Shri Shiva Raksha Stotram
asya śrī śivarakṣāstōtramantrasya yājñavalkya ṛṣiḥ |
śrī sadāśivō dēvatā | anuṣṭup chandaḥ |
śrī sadāśivaprītyarthaṃ śivarakṣāstōtrajapē viniyōgaḥ ||
caritaṃ dēvadēvasya mahādēvasya pāvanaṃ |
apāraṃ paramōdāraṃ caturvargasya sādhanaṃ || 1 ||
gaurīvināyakōpētaṃ pañcavaktraṃ trinētrakāṃ |
śivaṃ dhyātvā daśabhujaṃ śivarakṣāṃ paṭhēnnaraḥ || 2 ||
gaṅgādharaḥ śiraḥ pātu phālaṃ ardhēnduśēkharaḥ |
nayanē madanadhvaṃsī karṇō sarpavibhūṣaṇaḥ || 3 ||
ghrāṇaṃ pātu purārātiḥ mukhaṃ pātu jagatpatiḥ |
jihvāṃ vāgīśvaraḥ pātu kandharāṃ śitikandharaḥ || 4 ||
śrīkaṇṭhaḥ pātu mē kaṇṭhaṃ skandhau viśvadhuraṃdharaḥ |
bhujau bhūbhārasaṃhartā karau pātu pinākadhṛk || 5 ||
hṛdayaṃ śaṅkaraḥ pātu jaṭharaṃ girijāpatiḥ |
nābhiṃ mr̥tyuñjayaḥ pātu kaṭī vyāghrājināmbaraḥ || 6 ||
sakthinī pātu dīnārtaśaraṇāgatavatsalaḥ |
ūrū mahēśvaraḥ pātu jānunī jagadīśvaraḥ || 7 ||
jaṅghē pātu jagatkartā gulphau pātu gaṇādhipaḥ |
caraṇau karuṇāsindhuḥ sarvāṅgāni sadāśivaḥ || 8 ||
ētāṃ śivabalōpētāṃ rakṣāṃ yaḥ sukṛtī paṭhēt |
sa bhuktvā sakalānkāmān śivasāyujyamāpnuyāt |
grahabhūtapiśācādyāḥ trailōkyē vicaranti yē |
dūrādāśu palāyantē śivanāmābhirakṣaṇāt || 9 ||
abhayaṅkaranāmēdaṃ kavacaṃ pārvatīpatēḥ |
bhaktyā bibharti yaḥ kaṇṭhē tasya vaśyaṃ jagattrayam |
imāṃ nārāyaṇaḥ svapnē śivarakṣāṃ yathā’diśat |
prātarutthāya yōgīndrō yājñavalkyaḥ tathā’likhat || 10 ||
iti śrīyājñavalkyaprōktaṃ śiva rakṣā stōtraṃ saṃpūrṇam ||