śrī nārāyaṇa hr̥dayam
hariḥ ōṃ || asya śrī nārāyaṇa hr̥daya stōtra mahāmantrasya |
bhārgava r̥ṣiḥ |
anuṣṭup chandaḥ |
lakṣmīnārāyaṇō dēvatā |
nārāyaṇa prītyarthē japē viniyōgaḥ ||
Karanyāsaḥ:
nārāyaṇaḥ paraṃ jyōtiriti aṅguṣṭhābhyāṃ namaḥ |
nārāyaṇaḥ paraṃ brahmēti tarjanībhyāṃ namaḥ |
nārāyaṇaḥ parō dēva iti madhyamābhyāṃ namaḥ |
nārāyaṇaḥ paraṃ dhāmēti anāmikābhyāṃ namaḥ |
nārāyaṇaḥ parō dharma iti kaniṣṭhikābhyāṃ namaḥ |
viśvaṃnārāyaṇa iti karatala karapr̥ṣṭhābhyāṃ namaḥ |
Aṅganyāsaḥ:
nārāyaṇaḥ paraṃ jyōtiriti hr̥dayāya namaḥ |
nārāyaṇaṃ paraṃ brahmēti śirasē svāhā |
nārāyaṇaḥ parō dēva iti śikhāyai vauṣaṭ |
nārāyaṇaḥ paraṃ dhāmēti kavacāya hum |
nārāyaṇaḥ parō dharma iti nētrābhyāṃ vauṣaṭ |
viśvaṃ nārāyaṇa iti astrāya phaṭ |
bhūrbhuvaḥ suvarōmiti digbandhaḥ ||
Dhyānam:
udyadāditya saṅkāśaṃ pītavāsaṃ caturbhujam |
śaṅkha cakra gadā pāṇiṃ dhyāyēllakṣmīpatiṃ harim || 1 ||
trailōkyādhāracakraṃ taduvari kamaṭhaṃ tatra cānantabhōgī |
tanmadhyē bhūmipadmāṅkuśaśikharadaḷaṃ karṇikābhūtamērum |
tatratyaṃ śāntamūrtiṃ maṇimayamakuṭaṃ kuṇḍalōdbhāsitāṅgaṃ |
lakṣmīnārāyaṇākhyaṃ sarasijanayanaṃ santataṃ cintayāmaḥ || 2 ||
Stōtram:
nārāyaṇaḥ paraṃ jyōtirātmā nārāyaṇaḥ paraḥ |
nārāyaṇa paraṃ brahma nārāyaṇa namō'stu tē ||
nārāyaṇaḥ parō dēvō dhātā nārāyaṇaḥ paraḥ |
nārāyaṇaḥ parō dhātā nārāyaṇa namōstu tē ||
nārāyaṇa paraṃ dhāma dhyānaṃ nārāyaṇaḥ paraḥ |
nārāyaṇa parō dharmō nārāyaṇa namōstu tē ||
nārāyaṇaḥ parō dēvō vidyā nārāyaṇaḥ paraḥ |
viśvaṃ nārāyaṇaḥ sākṣāt nārāyaṇa namōstu tē ||
nārāyaṇād vidhirātō jātō nārāyaṇād bhavaḥ |
jātō nārāyaṇādindra nārāyaṇa namōstu tē ||
ravirnārāyaṇastējaḥ candra nārāyaṇō mahaḥ |
vahnirnārāyaṇa sākṣāt nārāyaṇa namōstu tē ||
nārāyaṇa upāsyaḥ syād gururnārāyaṇaḥ paraḥ |
nārāyaṇaḥ parō bōdhō nārāyaṇa namōstu tē ||
nārāyaṇa phalaṃ mukhyaṃ siddhirnārāyaṇaḥ sukhaṃ |
harirnārāyaṇaḥ śuddhirnārāyaṇa namōstu tē ||
nigamāvēditānanta kalyāṇa guṇavāridhē |
nārāyaṇa namastēstu narakārṇavatāraka ||
janma mr̥tyu jarā vyādhi pāratantryādibhiḥ sadā |
dōṣaira spr̥ṣṭarūpāya nārāyaṇa namōstu tē ||
vēdaśāstrārtha vijñāna sādhya bhaktyēka gōcara |
nārāyaṇa namastēstu māmuddhara bhavārṇavāt ||
nityānanda mahōdāra parātpara jagatpatē |
nārāyaṇa namastēstu mōkṣa sāmrājyadāyinē ||
ābrahmastambaparyantaṃ akhilātma mahāśraya |
sarvabhūtātma bhūtātman nārāyaṇa namōstu tē ||
pālitāśēṣa lōkāya puṇyaśravaṇa kīrtana |
nārāyaṇa namastēstu praḷayōdaka śāyinē ||
