి హనిష్యామి చ రాక్షసాన్ |
భవతామభ్యనుజ్ఞాతో విక్రమో మే రుణద్ధితమ్ || ౧౧ ||
మయాsతులా విసృష్టా హి శైలవృష్టిర్నిరన్తరా |
దేవానపి రణే హన్యాత్ కిం పునః తాన్ నిశాచరాన్ || ౧౨ ||
సాగరోఽప్యతియాద్వేలాం మన్దరః ప్రచలేదపి |
న జామ్బవన్తం సమరే కమ్పయే దరివాహినీ || ౧౩ ||
సర్వరాక్షస సంఘానాం రాక్షసా యే చ పూర్వకా |
అలమేకో వినాశాయ వీరో వాలిసుతః కపిః || ౧౪ ||
పనస స్యోరువేగేన నీలస్య చ మహాత్మనః |
మన్దరోఽప్యవసీర్యేత కిం పునర్యుధి రాక్షసాః || ౧౫ ||
స దేవాసుర యక్షేషు గన్ధర్వోరగ పక్షిసు |
మైన్దస్య ప్రతియోద్ధారం శంసత ద్వివిదస్య వా || ౧౬ ||
అశ్విపుత్రౌ మహాభాగౌ వేతౌ ప్లవగసత్తమౌ |
ఏతయోః ప్రతియోద్ధారం న పశ్యామి రణాజిరే || ౧౭ ||
పితామహవరోత్సేకాత్ పరమం దర్పమాస్థితౌ |
అమృతప్రాశనా వేతౌ సర్వవానర సత్తమౌ || ౧8 ||
అశ్వినోర్మాననార్థం హి సర్వలోకపితామహః |
సర్వావధ్యత్వమతులం అనయోర్దత్తవాన్పురా || ౧౯ ||
వరోత్సేకేన మత్తౌ చ ప్రమథ్య మహతీమ్ చమూమ్ |
సురాణామమృతం వీరౌ పీతవన్తౌ ప్లవంగమౌ || ౨౦ ||
ఏతావేవ హి సంక్రుద్ధౌ సవాజిరథకుంజరామ్ |
లంకాం నాశయితుం శక్తా సర్వే తిష్ఠన్తు వానరాః || ౨౧ ||
మయైవ నిహతా లంకా దగ్ధా భస్మీకృతా పునః |
రాజమార్గేషు సర్వత్ర నామ విశ్రావితం మయా || ౨౨ ||
జయత్యతి బలో రామో లక్ష్మణస్య మహాబలః |
రాజా జయతి సుగ్రీవో రాఘవేణాధిపాలితః || ౨౩ ||
అహం కోసలరాజస్య దాసః పవనసమ్భవః |
హనుమానితి సర్వత్ర నామ విశ్రావితం మయా || ౨౪ ||
అశోకవనికా మధ్యే రావణస్య దురాత్మనః |
అధస్తాత్ శింశుపావృక్షే సాధ్వీ కరుణమాస్థితా || ౨౫ ||
రాక్షసీభి పరివృతా శోకసన్తాపకర్శితా |
మేఘలేఖాపరివృతా చన్ద్రలేఖేవ నిష్ప్రభా || ౨౬ ||
అచిన్తయన్తీ వైదేహీ రావణం బలదర్పితమ్ |
పతివ్రతా చ సుశ్రోణీ అవష్టబ్ధా చ జానకీ || ౨౭ ||
అనురక్తా హి వైదేహీ రామం సర్వాత్మనా శుభా |
అనన్యచిత్తా రామే చ పౌలోమీవ పురన్దరే || ౨8 ||
తదేకవాసః సంవీతా రజోధ్వస్తా తథైవ చ |
శోకసన్తాప దీనాంగీ సీతా భర్తృహితే రతా || ౨౯ ||
సా మయా రాక్షసీ మధ్యే తర్జ్యమానా ముహుర్ముహుః |
రాక్షసీభిర్విరూపాభిః దృష్టా హి ప్రమదావనే || ౩౦ ||
ఏకవేణీధరా దీనా భర్తృచిన్తాపరాయణా |
అథశ్శయా వివర్ణాంగీ పద్మినీవ హిమాగమే || ౩౧ ||
రావణాద్వినివృత్తార్థా మర్తవ్యకృత నిశ్చయా |
కథంచిన్ మృగశాబాక్షీ విశ్వాస ముపపాదితా || ౩౨ ||
తతః సంభాషితా చైవ సర్వమర్థం చ దర్శితా |
రామసుగ్రీవ సఖ్యం చ శ్రుత్వా ప్రీతిముపాగతా || ౩౩ ||
నియతః సముదాచారో భక్తిర్భర్తరి చోత్తమా |
యన్నహన్తి దశగ్రీవం స మహాత్మా కృతాగసమ్ || ౩౪ ||
నిమిత్తమాత్రం రామస్తు వధే తస్య భవిష్యతి |
సా ప్రకృత్యైవ తన్వంగీ తద్వియోగాత్ చ కర్శితా || ౩౫ ||
ప్రతిపత్పాఠశీలస్య విద్యేవ తనుతాం గతా |
ఏవమాస్తే మహాభాగా సీతా శోకపరాయణా |
యదత్ర ప్రతికర్తవ్యం తత్ సర్వం ఉపపద్యతామ్ || ౩౬ ||
ఇత్యార్షే శ్రీమద్రామాయణే ఆదికావ్యే వాల్మీకీయే
చతుర్వింశత్ సహస్రికాయాం సంహితాయామ్
శ్రీమత్సుందరకాండే ఏకోనషష్టితమస్సర్గః ||