śrī mahā sarasvati stavam
aśvatara uvāca
jagaddhātrīmahaṃ dēvīmārirādhayiṣuḥ śubhām |
stōṣyē praṇamya śirasā brahmayōniṃ sarasvatīm || 1 ||
sadasaddēvi yatkiñcinmōkṣavaccārthavatpadam |
tatsarvaṃ tvayyasaṃyōgaṃ yōgavaddēvi saṃsthitam || 2 ||
tvamakṣaraṃ paraṃ dēvi yatra sarvaṃ pratiṣṭhitam |
akṣaraṃ paramaṃ dēvi saṃsthitaṃ paramāṇuvat || 3 ||
akṣaraṃ paramaṃ brahma viśvañcaitatkṣarātmakam |
dāruṇyavasthitō vahnirbhāumāśca paramāṇavaḥ || 4 ||
tathā tvayi sthitaṃ brahma jagaccēdamaśēṣataḥ |
ōṃkārākṣarasaṃsthānaṃ yattu dēvi sthirāsthiram || 5 ||
tatra mātrātrayaṃ sarvamasti yaddēvi nāsti ca |
trayō lōkāstrayō vēdāstravidyaṃ pāvakatrayam || 6 ||
trīṇi jyōtīṃṣi varṇāśca trayō dharmāgamāstathā |
trayō guṇāstrayaḥ śabdastrayō vēdāstathāśramāḥ || 7 ||
trayḥ kālāstathāvasthāḥ pitarō'harniśādayaḥ |
ētanmātrātrayaṃ dēvi tava rūpaṃ sarasvati || 8 ||
vibhinndarśināmādyā brahmaṇō hi sanātanāḥ |
sōmasañsthā haviḥ sañsthāḥ pākasañsthāśca sapta yā || 9 ||
tāstvaduccāraṇāddēvi kriyantē brahmavādibhiḥ |
anirdēśyaṃ tathā cānyadardhamātrānvitaṃ param || 10 ||
avikāryakṣayaṃ divyaṃ pariṇāmavivarjitam |
tavaitatparamaṃ rūpaṃ yanna śakyaṃ mayōditum || 11 ||
na cāsyēna ca tajjihvā tāmrōṣṭhādibhirucyatē |
indrō'pi vasavō brahmā candrārkāu jyōtirēva ca || 12 ||
viśvāvāsaṃ viśvarūpaṃ viśvēśaṃ paramēśvaram |
sāṅkhyavēdāntavādōktaṃ bahuśākhāsthirīkr̥tam || 13 ||
anādimadhyanidhanaṃ sadasanna sadēva yat |
ēkaṃtvanēkaṃ nāpyēkaṃ bhavabhēdasamāśritam || 14 ||
anākhyaṃ ṣaḍguṇākhyañca vargākhyaṃ triguṇāśrayam |
nānāśaktimatāmēkaṃ śaktivāibhavikaṃ param || 15 ||
sukhāsukhaṃ mahāsāukhyarūpaṃ tvayi vibhāvyatē |
ēvaṃ dēvi tvayā vyāptaṃ sakalaṃ niṣkalañca yat |
advāitāvasthitaṃ brahma yacca dvāitē vyavasthitam || 16 ||
yē'rthā nityā yē vinaśyanti cānyē
yē vā sthūlā yē ca sūkṣmātisūkṣmāḥ |
yē vā bhūmāu yē'ntarīkṣē'nyatō vā
tēṣāṃ tēṣāṃ tvatta ēvōpalabdhiḥ || 17 ||
yaccāmūrtaṃ yacca mūrtaṃ samastaṃ
yadvā bhūtēṣvēkamēkañca kiñcit |
yaddivyasti kṣmātalē khē'nyatō vā
tvatsambandhaṃ tvatsvarāirvyañjanaiśca || 18 ||
iti śrī mārkaṇḍēyapurāṇē mahā sarasvati stavaṃ sampūrṇam ||