Shri Mallikarjuna Stotram
śrīkaṇṭhādisamastarudranamitō vāmārdhajāniḥ śivaḥ
prālēyācalahārahīrakumudakṣīrābdhitulyaprabhaḥ |
viṣvaksēnavighātamastamakuṭīratnaprabhābhāsvaraḥ
śrīmatparvatamallikārjunamahādēvaḥ śivō mē gatiḥ || 1 ||
indrādyāmarayātudhānakaravallīvēllitāśīviṣā-
dhīśākarṣitamaṇdarāgamathitāmbhōrāśijātasphura- |
tkīlāsaṃhitavisphuliṅgagaralagrāsaikaśāmyadbhayaḥ
śrīmatparvatamallikārjunamahādēvaḥ śivō mē gatiḥ || 2 ||
udyadbhāsurakāsarāsurabhujādarpādri daṃbhōlibhr̥-
tpāṭīrāmaradhēnunāyakakakudvinyastahastāṃbujaḥ |
nīhārācalakanyakāvahanapādadvandvapādōruhaḥ
śrīmatparvatamallikārjunamahādēvaḥ śivō mē gatiḥ || 3 ||
nīrējāsanamukhyanirjaraśiraḥpracchannapādadvayaḥ
sarvajñatripurāsurāhitagaṇāmbhōdaughajhuñjhānilaḥ |
mārkaṇḍēyamahāmunīśvaranutaprakhyātacāritrakaḥ
śrīmatparvatamallikārjunamahādēvaḥ śivō mē gatiḥ || 4 ||
sadbhaktāvalimānasāṃburuhacañcaccañcarīkō mṛḍaḥ
krīḍābandhurapāṇihr̥tkamalapōtaḥ karṇagōkarṇarāṭ |
cakrī cakrasamastabhūṣaṇagaṇaḥ kōlāsuradhvamsakaḥ
śrīmatparvatamallikārjunamahādēvaḥ śivō mē gatiḥ || 5 ||
kalyāṇācalakārmukaprathitadugdhāṃbhōdikanyāmanaḥ
kañjātabhramarāyamāṇavilasatgōvindasanmārgaṇaḥ |
dhātrīsyandanabhāsamānanaliṇījāta(pta)trayīsaiṇdhavaḥ
śrīmatparvatamallikārjunamahādēvaḥ śivō mē gatiḥ || 6 ||
gōrājōttamavāhanaḥ śasikaḷālaṅkārajūṭaḥ sadā
padmānāyakasāyakastribhuvanādhīśaḥ paśūnāṃ patiḥ |
bhaktābhīṣṭaphalapradānacaturaḥ kāruṇyapāthōnidhiḥ
śrīmatparvatamallikārjunamahādēvaḥ śivō mē gatiḥ || 7 ||
pātāḷāmaravāhiṇīvarajalaprīḍāsamētaḥ sadā
raṃbhākananavāṭikāviharaṇōdyuktastrayīgōcaraḥ |
phālāxō bhramarāṃbikāhr̥dayapaṅkējātapuṣpaṃdhayaḥ
śrīmatparvatamallikārjunamahādēvaḥ śivō mē gatiḥ || 8 ||
iti śrī mallikārjuna stōtram ||