శ్రీమద్రామాయణము - అయోధ్యాకాండ
ఏకోనసప్తతితమ సర్గము
యామేవ రాత్రిం తే దూతాః ప్రవిశన్తి స్మ తాం పురీమ్ |
భరతేనాపి తాం రాత్రిం స్వప్నో దృష్టోయమప్రియః || ౧
వ్యుష్టామేవ తు తాం రాత్రిం దృష్ట్వా తం స్వప్నమప్రియమ్ |
పుత్రో రాజాధిరాజస్య సుభృశం పర్యతప్యత || ౨
తప్యమానం సమాజ్ఞాయ వయస్యాః ప్రియవాదినః |
ఆయాసం హి వినేష్యన్త స్సభాయాం చక్రిరే కథాః || ౩
వాదయన్తి తథా శాన్తిం లాస యన్త్యపి చాపరే |
నాటకాన్యపరే ప్రాహుర్హాస్యాని వివిధాని చ || ౪
స తైర్మహాత్మా భరతస్సఖిభిః ప్రియవాదిభిః |
గోష్ఠీహాస్యాని కుర్వద్భిర్న ప్రాహృష్యత రాఘవః || ౫
తమబ్రవీత్ప్రియసఖో భరతం సఖిభిర్వృతమ్ |
సుహృద్భిః పర్యుపాసీనః కిం సఖే! నానుమోదసే || ౬
ఏవం బ్రువాణం సుహృదం భరతః ప్రత్యువాచ హ |
శ్రుణు త్వం యన్నిమిత్తం మే దైన్యమేతదుపాగతమ్ || ౭
స్వప్నే పితరమద్రాక్షం మలినం ముక్త మూర్ధజమ్ |
పతన్తమద్రిశిఖరాత్కలుషే గోమయహ్రదే || ౮
ప్లవమానశ్చ మే దృష్టస్స తస్మిన్గోమయహ్రదే |
పిబన్నఞ్జలినా తైలం హసన్నపి ముహుర్ముహుః || ౯
తతస్తిలౌదనం భుక్త్వా పునః పునరధశ్శిరాః |
తైలేనాభ్యక్తసర్వాఙ్గః తైలమేవాన్వగాహత || ౧౦
స్వప్నేపి సాగరం శుష్కం చన్ద్రం చ పతితం భవి |
ఉపరుద్ధాం చ జగతీం తమసేవ సమావృతామ్ || ౧౧
ఔపవాహ్యస్య నాగస్య విషాణం శకలీకృతమ్ |
సహసాచాపి సంశాన్తం జ్వలితం జాతవేదసమ్ || ౨౨
అవతీర్ణాం చ పృథివీం శుష్కాం శ్చ వివిధాన్ ద్రుమాన్ |
అహం పశ్యామి విధ్వస్తాన్ సధూమాంశ్చాపి పర్వతాన్ || ౧౩
పీఠే కార్ష్ణాయసే చైనం నిషణ్ణం కృష్ణవాససమ్ |
ప్రహసన్తి స్మ రాజానం ప్రమదాః కృష్ణపిఙ్గలాః || ౧౪
త్వరమాణశ్చ ధర్మాత్మా రక్తమాల్యానులేపనః |
రథేన ఖరయుక్తేన ప్రయాతో దక్షిణాముఖః || ౧౫
ప్రహసన్తీవ రాజానం ప్రమదా రక్తవాసినీ |
ప్రకర్షన్తీ మయా దృష్టా రాక్షసీ వికృతాననా || ౧౬
ఏవమేతన్మయా దృష్టమిమాం రాత్రిం భయావహమ్ |
అహం రామోథవా రాజా లక్ష్మణో వా మరిష్యతి || ౧౭
నరో యానేన య స్స్వప్నే స్వరయుక్తేన యాతి హి |
అచిరాత్తస్య ధూమాగ్రం చితాయాం సమ్ప్రదృశ్యతే || ౧౮
ఏతన్నిమిత్తం దీనోహం తన్నవః ప్రతిపూజయే |
శుష్యతీవ చ మే కణ్ఠః న స్వస్థమివ మే మనః || ౧౯
న పశ్యామి భయస్థానం భయం చైవోపధారయే |
భ్రష్టశ్చ స్వరయోగో మే ఛాయా చోపహతా మమ |
జుగుప్సన్నివ చాత్మానం న పశ్యమి చ కారణమ్ || ౨౦
ఇమాం చ దుస్స్వప్నగతిం నిశామ్యతామనేకరూపామవితర్కితాం పురా |
భయం మహత్తద్ధృదయాన్నయాతి మే విచిన్త్య రాజానమచిన్తదర్శనమ్ || ౨౧
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాణ్డే ఏకోనసప్తతితమస్సర్గః