Sri Ganesha Ashtakam
gaṇapatiparivāraṃ cāru-kēyūra-hāraṃ
giridhara-vara-sāraṃ yōginī-cakra-cāram |
bhavabhaya-parihāraṃ duḥkha-dāridrya-dūraṃ
gaṇapatim-abhivandē vakratuṇḍāvatāram || 1 ||
akhila-mala-vināśaṃ pāṇinā hasta-pāśaṃ
kanakagiri-nikāśaṃ sūryakōṭi-prakāśam |
bhaja bhavagiri-nāśaṃ mālatī-tīra-vāsaṃ
gaṇapatim-abhivandē mānasē rājahaṃsam || 2 ||
vividha-maṇi-mayūkhaiḥ śōbhamānaṃ vidūraiḥ
kanaka-racita-citraṃ kaṇṭhadēśē vicitram |
dadhati vimala-hāraṃ sarvadā yatnasāraṃ
gaṇapatim-abhivandē vakratuṇḍāvatāram || 3 ||
duritaga-jamamandaṃ vāruṇīṃ caiva vēdaṃ
viditamakhila-nādaṃ nṛtya-mānanda-kandam |
dadhati śaśi-suvaktraṃ cāṅkuśaṃ yō viśēṣaṃ
gaṇapatim-abhivandē sarvadānanda-kandam || 4 ||
trinayana-yutaphālē śōbhamānē viśālē
mukuṭamaṇisuḍhālē mauktikānāṃ ca jālē |
dhavaḷa-kusuma-mālē yasya śīrṣṇaḥ satālē
gaṇapatim-abhivandē sarvadā cakrapāṇim || 5 ||
vapuṣi mahati rūpaṃ pīṭha-mādau sudīpaṃ
tadupari rasakōṇaṃ tasya cōrdhvaṃ trikōṇam |
gajamita-dala-padmaṃ saṃsthitaṃ cāru-chadmaṃ
gaṇapatim-abhivandē kalpavṛkṣasya vṛndē || 6 ||
varada-viśada-śastaṃ dakṣiṇaṃ yasya hastaṃ
sadayam-abhaya-daṃ taṃ cintayē cittasaṃstham |
śabala-kuṭila-śuṇḍaṃ caika-tuṇḍaṃ dvi-tuṇḍaṃ
gaṇapatim-abhivandē sarvadā vakratuṇḍam || 7 ||
kalpadrumā-dhaḥ sthitakāmadhēnuṃ
cintāmaṇiṃ dakṣiṇa-pāṇi-śuṇḍam |
bibhrāṇam-atyadbhuta citra-rūpaṃ
yaḥ pūjayēttasya samasta-siddhiḥ || 8 ||
Phalaśruti:
vyāsāṣṭakamidaṃ puṇyaṃ gaṇēśa-stavanaṃ nṛṇām |
paṭhatāṃ duḥkha-nāśāya vidyāṃ saśriyam-aśnutē || 9 ||
iti śrī padmapurāṇē uttarakhaṇḍē vyāsaviracitaṃ gaṇēśāṣṭakam |