Shri Parvati Vallabha Ashtakam
namō bhūtanāthaṃ namō dēvadēvaṃ
namaḥ kālakālaṃ namō divyatējam |
namaḥ kāmabhasmaṃ namaśśāntaśīlaṃ
bhajē pārvatīvallabhaṃ nīlakaṇṭham || 1 ||
sadā tīrthasiddhaṃ sadā bhaktarakṣaṃ
sadā śaivapūjyaṃ sadā śubhrabhasmam |
sadā dhyānayuktaṃ sadā jñānatalpaṃ
bhajē pārvatīvallabhaṃ nīlakaṇṭham || 2 ||
śmaśānaṃ śayānaṃ mahāsthānavāsaṃ
śarīraṃ gajānāṃ sadā carmavēṣṭam |
piśācaṃ niśōcaṃ paśūnāṃ pratiṣṭhaṃ
bhajē pārvatīvallabhaṃ nīlakaṇṭham || 3 ||
phaṇīnāgakaṇṭhē bhujaṅgādyanēkaṃ
gaḷē ruṇḍamālaṃ mahāvīra śūram |
kaṭivyāghracarmaṃ citābhasmalēpaṃ
bhajē pārvatīvallabhaṃ nīlakaṇṭham || 4 ||
śiraśśuddhagaṅgā śivā vāmabhāgaṃ
bṛhaddīrghakēśaṃ sadā māṃ triṇētram |
phaṇīnāgakarṇaṃ sadā phālacandraṃ
bhajē pārvatīvallabhaṃ nīlakaṇṭham || 5 ||
karē śūladhāraṃ mahākaṣṭanāśaṃ
surēśaṃ varēśaṃ mahēśaṃ janēśam |
dhanēśāmarēśaṃ dhvajēśaṃ girīśaṃ
bhajē pārvatīvallabhaṃ nīlakaṇṭham || 6 ||
udāsaṃ sudāsaṃ sukailāsavāsaṃ
dharānirdharaṃ saṃsthitaṃ hyādidēvam |
ajāhēmakalpadrumaṃ kalpasēvyaṃ
bhajē pārvatīvallabhaṃ nīlakaṇṭham || 7 ||
munīnāṃ varēṇyaṃ guṇaṃ rūpavarṇaṃ
dvijaissaṃpaṭhantaṃ śivaṃ vēdaśāstram |
ahō dīnavatsaṃ kṛpālaṃ mahēśaṃ
bhajē pārvatīvallabhaṃ nīlakaṇṭham || 8 ||
sadā bhāvanāthaṃ sadā sēvyamānaṃ
sadā bhaktidēvaṃ sadā pūjyamānam |
mayā tīrthavāsaṃ sadā sēvyamēkaṃ
bhajē pārvatīvallabhaṃ nīlakaṇṭham || 9 ||
iti śrīmacchaṅkarayōgīndra viracitaṃ pārvatīvallabhāṣṭakaṃ saṃpūrṇam ||