శ్రీ గణేశ భుజంగం
రణత్క్షుద్రఘంటానినాదాభిరామం
చలత్తాండవోద్దండవత్పద్మతాలం |
లసత్తుందిలాంగోపరివ్యాలహారం
గణాధీశ మీశానసూనుం తమీడే || ౧ ||
ధ్వనిధ్వంసవీణాలయోల్లాసివక్త్రం
స్ఫురచ్ఛుండదండోల్లసద్బీజపూరం |
గలద్దర్పసౌగంధ్యలోలాలిమాలం
గణాధీశ మీశానసూనుం తమీడే || ౨ ||
ప్రకాశజ్జపారక్తరత్నప్రసూన-
-ప్రవాలప్రభాతారుణజ్యోతిరేకం |
ప్రలంబోదరం వక్రతుండైకదంతం
గణాధీశ మీశానసూనుం తమీడే || ౩ ||
విచిత్రస్ఫురద్రత్నమాలాకిరీటం
కిరీటోల్లసచ్చంద్రరేఖావిభూషం |
విభూషైకభూషం భవధ్వంసహేతుం
గణాధీశ మీశానసూనుం తమీడే || ౪ ||
ఉదంచద్భుజావల్లరీదృశ్యమూలో-
-చ్చలద్భ్రూలతావిభ్రమభ్రాజదక్షం |
మరుత్సుందరీచామరైః సేవ్యమానం
గణాధీశ మీశానసూనుం తమీడే || ౫ ||
స్ఫురన్నిష్ఠురాలోలపింగాక్షితారం
కృపాకోమలోదారలీలావతారం |
కలాబిందుగం గీయతే యోగివర్యై-
-ర్గణాధీశ మీశానసూనుం తమీడే || ౬ ||
యమేకాక్షరం నిర్మలం నిర్వికల్పం
గుణాతీతమానందమాకారశూన్యం |
పరం పారమోంకారమామ్నాయగర్భం
వదంతి ప్రగల్భం పురాణం తమీడే || ౭ ||
చిదానందసాంద్రాయ శాంతాయ తుభ్యం
నమో విశ్వకర్త్రే చ హర్త్రే చ తుభ్యం |
నమోఽనంతలీలాయ కైవల్యభాసే
నమో విశ్వబీజ ప్రసీదేశసూనో || 8 ||
ఫలశ్రుతి:
ఇమం సుస్తవం ప్రాతరుత్థాయ భక్త్యా
పఠేద్యస్తు మర్త్యో లభేత్సర్వకామాన్ |
గణేశప్రసాదేన సిధ్యంతి వాచో
గణేశే విభౌ దుర్లభం కిం ప్రసన్నే || ౯ ||
ఇతి శ్రీమచ్ఛంకరాచార్య కృత శ్రీ గణేశ భుజంగం |