కాలభైరవాష్టకం
దేవరాజసేవ్యమానపావనాంఘ్రిపంకజం
వ్యాలయజ్ఞసూత్రమిందుశేఖరం కృపాకరం |
నారదాదియోగిబృందవందితం దిగంబరం
కాశికాపురాధినాథ కాలభైరవం భజే || ౧ ||
భానుకోటిభాస్వరం భవాబ్ధితారకం పరం
నీలకంఠమీప్సితార్థదాయకం త్రిలోచనమ్ |
కాలకాలమంబుజాక్షమక్షశూలమక్షరం
కాశికాపురాధినాథ కాలభైరవం భజే || ౨ ||
శూలటంకపాశదండపాణిమాదికారణం
శ్యామకాయమాదిదేవమక్షరం నిరామయం |
భీమవిక్రమం ప్రభుం విచిత్రతాండవప్రియం
కాశికాపురాధినాథ కాలభైరవం భజే || ౩ ||
భుక్తిముక్తిదాయకం ప్రశస్తచారువిగ్రహం
భక్తవత్సలం స్థిరం సమస్తలోకవిగ్రహం |
నిక్వణన్మనోజ్ఞహేమకింకిణీలసత్కటిం
కాశికాపురాధినాథ కాలభైరవం భజే || ౪ ||
ధర్మసేతుపాలకం త్వధర్మమార్గనాశకం
కర్మపాశమోచకం సుశర్మదాయకం విభుమ్ |
స్వర్ణవర్ణకేశపాశశోభితాంగమండలం
కాశికాపురాధినాథ కాలభైరవం భజే || ౫ ||
రత్నపాదుకాప్రభాభిరామపాదయుగ్మకం
నిత్యమద్వితీయమిష్టదైవతం నిరంజనం |
మృత్యుదర్పనాశనం కరాలదంష్ట్రభీషణం
కాశికాపురాధినాథ కాలభైరవం భజే || ౬ ||
అట్టహాసభిన్నపద్మజాండకోశసంతతిం
దృష్టిపాతనష్టపాపజాలముగ్రశాసనం |
అష్టసిద్ధిదాయకం కపాలమాలికాధరం
కాశికాపురాధినాథ కాలభైరవం భజే || ౭ ||
భూతసంఘనాయకం విశాలకీర్తిదాయకం
కాశివాసిలోకపుణ్యపాపశోధకం విభుమ్ |
నీతిమార్గకోవిదం పురాతనం జగత్పతిం
కాశికాపురాధినాథ కాలభైరవం భజే || ౮ ||
కాలభైరవాష్టకం పఠంతి యే మనోహరం
జ్ఞానముక్తిసాధనం విచిత్రపుణ్యవర్ధనం |
శోకమోహదైన్యలోభకోపతాపనాశనం
తే ప్రయాంతి కాలభైరవాంఘ్రిసన్నిధిం ధ్రువం || ౯ ||
ఇతి శ్రీమచ్చంకరాచార్య విరచితం కాలభైరవాష్టకం సంపూర్ణమ్ |
Kala Bhairava Ashtakam
dēvarājasēvyamānapāvanāṅghripaṅkajaṃ
vyālayajñasūtraminduśēkharaṃ kṛpākaram |
nāradādiyōgibṛndavanditaṃ digambaraṃ
kāśikāpurādhinātha kālabhairavaṃ bhajē || 1 ||
bhānukōṭibhāsvaraṃ bhavābdhitārakaṃ paraṃ
nīlakaṇṭhamīpsitārthadāyakaṃ trilōcanam |
kālakālamambujākṣamakṣaśūlamakṣaraṃ
kāśikāpurādhinātha kālabhairavaṃ bhajē || 2 ||
śūlaṭaṅkapāśadaṇḍapāṇimādikāraṇaṃ
śyāmakāyamādidēvamakṣaraṃ nirāmayam |
bhīmavikramaṃ prabhuṃ vicitratāṇḍavapriyaṃ
kāśikāpurādhinātha kālabhairavaṃ bhajē || 3 ||
bhuktimuktidāyakaṃ praśastacāruvigrahaṃ
bhaktavatsalaṃ sthiraṃ samastalōkavigraham |
nikvaṇanmanōjñahēmakiṅkiṇīlasatkaṭiṃ
kāśikāpurādhinātha kālabhairavaṃ bhajē || 4 ||
dharmasētupālakaṃ tvadharmamārganāśakaṃ
karmapāśamōcakaṃ suśarmadāyakaṃ vibhum |
svarṇavarṇakēśapāśaśōbhitāṅgamaṇḍalaṃ
kāśikāpurādhinātha kālabhairavaṃ bhajē || 5 ||
ratnapādukāprabhābhirāmapādayugmakaṃ
nityamadvitīyamiṣṭadaivataṃ nirañjanam |
mṛtyudarpanāśanaṃ karāladamṣṭrabhīṣaṇaṃ
kāśikāpurādhinātha kālabhairavaṃ bhajē || 6 ||
aṭṭahāsabhinnapadmajāṇḍakōśasantatiṃ
dṛṣṭipātanaṣṭapāpajālamugraśāsanam |
aṣṭasiddhidāyakaṃ kapālamālikādharaṃ
kāśikāpurādhinātha kālabhairavaṃ bhajē || 7 ||
bhūtasaṅghanāyakaṃ viśālakīrtidāyakaṃ
kāśivāsilōkapuṇyapāpaśōdhakaṃ vibhum |
nītimārgakōvidaṃ purātanaṃ jagatpatim
kāśikāpurādhinātha kālabhairavaṃ bhajē || 8 ||
kālabhairavāṣṭakaṃ paṭhanti yē manōharaṃ
jñānamuktisādhanaṃ vicitrapuṇyavardhanam |
śōkamōhadainyalōbhakōpatāpanāśanaṃ
tē prayānti kālabhairavāṅghrisannidhiṃ dhruvam || 9 ||
iti śrīmacchaṅkarācārya viracitaṃ kālabhairavāṣṭakaṃ saṃpūrṇam |