śrī vēdavyāsa stutiḥ
vyāsaṃ vasiṣṭhanaptāraṃ śaktēḥ pāutramakalmaṣam |
parāśarātmajaṃ vandē śukatātaṃ tapōnidhim || 1 ||
vyāsāya viṣṇurūpāya vyāsarūpāya viṣṇavē |
namō vāi brahmanidhayē vāsiṣṭhāya namō namaḥ || 2 ||
kr̥ṣṇadvāipāyanaṃ vyāsaṃ sarvalōkahitē ratam |
vēdābjabhāskaraṃ vandē śamādinilayaṃ munim || 3 ||
vēdavyāsaṃ svātmarūpaṃ satyasandhaṃ parāyaṇam |
śāntaṃ jitēndriyakrōdhaṃ saśiṣyaṃ praṇamāmyaham || 4 ||
acaturvadanō brahmā dvibāhuraparō hariḥ |
aphālalōcanaḥ śambhuḥ bhagavān bādarāyaṇaḥ || 5 ||
śaṅkaraṃ śaṅkarācāryaṃ kēśavaṃ bādarāyaṇam |
sūtrabhāṣyakr̥tāu vandē bhagavantāu punaḥ punaḥ || 6 ||
brahmasūtrakr̥tē tasmāi vēdavyāsāya vēdhasē |
jñānaśaktyavatārāya namō bhagavatō harēḥ || 7 ||
vyāsaḥ samastadharmāṇāṃ vaktā munivarēḍitaḥ |
cirañjīvī dīrghamāyurdadātu jaṭilō mama || 8 ||
prajñābalēna tapasā caturvēdavibhājakaḥ |
kr̥ṣṇadvāipāyanō yaśca tasmāi śrīguravē namaḥ || 9 ||
jaṭādharastapōniṣṭhaḥ śuddhayōgō jitēndriyaḥ |
kr̥ṣṇājinadharaḥ kr̥ṣṇastasmāi śrīguravē namaḥ || 10 ||
bhāratasya vidhātā ca dvitīya iva yō hariḥ |
haribhaktiparō yaśca tasmāi śrīguravē namaḥ || 11 ||
jayati parāśarasūnuḥ satyavatī hr̥dayanandanō vyāsaḥ |
yasyāsya kamalagalitaṃ bhāratamamr̥taṃ jagatpibati || 12 ||
vēdavibhāgavidhātrē vimalāya brahmaṇē namō viśvadr̥śē |
sakaladhr̥tihētusādhanasūtrasr̥jē satyavatyabhivyakti matē || 13 ||
vēdāntavākyakusumāni samāni cāru
jagrantha sūtranicayēna manōharēṇa |
mōkṣārthilōkahitakāmanayā muniryaḥ
taṃ bādarāyaṇamahaṃ praṇamāmi bhaktyā || 14 ||
iti śrī vēdavyāsa stutiḥ ||