Sri Ganapati Stotram
jētuṃ yastripuraṃ harēṇa hariṇā vyājādbaliṃ badhnatā
straṣṭuṃ vāribhavōdbhavēna bhuvanaṃ śēṣēṇa dhartuṃ dharam |
pārvatyā mahiṣāsurapramathanē siddhādhipaiḥ siddhayē
dhyātaḥ pañcaśarēṇa viśvajitayē pāyāt sa nāgānanaḥ || 1 ||
vighnadhvāntanivāraṇaikataraṇirvighnāṭavīhavyavāṭ
vighnavyālukulābhimānagaruḍō vighnēbhapañcānanaḥ |
vighnōttuṅgagiriprabhēdanapavirvighnāmbudhērvāḍavō
vighnāghaudhaghanapracaṇḍapavanō vighnēśvaraḥ pātu naḥ || 2 ||
kharvaṃ sthūlatanuṃ gajēndravadhanaṃ lambōdharaṃ sundaraṃ
prasyandanmadagandhalubdhamadhupavyālōlagaṇḍasthalam |
dhantāghātavidāritārirudhiraiḥ sindūraśōbhākaraṃ
vandē śailasutāsutaṃ gaṇapatiṃ siddhipradaṃ kāmadam || 3 ||
gajānanāya mahasē pratyūhatimiracchidē |
apārakaruṇāpūrataraṅgitadṛśē namaḥ || 4 ||
agajānanapadmārkaṃ gajānanamaharniśam |
anēkadaṃ taṃ bhaktānāmēkadantamupāsmahē || 5 ||
śvētāṅgaṃ śvētavastraṃ sitakusumagaṇaiḥ pūjitaṃ śvētagandhaiḥ
kṣīrābdhau ratnadīpaiḥ suranaratilakaṃ ratnasiṃhāsanastham |
dōrbhiḥ pāśāṅkuśābjābhayavaramanasaṃ candramauliṃ trinētraṃ
hyāyēcchāntyarthamīśaṃ gaṇapatimamalaṃ śrīsamētaṃ prasannam || 6 ||
āvāhayē taṃ gaṇarājadēvaṃ raktōtpalābhāśamaśēṣavandyam |
vighnāntakaṃ vighnaharaṃ gaṇēśaṃ bhajāmi raudraṃ sahitaṃ ca siddhyā || 7 ||
yaṃ brahma vēdāntavidō vadanti paraṃ pradhānaṃ puruṣaṃ tathā’nyē |
viśvōdgatēḥ kāraṇamīśvaraṃ vā tasmai namō vighnavināśanāya || 8 ||
vighnēśa vīryāṇi vicitrakāṇi vandījanairmāgadhakaiḥ smṛtāni |
śrutvā samuttiṣṭha gajānana tvaṃ brāhmē jaganmaṅgalakaṃ kuruṣva || 9 ||
gaṇēśa hēramba gajānanēti mahōdhara svānubhavaprakāśin |
variṣṭha siddhipriya buddhinātha vadanta ēvaṃ tyajata prabhītīḥ || 10 ||
anēkavighnāntaka vakratuṇḍa svasaṃjñavāsiṃśca caturbhujēti |
kavīśa dēvāntakanāśakārin vadanta ēvaṃ tyajata prabhītīḥ || 11 ||
anantacidrūpamayaṃ gaṇēśaṃ hyabhēdabhēdādivihīnamādyam |
hṛdi prakāśasya dharaṃ svadhīsthaṃ tamēkadantaṃ śaraṇaṃ vrajāmaḥ || 12 ||
viśvādibhūtaṃ hṛdi yōgināṃ vai pratyakṣarūpēṇa vibhāntamēkam |
sadā nirālambasamādhigamyaṃ tamēkadantaṃ śaraṇaṃ vrajāmaḥ || 13 ||
yadīyavīryēṇa samarthabhūtā māyā tayā saṃracitaṃ ca viśvam |
nāgātmakaṃ hyātmatayā pratītaṃ tamēkadantaṃ śaraṇaṃ vrajāmaḥ || 14 ||
sarvāntarē saṃsthitamēkamūḍhaṃ yadājñayā sarvamidaṃ vibhāti |
anantarūpaṃ hṛdi bōdhakaṃ vai tamēkadantaṃ śaraṇaṃ vrajāmaḥ || 15 ||
yaṃ yōginō yōgabalēna sādhyaṃ kurvanti taṃ kaḥ stavanēna nauti |
ataḥ praṇāmēna susiddhidō’stu tamēkadantaṃ śaraṇaṃ vrajāmaḥ || 16 ||
dēvēndramaulimandāramakarandakaṇāruṇāḥ |
vighnān harantu hērambacaraṇāmbujarēṇavaḥ || 17 ||
ēkadantaṃ mahākāyaṃ lambōdaragajānanam |
vighnanāśakaraṃ dēvaṃ hērambaṃ praṇamāmyaham || 18 ||
yadakṣara pada bhraṣṭaṃ mātrāhīnaṃ ca yadbhavēt |
tatsarvaṃ kṣamyatāṃ dēva prasīda paramēśvara || 19 ||
iti śrī gaṇapati stōtraṃ sampūrṇam |