Shri Mallikarjuna Suprabhatam
prātassmarāmi gaṇanāthamanāthabandhuṃ
siṃdūra pūrapariśōbhitagaṇḍayugmam |
uddaṇḍavighnaparikhaṇḍanacaṇḍadaṇḍa
mākhaṇḍalādisuranāyakabṛndavandyam ||
kaḷābhyāṃ cūḍālaṅkr̥taśaśikaḷābhyāṃ nijatapaḥ
phaḷābhyāṃ bhaktēṣu prakaṭitaphaḷābhyāṃ bhavatu mē |
śivābhyāmastīkatribhuvanaśivābhyāṃ hr̥di puna
rbhavābhyāmānandaspuradanubhavābhyāṃ natiriyam ||
namastē namastē mahādēva! śambhō!
namastē namastē dayāpūrṇasindhō!
namastē namastē prapannātmabandhō!
namastē namastē namastē mahēśa ||
śaśvacchrīgiri mūrddhani trijagatāṃ rakṣākr̥tau lakṣitāṃ
sākṣādakṣatasatkaṭākṣasaraṇi śrīmatsuadhāvarṣiṇīm,
sōmārddhāṅkitamastakāṃ praṇamatāṃ nissīmasaṃpatpradāṃ
suślōkāṃ bhramarāmbikāṃ smitamukhīṃ śambhōssakhīṃ tvāṃ sumaḥ ||
mātaḥ! prasīda, sadayā bhava, bhavyaśīlē !
līlālavākulitadaityakulāpahārē !
śrīcakrarājanilayē ! śrutigītakīrtē !
śrīśailanāthadayitē ! tava suprabhātam ||
śambhō ! surēndranuta ! śaṅkara ! śūlapāṇē !
candrāvatamsa ! śiva ! śarva ! pinākapāṇē !
gaṅgādhara ! kratupatē ! garuḍadhvajāpta !
śrī mallikārjunavibhō ! tava suprabhātam ||
viśvēśa ! viśvajanasevita ! viśvamūrtē !
viśvambhara ! tripurabhēdana ! viśvayōnē !
phālākṣa ! bhavyaguṇa ! bhōgivibhūṣaṇēśa !
śrī mallikārjunavibhō ! tava suprabhātam ||
kalyāṇarūpa ! karuṇākara ! kālakaṇṭha !
kalpadrumaprasavapūjita ! kāmadāyin !
durnītidaityadaḷanōdyata ! dēva dēva !
śrī mallikārjunavibhō ! tava suprabhātam ||
gaurīmanōhara ! gaṇēśvarasēvitāṅghrē !
gaṃdharvayakṣasurakiṇṇaragītakīrtē !
gaṇḍāvalambiphaṇikuṇḍalamāṇḍitāsya !
śrī mallikārjunavibhō ! tava suprabhātam ||
nāgēndrabhūṣaṇa ! nirīhita ! nirvikāra !
nirmāya ! niścala ! nirargaḷa ! nāgabhēdin !
nārāyaṇīpriya ! natēṣṭada ! nirmalātman !
śrī parvatādhipa ! vibhō ! tava suprabhātam ||
sr̥ṣṭaṃ tvayaiva jagadētaraśēṣamīśa !
rakṣāvidhiśca vidhigōcara ! tāvakīnaḥ |
saṃhāraśaktirapi śaṅkara ! kiṅkarī tē
śrī śailaśēkharavibhō ! tava suprabhātam ||
ēkastvamēva bahudhā bhava ! bhāsi lōkē
niśśaṅkadhīrvṛṣabhakētana ! mallinātha !
śrī bhrāmarīpriya ! sukhāśraya ! lōkanātha !
śrī śailaśēkharavibhō ! tava suprabhātam ||
pātāḷagāṅgajalamajjananirmalāṅgāḥ
bhasmatripuṇḍrasamalaṅkr̥taphālabhāgāḥ |
gāyanti dēvamunibhaktajanā bhavantaṃ
śrī mallikārjunavibhō ! tava suprabhātam ||
sārasvatāmbuyutabhōgavatīśritāyāḥ
brahmēśaviṣṇugiricumbitakṛṣṇavēṇyāḥ |
sōpānamārgamadhiruhya bhajanti bhaktāḥ
śrī mallikārjunavibhō ! tava suprabhātam ||
śrī mallikārjuna mahēśvarasuprabhāta
stōtraṃ paṭhanti bhuvi yē manujāḥ prabhātē |
tē sarva saukhyamanubhūya parānavāpyaṃ
śrī śāṃbhavaṃ padamavāpya mudaṃ labhaṃtē ||
iti śrī mallikārjuna suprabhātam ||