śrī hanumat kavacam
asya śrī hanumat kavacastōtramahāmantrasya vasiṣṭha r̥ṣiḥ anuṣṭup chandaḥ śrī hanumān dēvatā mārutātmaja iti bījaṃ añjanāsūnuriti śaktiḥ vāyuputra iti kīlakaṃ hanumatprasāda siddhyarthē japē viniyōgaḥ ||
ullaṅghya sindhōssalilaṃ salīlaṃ
yaśśōkavahniṃ janakātmajāyāḥ |
ādāya tēnaiva dadāha lārkāṃ
namāmi taṃ prāñjalirāñjanēyam || 1 ||
manōjavaṃ mārutatulyavēgaṃ
jitēndriyaṃ buddhimatāṃ variṣṭham |
vātātmajaṃ vānarayūthamukhyaṃ
śrīrāmadūtaṃ śirasā namāmi || 2 ||
udyadādityasaṅkāśaṃ udārabhujavikramam |
kandarpakōṭilāvaṇyaṃ sarvavidyāviśāradam || 3 ||
śrīrāmahr̥dayānandaṃ bhaktakalpamahīruham |
abhayaṃ varadaṃ dōrbhyāṃ kalayē mārutātmajam || 4 ||
śrīrāma rāma rāmēti ramē rāmē manōramē |
sahasranāma tattulyaṃ rāmanāma varānanē || 5 ||
pādāu vāyusutaḥ pātu rāmadūtastadaṅguḷīḥ |
guḷphāu harīśvaraḥ pātu jaṅghē cārṇavalaṅghanaḥ || 6 ||
jānunī mārutiḥ pātu ūrū pātvāsurāntakaḥ |
guhyaṃ vajratanuḥ pātu jaghanaṃ tu jagaddhitaḥ || 7 ||
āñjanēyaḥ kaṭiṃ pātu nābhiṃ sāumitrijīvanaḥ |
udaraṃ pātu hr̥dgēhī hr̥dayaṃ ca mahābalaḥ || 8 ||
vakṣō vālāyudhaḥ pātu stanāu cā'mitavikramaḥ |
pārśvāu jitēndriyaḥ pātu bāhū sugrīvamantrakr̥t || 9 ||
karāvakṣa jayī pātu hanumāṃśca tadaṅguḷīḥ |
pr̥ṣṭhaṃ bhaviṣyadrbrahmā ca skandhāu mati matāṃ varaḥ || 10 ||
kanṭhaṃ pātu kapiśrēṣṭhō mukhaṃ rāvaṇadarpahā |
vaktraṃ ca vaktr̥pravaṇō nētrē dēvagaṇastutaḥ || 11 ||
brahmāstrasanmānakarō bhruvāu mē pātu sarvadā |
kāmarūpaḥ kapōlē mē phālaṃ vajranakhō'vatu || 12 ||
śirō mē pātu satataṃ jānakīśōkanāśanaḥ |
śrīrāmabhaktapravaraḥ pātu sarvakaḷēbaram || 13 ||
māmahni pātu sarvajñaḥ pātu rātrāu mahāyaśāḥ |
vivasvadantēvāsī ca sandhyayōḥ pātu sarvadā || 14 ||
brahmādidēvatādattavaraḥ pātu nirantaram |
ya idaṃ kavacaṃ nityaṃ paṭhēcca śr̥ṇuyānnaraḥ || 15 ||
dīrghāmāyuravāpnōti balaṃ dr̥ṣṭiṃ ca vindati |
pādākrāntā bhaviṣyanti paṭhatastasya śatravaḥ |
sthirāṃ sukīrtimārōgyaṃ labhatē śāśvataṃ sukham || 16 ||
iti nigaditavākyavr̥tta tubhyaṃ
sakalamapi svayamāñjanēya vr̥ttam |
api nijajanarakṣaṇāikadīkṣō
vaśaga tadīya mahāmanuprabhāvaḥ || 17 ||
iti śrī hanumat kavacam ||