nirasta sarvadōṣāya bhaktyādi guṇadāyinē |
nārāyaṇa namastēstu tvāṃ vinā nahi mē gatiḥ ||
dharmārtha kāma mōkṣākhya puruṣārtha pradāyinē |
nārāyaṇa namastēstu punastēstu namō namaḥ ||
Atha Prārthanā:
nārāyaṇa tvamēvāsi daharākhyē hr̥di sthitaḥ |
prēritā prēryamāṇānāṃ tvayā prērita mānasaḥ ||
tvadājñāṃ śirasā kr̥tvā bhajāmi janapāvanaṃ |
nānōpāsana mārgāṇāṃ bhavakr̥d bhāvabōdhakaḥ ||
bhāvārthakr̥d bhavātītō bhava saukhyapradō mama |
tvanmāyāmōhitaṃ viśvaṃ tvayaiva parikalpitaṃ ||
tvadadhiṣṭhāna mātrēṇa sā vai sarvārthakārinī |
tvamēva tāṃ puraskr̥tya mama kāmān samarthaya ||
na mē tvadanyastrātāsti tvadanyanna hi dēvataṃ |
tvadanyaṃ nahi jānāmi pālakaṃ puṇyavardhanaṃ ||
yāvat sāṃsārikō bhāvō manasō bhāvanātmakaḥ |
tāvat siddhirbhavēt sādhyā sarvadā sarvadā vibhō ||
pāpināmahamēkāgrō dayāḷūnāṃ tvamagraṇīḥ |
dayanīyō madanyōsti tava kōntra jagattayē ||
tvayāhaṃ naiva sr̥ṣṭaścēt na syāttava dayāḷutā |
āmayō vā na sr̥ṣṭaścēt auṣadhasya vr̥thōdayaḥ ||
pāpasaṅga pariśrāntaḥ pāpātmā pāparūpadhr̥k |
tvadanyaḥ kō'ntra pāpēbhyaḥ trātāsti jagatītalē ||
tvamēva mātā ca pitā tvamēva |
tvamēva bandhuśca sakhā tvamēva |
tvamēva sēvyaśca gurustvamēva |
tvamēva sarvaṃ mama dēva dēva ||
prārthanā daśakaṃ caiva mūlāṣṭaka mataḥ paraṃ |
yaḥ paṭhēt śruṇuyānnityaṃ tasya lakṣmīḥ sthirā bhavēt ||
nārāyaṇasya hr̥dayaṃ sarvābhīṣṭa phalapradaṃ |
lakṣmīhr̥dayakaṃ stōtraṃ yadi caitadvinākr̥taṃ ||
tatsarvaṃ niṣphalaṃ prōktaṃ lakṣmīḥ krudhyati sarvadā |
ēvatsaṅkalitaṃ stōtraṃ sarvābhīṣṭa phalapradaṃ ||
japēt saṅkalitaṃ kr̥tvā sarvābhīṣṭaṃ avāpnuyāt |
nārāyaṇasya hr̥dayamādāu japtvā tataḥ paraṃ ||
lakṣmīhr̥dayakaṃ stōtraṃ japēnnārāyaṇaṃ punaḥ |
punarnārāyaṇaṃ japtvā punarlakṣmīnutīṃ japēt ||
tadvaddhōmādikaṃ kuryāt ēvatsaṅkalitaṃ śubhaṃ |
ēvaṃ madhyē dvivārēṇa japēt saṅkalita śubhaṃ ||
lakṣmīhr̥dayakē stōtrē sarvamanyat prakāśitaṃ |
sarvān kāmānavāpnōti ādhivyādhibhayaṃ harēt ||
gōpyamētat sadā kuryāt na sarvatra prakāśayēt |
iti guhyatamaṃ śāstraṃ prōktaṃ brahmādibhiḥ purā ||
lakṣmīhr̥dayaprōktēna vidhinā sādhayēt sudhīḥ |
tasmāt sarva prayatnēna sādhayēt gōpayēt sudhīḥ ||
yatraitat pustakaṃ tiṣṭēt lakṣmīnārāyaṇātmakaṃ |
bhūtavāiśācavētāḷa bhayaṃ naiva tu sarvadā ||
bhr̥guvārē tathā rātrē pūjayēt pustakadvayaṃ |
sarvadā sarvadā stutyaṃ gōpayēt sādhayēt sudhīḥ |
gōpanāt sādhanāllōkē dhanyō bhavati tattvataḥ ||
iti śrī nārāyaṇa hr̥dayaṃ sampūrṇam ||