సుందరకాండ - ద్వాదశ సర్గః
స తస్య మధ్యే భవనస్య మారుతిః లతాగృహంశ్చిత్రగృహాన్ నిశాగృహాన్ |
జగామ సీతాం ప్రతిదర్శనోత్సుకో న చైవ తాం పశ్యతి చారుదర్శనామ్ || ౧ ||
స చిన్తయామాస తతో మహాకపిః ప్రియామపశ్యన్ రఘునన్దనస్య తామ్ |
ధ్రువం హి సీతా మ్రియతే యథా నమే విచిన్వతోదర్శన మేతి మైథిలీ || ౨ ||
సా రాక్షసానాం ప్రవరేణ జానకీ స్వశీలసంరక్షణ తత్పరా సతీ |
అనేన నూనం ప్రతి దుష్ట కర్మణా హతా భవేత్ ఆర్యపథే పరే స్థితా || ౩ ||
విరూప రూపా వికృతా వివర్చసో మహాననా దీర్ఘవిరూప దర్శనాః |
సమీక్ష్య సా రాక్షసరాజయోషితో భయాద్వినష్టా జనకేశ్వరాత్మజా || ౪ ||
సీతాం అదృష్ట్వాహ్యనవాప్య పౌరుషమ్ విహృత్య కాలం సహ వానరైశ్చిరమ్ |
న మేఽస్తి సుగ్రీవ సమీపగా గతిః సుతీక్ష్ణ దణ్డో బలవాంశ్చ వానర || ౫ ||
దృష్టమంతః పురం సర్వం దృష్ట్వా రావణయోషితాః |
న సీతా దృశ్యతే సాధ్వీ వృథాజాతో మమ శ్రమః || ౬ ||
కిం ను మాం వానరాస్సర్వే గతం వక్ష్యంతి సంగతాః |
గత్వా తత్ర త్వయా వీర కిం కృతం తద్వదస్య నః || ౭ ||
అదృష్ట్వా కిం ప్రవక్ష్యామి తాం అహం జనకాత్మజామ్ |
ధ్రువం ప్రాయముపైష్యంతి కాలస్య వ్యతివర్తనే || ౮ ||
కిం వా వక్ష్యతి వృద్ధశ్చ జాంబవాన్ అఙ్గదశ్చ సః |
గతం పారం సముద్రస్య వానరాశ్చ సమాగతాః || ౯ ||
అనిర్వేదః శ్రియోమూలం అనిర్వేదః పరం సుఖమ్ |
అనిర్వేదో హి సతతం సర్వార్థేషు ప్రవర్తకః || ౧౦ ||
కరోతిసఫలం జంతోః కర్మ యత్ తత్ కరోతి సః |
తస్మాత్ అనిర్వేదకృతం యత్నం చేష్టేఽహముత్తమమ్ || ౧౧ ||
భూయస్తావత్ విచేష్యామి దేశాన్ రావణపాలితాన్ |
అపానశాలా విచితాః తథా పుష్పగృహాణి చ || ౧౨ ||
చిత్రశాలాశ్చ విచితా భూయః క్రీడా గృహాణి చ |
నిష్కుటాన్తర రథ్యాశ్చ విమానాని చ సర్వశః || ౧౩ ||
ఇతి సంచిత్య భూయోఽపి విచేతు ముపచక్రమే |
భూమిగృహాం శ్చైత్య గృహాన్ గృహాతిగృహకానపి || ౧౪ ||
ఉత్పతన్ నిష్పతం శ్చాపి తిష్ఠన్ గచ్చన్ పునః పునః |
అపావృణ్వంశ్చ ద్వారాణి కవాటాన్యవఘాటయన్ || ౧౫ ||
ప్రవిశన్ నిష్పతం శ్చాపి ప్రపతన్ ఉత్పతతన్ అపి |
సర్వమప్యవకాశం స విచచార మహాకపిః || ౧౬ ||
చతురఙ్గుళమాత్రోsపి నావకాశః సవిద్యతే |
రావణాన్తఃపురే తస్మిన్ యం కపిర్నజగామ సః || ౧౭ ||
ప్రాకారాన్తరరథ్యాశ్చ వేదికాశ్చైత్య సంశ్రయాః |
దీర్ఘికాః పుష్కరిణ్యశ్చ సర్వం తేనావలోకితమ్ || ౧౮ ||
రాక్షస్యో వివిధాకారా విరూపా వికృతాస్తథా |
దృష్టా హనుమతా తత్ర నతు సా జనకాత్మజా || ౧౯ ||
రూపేణా ప్రతిమా లోకే వరా విధ్యాధరస్త్రియః |
దృష్ఠా హనుమతా తత్ర నతు రాఘవనన్దినీ || ౨౦ ||
నాగకన్యా వరారోహాః పూర్ణచన్ద్రనిభాననాః |
దృష్టా హనుమతా తత్ర న తు సీతా సుమధ్యమా || ౨౧ ||
ప్రమధ్య రాక్షసేన్ద్రేణ దేవకన్యా బలాద్దృతాః |
దృష్టా హనుమతా తత్ర నతు సా జనకనన్దినీ || ౨౨ ||
సోఽపశ్యం స్తాం మహాబాహుః పశ్యంశ్చాన్యా వరస్త్రియః |
విషసాద ముహుర్థీమాన్ హనుమాన్మారుతాత్మజః || ౨౩ ||
ఉద్యోగం వానరేన్ద్రాణాం ప్లవనం సాగరస్య చ |
వ్యర్థం వీక్ష్యానిలసుతః చిన్తాం పునరుపాగమత్ || ౨౪ ||
అవతీర్య విమానాచ్చ హనుమాన్ మారుతాత్మజః |
చింతాముపజగామాథ శోకోపహతచేతనః || ౨౫ ||
ఇత్యార్షే శ్రీమద్రామాయణే ఆదికావ్యే వాల్మీకీయే
చతుర్వింశత్ సహస్రికాయాం సంహితాయామ్
శ్రీమత్సుందరకాండే ద్వాదశస్సర్గః ||