శ్రీమద్రామాయణము - బాలకాండ
సప్తదశ సర్గము
పుత్రత్వం తు గతే విష్ణౌ రాజ్ఞస్తస్య సుమహాత్మన:
ఉవాచ దేవతాస్సర్వాస్స్వయమ్భూర్భగవానిదమ్ 1
సత్యసన్ధస్య వీరస్య సర్వేషాన్నో హితైషిణ:
విష్ణోస్సహాయాన్బలినస్సృజధ్వం కామరూపిణ: 2
మాయావిదశ్చ శూరాంశ్చ వాయువేగసమాఞ్జవే
నయజ్ఞాన్బుద్ధిసమ్పన్నాన్విష్ణుతుల్యపరాక్రమాన్ 3
అసంహార్యానుపాయజ్ఞాన్ దివ్యసంహననాన్వితాన్
సర్వాస్త్రగుణసమ్పన్నానమృతప్రాశనానివ 4
అప్సరస్సు చ ముఖ్యాసు గన్ధర్వాణాం తనూషు చ
సృజధ్వం హరిరూపేణ పుత్రాంస్తుల్యపరాక్రమాన్ 5
పూర్వమేవ మయా సృష్టో జామ్బవానృక్షపుఙ్గవ:
జృమ్భమాణస్య సహసా మమ వక్త్రాదజాయత 6
తే తథోక్తా భగవతా తత్ప్రతిశ్రుత్య శాసనమ్
జనయామాసురేవం తే పుత్రాన్వానరరూపిణ: 7
ఋషయశ్చ మహాత్మానస్సిద్ధవిద్యాధరోరగా:
చారణాశ్చ సుతాన్వీరాన్ససృజుర్వనచారిణ: 8
వానరేన్ద్రం మహేన్ద్రాభమిన్ద్రో వాలినమూర్జితమ్
సుగ్రీవం జనయామాస తపనస్తపతాం వర: 9
బృహస్పతిస్త్వజనయత్తారం నామ మహాహరిమ్
సర్వవానరముఖ్యానాం బుద్ధిమన్తమనుత్తమమ్ 10
ధనదస్య సుతశ్శ్రీమాన్ వానరో గన్ధమాదన:
విశ్వకర్మాత్వజనయన్నలం నామ మహాహరిమ్ 11
పావకస్య సుతశ్శ్రీమాన్ నీలోగ్నిసదృశప్రభ:
తేజసా యశసా వీర్యాదత్యరిచ్యత వానరాన్ 12
రూపద్రవిణసమ్పన్నావశ్వినౌ రూపసమ్మతౌ
మైన్దం చ ద్వివిదం చైవ జనయామాసతుస్స్వయమ్ 13
వరుణో జనయామాస సుషేణం వానరర్షభమ్
శరభం జనయామాస పర్జన్యస్తు మహాబలమ్ 14
మారుతస్యాత్మజశ్శ్రీమాన్హనుమాన్నామ వీర్యవాన్
వజ్రసంహననోపేతో వైనతేయసమో జవే 15
తే సృష్టా బహుసాహస్రా దశగ్రీవవధే రతా:
అప్రమేయబలా వీరా విక్రాన్తా: కామరూపిణ: 16
మేరుమన్దరసఙ్కాశా వపుష్మన్తో మహాబలా:
ఋక్షవానరగోపుచ్ఛా: క్షిప్రమేవాభిజజ్ఞిరే 17
యస్య దేవస్య యద్రూపం వేషో యశ్చ పరాక్రమ:
అజాయత సమస్తేన తస్య తస్య సుత: పృథక్ 18
గోలాఙ్గూలీషు చోత్పన్నా: కేచిత్సమ్మతవిక్రమా:
ఋక్షీషు చ తథా జాతా వానరా: కిన్నరీషు చ 19
దేవా మహర్షిగన్ధర్వాస్తార్క్ష్యా యక్షా యశస్విన:
నాగా: కిమ్పురుషాశ్చైవ సిద్ధవిద్యాధరోరగా: 20
బహవో జనయామాసుర్హృష్టాస్తత్ర సహస్రశ:
వానరాన్సుమహాకాయాన్సర్వాన్వై వనచారిణ: 21
అప్సరస్సు చ ముఖ్యాసు తథా విద్యాధరీషు చ
నాగకన్యాసు చ తథా గన్ధర్వీణాం తనూషు చ 22
కామరూపబలోపేతా యథాకామం విచారిణ:
సింహశార్దూలసదృశా దర్పేణ చ బలేన చ 23
శిలాప్రహరణాస్సర్వే సర్వే పాడపయోధిన:
నఖదంష్ట్రాయుధాస్సర్వే సర్వే సర్వాస్త్రకోవిదా 24
విచాలయేయుశ్శైలేన్ద్రాన్భేదయేయుస్స్థిరాన్ద్రుమాన్
క్షోభయేయుశ్చ వేగేన సముద్రం సరితాం పతిమ్ 25
దారయేయు: క్షితిం పద్భ్యామాప్లవేయుర్మహార్ణవమ్
నభ:స్థలమ్ విశేయుశ్చ గృహ్ణీయురపి తోయదాన్ 26
గృహ్ణీయురపి మాతఙ్గాన్మత్తాన్ప్రవ్రజతో వనే
నర్దమానాశ్చ నాదేన పాతయేయుర్విహఙ్గమాన్ 27
ఈదృశానాం ప్రసూతాని హరీణాం కామరూపిణామ్
శతం శతసహస్రాణి యూథపానాం మహాత్మనామ్ 28
తే ప్రధానేషు యూథేషు హరీణాం హరియూథపా:
బభూవుర్యూథపశ్రేష్ఠా వీరాంశ్చాజనయన్ హరీన్ 29
అన్యే ఋక్షవత: ప్రస్థానవతస్థు స్సహస్రశ:
అన్యే నానావిధాన్శైలాన్భేజిరే కాననాని చ 30
సూర్యపుత్రం చ సుగ్రీవం శక్రపుత్రం చ వాలినమ్
భ్రాతరావుపతస్థుస్తే సర్వ ఏవ హరీశ్వరా: 31
నలం నీలం హనూమన్తమన్యాంశ్చ హరియూథపాన్ 32
తే తార్క్ష్యబలసమ్పన్నాస్సర్వే యుద్ధవిశారదా:
విచరన్తోర్దయన్దర్పాత్సింహవ్యాఘ్రమహోరగాన్ 33
తాంశ్చ సర్వాన్మహాబాహుర్వాలీ విపులవిక్రమ:
జుగోప భుజవీర్యేణ ఋక్షగోపుచ్ఛవానరాన్ 34
తైరియం పృథివీ శూరైస్సపర్వతవనార్ణవా
కీర్ణా వివిధసంస్థానైర్నానావ్యఞ్జనలక్షణై: 35
తైర్మేఘబృన్దాచలకూటకల్పై: మహాబలైర్వానరయూథపాలై:
బభూవ భూర్భీమశరీరరూపై స్సమావృతా రామసహాయహేతో: 36
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే సప్తదశస్సర్గ: