శ్రీమద్రామాయణము - అయోధ్యాకాండ
ఏకోత్తర శతతమ సర్గము
రామస్య వచనం శ్రుత్వా భరతః ప్రత్యువాచ హ |
కిం మే ధర్మాద్విహీనస్య రాజధర్మః కరిష్యతి || ౧
శాశ్వతోయం సదా ధర్మః స్థితోస్మాసు నరర్షభ |
జేష్ఠపుత్రే స్థితే రాజన్నకనీయాన్నృపోభవేత్ || ౨
స సమృద్ధాం మయా సార్ధమయోధ్యాం గచ్ఛ రాఘవ |
అభిషేచయచాత్మానం కులస్యాస్య భవాయ నః || ౩
రాజానం మానుషం ప్రాహు ర్దేవత్వే సమ్మతో మమ |
యస్య ధర్మార్థసహితం వృత్తమాహురమానుషమ్ || ౪
కేకయస్థే చ మయి తు త్వయి చారణ్య మాశ్రితే |
దివమార్యో గతో రాజా యాయజూకస్సతాం మతః || ౫
నిష్క్రాన్తమాత్రే భవతి ససీతే సహలక్ష్మణే |
దుఃఖశోకాభిభూతస్తు రాజా త్రిదివమభ్యగాత్ || ౬
ఉత్తిష్ఠ పురుషవ్యాఘ్ర క్రియతాముదకం పితుః |
అహం చాయం చ శత్రుఘ్నః పూర్వమేవ కృతోదకౌ || ౭
ప్రియేణ కిల దత్తం హి పితృలోకేషు రాఘవ |
అక్షయ్యం భవతీత్యాహుర్భవాంశ్చైవ పితుః ప్రియః || ౮
త్వామేవ శోచంస్తవ దర్శనేప్సుస్త్వయ్యేవ సక్తామనివర్త్య బుద్ధిమ్ |
త్వయా విహీన స్తవ శోకమగ్నస్త్వాం సంస్మరన్నస్తమితః పితా తే || ౯
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాణ్డే ఏకోత్తర శతతమ స్సర్గః