Shri Margabandhu Stotram
śambho mahādeva deva
śiva śambho mahādeva deveśa śambho
śambho mahādeva deva ||
phālāvanamratkirīṭaṃ
phālanetrārciṣā dagdhapañceṣukīṭam |
śūlāhatārātikūṭaṃ
śuddhamardhenducūḍaṃ bhaje mārgabandhum || 1 ||
śambho mahādeva deva
śiva śambho mahādeva deveśa śambho
śambho mahādeva deva ||
aṅge virājadbhujangaṃ
abhragaṅgātaraṅgābhirāmottamāṅgam
oṅkāravāṭīkuraṅgaṃ
siddhasaṃsevitāṅghriṃ bhaje mārgabandhum || 2 ||
śambho mahādeva deva
śiva śambho mahādeva deveśa śambho
śambho mahādeva deva ||
nityaṃ cidānandarūpaṃ
nihnutāśeṣalokeśavairipratāpam
kārtasvarāgendracāpaṃ
kṛttivāsaṃ bhaje divyasanmārgabandhum || 3 ||
śambho mahādeva deva
śiva śambho mahādeva deveśa śambho
śambho mahādeva deva ||
kandarpadarpaghnamīśaṃ
kālakaṇṭhaṃ maheśaṃ mahāvyomakeśam
kundābhadantaṃ sureśaṃ
koṭisūryaprakāśaṃ bhaje mārgabandhum || 4 ||
śambho mahādeva deva
śiva śambho mahādeva deveśa śambho
śambho mahādeva deva ||
mandārabhūterudāraṃ
mandarāgendrasāraṃ mahāgauryadūram
sindūradūrapracāraṃ
sindhurājātidhīraṃ bhaje mārgabandhum || 5 ||
śambho mahādeva deva
śiva śambho mahādeva deveśa śambho
śambho mahādeva deva ||
appayyayajvendragītaṃ
stotrarājaṃ paṭhedyastu bhaktyā prayāṇe
tasyārthasiddhiṃ vidhatte
mārgamadhye’bhayaṃ cāśutoṣo maheśaḥ || 6 ||
śambho mahādeva deva
śiva śambho mahādeva deveśa śambho
śambho mahādeva deva ||
iti śrī mārgabandhu stotraṃ saṃpūrṇam ||