బాలకాండమ్ - పంచమస్సర్గః
సర్వా పూర్వం ఇయం యేషాం ఆసీత్ కృత్స్నా వసుంధరా
ప్రజపతిం ఉపాదాయ నృపాణం జయ శాలినాం 1
యేషాం స సగరో నామ సాగరో యేన ఖానితః
షష్టిః పుత్ర సహస్రాణి యం యాంతం పర్యవారయన్ 2
ఇక్ష్వాకూణాం ఇదం తేషాం రాజ్ఞాం వంశే మహాత్మనాం
మహద్ ఉత్పన్నం ఆఖ్యనం రామాయణం ఇతి శ్రుతం 3
తదిదం వర్తయిష్యావః సర్వం నిఖిలం ఆదితః
ధర్మ కామ అర్థ సహితం శ్రోతవ్యం అనసూయతా 4
కోసలో నామ ముదితః స్ఫీతో జనపదో మహాన్
నివిష్ట సరయూ తీరే ప్రభూత ధన ధాన్యవాన్ 5
అయోధ్యా నామ నగరీ తత్ర ఆసీత్ లోక విశ్రుతా
మనునా మానవ ఇంద్రేణ యా పురీ నిర్మితా స్వయం 6
ఆయతా దశ చ ద్వే చ యోజనాని మహాపురీ
శ్రీమతీ త్రీణి విస్తీర్ణా సు విభక్తా మహాపథా 7
రాజ మార్గేణ మహతా సువిభక్తేన శోభితా
ముక్తా పుష్ప అవకీర్ణేన జల సిక్తేన నిత్యశః 8
తాం తు రాజా దశరథో మహారాష్ట్ర వివర్ధనః
పురీం ఆవాసయామాస దివి దేవపతిః యథా 9
కపాట తోరణవర్తీ సు విభక్త అంతరాపణాం
సర్వ యంత్ర అయుధవతీం ఉషితాం సర్వ శిల్పిభిః 10
సూత మాగధ సంబాధాం శ్రీమతీం అతుల ప్రభాం
ఉచ్చాట్టాల ధ్వజవతీం శతఘ్నీ శత సంకులాం 11
వధూ నాటక సంఘైః చ సంయుక్తాం సర్వతః పురీం
ఉద్యాన ఆమ్ర వణోపేతాం మహతీం సాల మేఖలాం 12
దుర్గ గంభీర పరిఖాం దుర్గాం అన్యైః దురాసదం
వాజీవారణ సంపూర్ణాం గోభిః ఉష్ట్రైః ఖరైః తథా 13
సామంత రాజ సంఘైః చ బలి కర్మభిః ఆవృతం
నానా దేశ నివాసైః చ వణిగ్భిః ఉపశోభితాం 14
ప్రాసాదై రత్న వికృతైః పర్వతైః ఇవ శోభితాం
కూటాగారైః చ సంపూర్ణాం ఇంద్రస్య ఇవ అమరావతీం 15
చిత్రం అష్టాపద ఆకారాం వర నారీ గణైర్ యుతాం
సర్వ రత్న సమాకీర్ణాం విమాన గృహ శోభితాం 16
గృహ గాఢాం అవిచ్ఛిద్రాం సమ భూమౌ నివేశితాం
శాలి తణ్డుల సంపూర్ణాం ఇక్షు కాణ్డ రసః ఉదకాం 17
దుందుభీభిః మృదంగైః చ వీణాభిః పణవైః తథా
నాదితాం భృశం అత్యర్థం పృథివ్యాం తాం అనుత్తమాం 18
విమానం ఇవ సిద్ధానాం తపస అధిగతం దివి
సు నివేశిత వేశ్మాంతాం నరోత్తమ సమావృతాం 19
యే చ బాణైః న విధ్యంతి వివిక్తం అపరా పరం
శబ్ద వేధ్యం చ వితతం లఘు హస్తా విశారదాః 20
సింహ వ్యాఘ్ర వరాహాణాం మత్తానాం నదతాం వనే
హంతారో నిశితైః శస్త్రైః బలాత్ బాహు బలైర్ అపి 21
తాదృశానాం సహస్రైః తాం అభి పూర్ణాం మహారథైః
పురీం ఆవసయమాస రాజా దశరథః తదా 22
తాం అగ్నిమద్భిః గుణవద్భిః ఆవృతాం ద్విజోత్తమైః వేద షడఙ్గ పారగైః
సహస్రదైః సత్య రతైః మహాత్మభిః మహర్షి కల్పైః ఋషిభిః చ కేవలైః 23
ఇత్యార్షే శ్రీమద్రామాయణే వాల్మీకీయే ఆదికావ్యే బాలకాండే పంచమస్సర్గః