Sri Ganesha Kavacham
gauryuvāca
ēṣō’ticapalō daityānbālyē’pi nāśayatyahō |
agrē kiṃ karma kartēti na jānē munisattama || 1 ||
daityā nānāvidhā duṣṭāḥ sādhudēvadrruhaḥ khalāḥ |
atō’sya kaṇṭhē kiñcittvaṃ rakṣārthaṃ baddhumarhasi || 2 ||
dhyāyētsiṃhagataṃ vināyakamamuṃ digbāhumādyē yugē
trētāyāṃ tu mayūravāhanamamuṃ ṣaḍbāhukaṃ siddhidam |
dvāpārē tu gajānanaṃ yugabhujaṃ raktāṅgarāgaṃ vibhuṃ
turyē tu dvibhujaṃ sitāṅgaruciraṃ sarvārthadaṃ sarvadā || 3 ||
vināyakaḥ śikhāṃ pātu paramātmā parātparaḥ |
atisundarakāyastu mastakaṃ sumahōtkaṭaḥ || 4 ||
lalāṭaṃ kaśyapaḥ pātu bhrūyugaṃ tu mahōdharaḥ |
nayanē phālacandrastu gajāsyastvōṣṭhapallavau || 5 ||
jihvāṃ pātu gaṇakrīḍaścibukaṃ girijāsutaḥ |
vācaṃ vināyakaḥ pātu dantān rakṣatu durmukhaḥ || 6 ||
śravaṇau pāśapāṇistu nāsikāṃ cintitārthadaḥ |
gaṇēśastu mukhaṃ kaṇṭhē pātu dēvō gaṇañjaya || 7 ||
skandhau pātu gajaskandhaḥ stanau vighnavināśanaḥ |
hṛdayaṃ gaṇanāthastu hērambō jaṭharaṃ mahān || 8 ||
dharādharaḥ pātu pārśvau pṛṣṭhaṃ vighnaharaḥ śubhaḥ |
liṅgaṃ guhyaṃ sadā pātu vakratuṇḍō mahābalaḥ || 9 ||
gaṇakrīḍō jānujruṅghē ūrū maṅgalamūrtimān |
ēkadantō mahābuddhiḥ pādau gulphau sadā’vatu || 10 ||
kṣipraprasādanō bāhū pāṇī āśāprapūrakaḥ |
aṅguḷīśca nakhānpātu padmahastō’rināśanaḥ || 11 ||
sarvāṅgāni mayūrēśō viśvavyāpī sadā’vatu |
anuktamapi yatsthānaṃ dhūmakētuḥ sadā’vatu || 12 ||
āmōdastvagrataḥ pātu pramōdaḥ pṛṣṭhatō’vatu |
prācyāṃ rakṣatu buddhīśa āgnēyyāṃ siddhidāyakaḥ || 13 ||
dakṣiṇasyāmumāputrō nairṛtyāṃ tu gaṇēśvaraḥ |
pratīcyāṃ vighnahartā’vyādvāyavyāṃ gajakarṇakaḥ || 14 ||
kaubēryāṃ nidhipaḥ pāyādīśānyāmīśanandanaḥ |
divā’vyādēkadantastu rātrau sandhyāsu vighnahṛt || 15 ||
rākṣasāsurabhētāḷagrahabhūtapiśācataḥ |
pāśāṅkuśadharaḥ pātu rajaḥsattvatamaḥ smṛtīḥ || 16 ||
jñānaṃ dharmaṃ ca lakṣmīṃ ca lajjāṃ kīrtiṃ tathā kulam |
vapurdhanaṃ ca dhānyaṃ ca gṛhāndārānsutānsakhīn || 17 ||
sarvāyudhadharaḥ pautrānmayūrēśō’vatātsadhā |
kapilō’jāvikaṃ pātu gajāśvānvikaṭō’vatu || 18 ||
bhūrjapatrē likhitvēdaṃ yaḥ kaṇṭhē dhārayētsudhīḥ |
na bhayaṃ jāyatē tasya yakṣarakṣapiśācataḥ || 19 ||
trisandhyaṃ japatē yastu vajrasāratanurbhavēt |
yātrākālē paṭhēdyastu nirvighnēna phalaṃ labhēt || 20 ||
yuddhakālē paṭhēdyastu vijayaṃ cāpnuyāddhruvam |
māraṇōccāṭanākarṣastambhamōhanakarmaṇi || 21 ||
saptavāraṃ japadēttaddhinānāmēkaviṃśatiḥ |
tattatphalamavāpnōti sādhakō nātra saṃśayaḥ || 22 ||
ēkaviṃśativāraṃ ca paṭhēttāvaddināni yaḥ |
kārāgṛhagataṃ sadyō rājñā vadhyaṃ ca mōcayēt || 23 ||
rājadarśanavēlāyāṃ paṭhēdētattrivārataḥ |
sa rājānaṃ vaśaṃ nītvā prakṛtīśca sabhāṃ jayēt || 24 ||
idaṃ gaṇēśakavacaṃ kaśyapēna samīritam |
mudgalāya ca tēnātha māṇḍavyāya maharṣayē || 25 ||
mahyaṃ sa prāha kṛpayā kavacaṃ sarvasiddhidam |
na dēyaṃ bhaktihīnāya dēyaṃ śraddhāvatē śubham || 26 ||
anēnāsya kṛtā rakṣā na bādhā’sya bhavētkvacyit |
rākṣasāsurabhētāladaityadānavasaṃbhavā || 27 ||
iti śrī gaṇēśapurāṇē uttarakhandē bālakrīḍāyāṃ ṣaḍaśītitamē’dhyāyē gaṇēśa kavacham ||