శ్రీమద్రామాయణము - బాలకాండ
ఏకోనవింశ సర్గము
తచ్ఛ్రుత్వా రాజసింహస్య వాక్యమద్భుతవిస్తరమ్
హృష్టరోమా మహాతేజా విశ్వామిత్రోభ్యభాషత 1
సదృశం రాజశార్దూల! తవైతద్భువి నాన్యథా
మహావంశప్రసూతస్య వసిష్ఠవ్యపదేశిన: 2
యత్తు మే హృద్గతం వాక్యం తస్య కార్యస్య నిశ్చయమ్
కురూష్వ రాజశార్దూల! భవ సత్యప్రతిశ్రవ: 3
అహంనియమమాతిష్ఠే సిధ్యర్థం పురుషర్షభ
తస్య విఘ్నకరౌ ద్వౌ తు రాక్షసౌ కామరూపిణౌ 4
వ్రతే మే బహుశశ్చీర్ణే సమాప్త్యాం రాక్షసావిమౌ
మారీచశ్చ సుబాహుశ్చ వీర్యవన్తౌ సుశిక్షితౌ 5
సమాంసరుధిరౌఘేణ వేదిం తామభ్యవర్షతామ్
అవధూతే తథాభూతే తస్మిన్నియమనిశ్చయే 6
కృతశ్రమో నిరుత్సాహస్తస్మాద్దేశాదపాక్రమే
న చ మే క్రోధముత్స్రష్టుం బుద్ధిర్భవతి పార్థివ 7
తథా భూతా హి సా చర్యా న శాపస్తత్ర ముచ్యతే
స్వపుత్రం రాజశార్దూల! రామం సత్యపరాక్రమమ్ 8
కాకపక్షధరం శూరం జ్యేష్ఠం మే దాతుమర్హసి
శక్తో హ్యేష మయా గుప్తో దివ్యేన స్వేన తేజసా 9
రాక్షసా యే వికర్తారస్తేషామపి వినాశనే
శ్రేయశ్చాస్మై ప్రదాస్యామి బహురూపం న సంశయ: 10
త్రయాణామపి లోకానాం యేన ఖ్యాతిం గమిష్యతి
న చ తౌ రామమాసాద్య శక్తౌ స్థాతుం కథఞ్చన 11
న చ తౌ రాఘవాదన్యో హన్తుముత్సహతే పుమాన్
వీర్యోత్సిక్తౌ హి తౌ పాపౌ కాలపాశవశం గతౌ 12
రామస్య రాజశార్దూల !న పర్యాప్తౌ మహాత్మన:
న చ పుత్రకృతస్నేహం కర్తుమర్హసి పార్థివ 13
అహం తే ప్రతిజానామి హతౌ తౌ విద్ధి రాక్షసౌ
అహం వేద్మి మహాత్మానం రామం సత్యపరాక్రమమ్ 14
వసిష్ఠోపి మహాతేజా యే చేమే తపసి స్థిత:
యది తే ధర్మలాభం చ యశశ్చ పరమం భువి 15
స్థితమిచ్ఛసి రాజేన్ద్ర రామం మే దాతుమర్హసి
యదిహ్యనుజ్ఞాం కాకుత్స్థ! దదతే తవ మన్త్రిణ: 16
వసిష్ఠప్రముఖా: సర్వే తతో రామం విసర్జయ
అభిప్రేతమసంసక్తమాత్మజం దాతుమర్హసి 17
దశరాత్రం హి యజ్ఞస్య రామం రాజీవలోచనమ్
నాత్యేతి కాలో యజ్ఞస్య యథాయం మమ రాఘవ 18
తథా కురుష్వ భద్రం తే మా చ శోకే మన: కృథా:
ఇత్యేవముక్త్వా ధర్మాత్మా ధర్మార్థసహితం వచ: 19
విరరామ మహాతేజా విశ్వామిత్రో మహాముని:
స తన్నిశమ్య రాజేన్ద్రో విశ్వామిత్రవచశ్శుభమ్ 20
శోకమభ్యగమత్తీవ్రం వ్యషీదత భయాన్విత:
ఇతి హృదయమనోవిదారణం మునివచనం తదతీవ శుశ్రువాన్
నరపతిరభవన్మహాంస్తదా వ్యథితమనా: ప్రచచాల చాసనాత్ 21
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాణ్డే ఏకోనవింశస్సర్గ: