śrī gaṅgā stōtram
dēvi! surēśvari! bhagavati! gaṅgē tribhuvanatāriṇi taraḷataraṅgē |
śaṅkaramāuḷivihāriṇi vimalē mama matirāstāṃ tava padakamalē || 1 ||
bhāgīrathisukhadāyini mātastava jalamahimā nigamē khyātaḥ |
nāhaṃ jānē tava mahimānaṃ pāhi kr̥pāmayi māmājñānam || 2 ||
haripadāpādyataraṅgiṇi gaṅgē himavidhumuktādhavāḷataraṅgē |
dūrīkuru mama duṣkr̥tibharaṃ kuru kr̥payā bhavasāgarapāram || 3 ||
tava jalamamalaṃ yēna nipītaṃ paramapadaṃ khalu tēna gr̥hītam |
mātargaṅgē tvayi yō bhaktaḥ kila taṃ draṣṭuṃ na yamaḥ śaktaḥ || 4 ||
patitōddhāriṇi jāhnavi gaṅgē khaṇḍita girivaramanḍita bhaṅgē |
bhīṣmajanani hē munivarakanyē patitanivāriṇi tribhuvana dhanyē || 5 ||
kalpalatāmiva phaladāṃ lōkē praṇamati yastvāṃ na patati śōkē |
pāravāravihāriṇi gaṅgē vimukhayuvati kr̥tataraḷāpāṅgē || 6 ||
tava cēnmātaḥ srōtaḥ snātaḥ punarapi jaṭharē sōpi na jātaḥ |
narakanivāriṇi jāhnavi gaṅgē kaluṣavināśini mahimōttuṅgē || 7 ||
punarasadaṅgē puṇyataraṅgē jaya jaya jāhnavi karuṇāpāṅgē |
indramukuṭamaṇirājitacaraṇē sukhadē śubhadē bhr̥tyaśaraṇyē || 8 ||
rōgaṃ śōkaṃ tāpaṃ pāpaṃ hara mē bhagavati kumatikalāpam |
tribhuvanasārē vasudhāhārē tvamasi gatirmama khalu saṃsārē || 9 ||
alākānandē paramānandē kuru karuṇāmayi kātaravandyē |
tava taṭanikaṭē yasya nivāsaḥ khalu vaikuṇṭhē tasya nivāsaḥ || 10 ||
varamiha nīrē kamaṭhō mīnaḥ kiṃ vā tīrē śaraṭaḥ kṣīṇaḥ |
athavāśvapacō malinō dīnastava na hi dūrē nr̥patikulīnaḥ || 11 ||
bhō bhuvanēśvari puṇyē dhanyē dēvi dravamayi munivarakanyē |
gaṅgāstavamimamamalaṃ nityaṃ paṭhati narō yaḥ sa jayati satyam || 12 ||
yēṣāṃ hr̥dayē gaṅgā bhaktistēṣāṃ bhavati sadā sukhamuktiḥ |
madhurākantā pañjhaṭikābhiḥ paramānandakalitalalitābhiḥ || 13 ||
gaṅgāstōtramidaṃ bhavasāraṃ vāñchitaphaladaṃ vimalaṃ sāram |
śaṅkarasēvaka śaṅkara racitaṃ paṭhati sukhīḥ tava iti ca samāptaḥ || 14 ||
iti śrī gaṅgā stōtram sampūrṇam ||