śrī varāhamukhī stavaḥ
kuvalayanibhā kāuśēyārdhōrukā mukuṭōjjvalā
halamusalinī sadbhaktēbhyō varābhayadāyinī |
kapilanayanā madhyē kṣāmā kaṭhōraghanastanī
jayati jagatāṃ mātaḥ sā tē varāhamukhī tanuḥ || 1 ||
tarati vipadō ghōrā dūrāt-parihriyatē bhayaṃ
skhalitamati-bhīrbhūta-prētaiḥ svayaṃ vriyatē śriyā |
kṣapayati ripūnīṣṭē vācāṃ raṇē labhatē jayaṃ
vaśayati jagat-sarvaṃ vārāhi yastvayi bhaktimān || 2 ||
stimitagatayaḥ sīdad-vācaḥ paricyuta-hētayaḥ
kṣubhitahr̥dayāḥ sadyō naśyad-dr̥śō galitāujasaḥ |
bhayaparavaśā bhagnōtsāhāḥ parāhatapāuruṣāḥ
bhagavati purastvadbhaktānāṃ bhavanti virōdhinaḥ || 3 ||
kisalayamr̥durhastāḥ kliśyēta kandukalīlayā
bhagavati mahābhāraḥ krīḍāsarōruhamēva tē |
tadapi musalaṃ dhatsē hastē halaṃ samayadrūhāṃ
harasi ca tadāghātāir-prāṇānahō tava sāhasam || 4 ||
janani niyatāsthānē tvadvāma-dakṣiṇapārśvayō-
-rmr̥dubhujalatāmandōkṣēpa-pravātitacāmarē |
satatamuditē guhyācāra-drūhāṃ rudhirāsavāi-
-rupaśamayatāṃ śatrūn sarvānubhē mama dēvatē || 5 ||
haratu duritaṃ kṣētrādhīśaḥ svaśāsanavidviṣāṃ
rudhiramadirāmattāḥ prāṇōpahārabalipriyaḥ |
aviratacaṭatkurvad-daṃṣṭrāsthikoṭiraṭanmukhō
bhagavati sa tē caṇḍōccaṇḍaḥ sadā purataḥ sthitaḥ || 6 ||
kṣubhitamakarāirvīcī-hastōparuddha-parasparāi-
-ścatu rudadhibhiḥ krāntā kalpāntadurlalitōdakaiḥ |
janani kathamuttiṣṭhēt pātālasarpabilādilā
tava tu kuṭilē daṃṣṭrākoṭī na cēdavalambanam || 7 ||
tamasi bahulē śūnyāṭavyāṃ piśācaniśācara-
-pramathakalahē cōravyāghrōragadvipasaṅkaṭē |
kṣubhitamanasaḥ kṣudrasyāikākinō'pi kutō bhayaṃ
sakr̥dapi mukhē mātastvannāma sannihitaṃ yadi || 8 ||
viditavibhavaṃ hr̥dyāiḥ padyāirvarāhamukhīstavaṃ
sakalaphaladaṃ pūrṇaṃ mantrākṣarāirimamēva yaḥ |
paṭhati sa paṭuḥ prāpnōtyāyuś-ciraṃ kavitāṃ priyāṃ
sutasukhadhanārōgyaṃ kīrtiṃ śriyaṃ jayamurvarām || 9 ||
iti śrī varāhamukhī stavaḥ ||