Sri Ekadanta Stotram
gr̥tsamada uvāca |
madāsuraṃ suśāntaṃ vai dr̥ṣṭvā viṣṇumukhāḥ surāḥ |
bhṛgvādayaśca yōgīndrā ēkadantaṃ samāyayūḥ || 1 ||
praṇamya taṃ prapūjyā’dō punastē nēmurādarāt |
tuṣṭuvurharṣasaṃyuktā ēkadantaṃ gajānanam || 2 ||
dēvarṣaya ūcuḥ |
sadātmarūpaṃ sakalādibhūta- mamāyinaṃ sō’hamacintyabōdham |
athādimadhyāntavihīnamēkaṃ tamēkadantaṃ śaraṇaṃ vrajāmaḥ || 3 ||
anantacidrūpamayaṃ gaṇēśam-abhēdabhēdādivihīnamādyam |
hr̥di prakāśasya dharaṃ svadhīsthaṃ tamēkadantaṃ śaraṇaṃ vrajāmaḥ || 4 ||
samādhisaṃsthaṃ hr̥di yōgināṃ tu prakāśarūpēṇa vibhāntamēvam |
sadā nirālambasamādhigamyaṃ tamēkadantaṃ śaraṇaṃ vrajāmaḥ || 5 ||
svabimbabhāvēna vilāsayuktaṃ prakṛtya māyāṃ vividhasvarūpam |
suvīryakaṃ tatra dadāti yō vai tamēkadantaṃ śaraṇaṃ vrajāmaḥ || 6 ||
yadīya vīryēṇa samarthabhūtaṃ svamāyayā saṃracitaṃ ca viśvam |
turīyakaṃ hyātmakavittisaṃjñaṃ tamēkadantaṃ śaraṇaṃ vrajāmaḥ || 7 ||
tvadīyasattādharamēkadantaṃ guṇēśvaraṃ yaṃ guṇabōdhitāram |
bhajanta ādyaṃ tamajaṃ trisaṃsthā-stamēkadantaṃ śaraṇaṃ vrajāmaḥ || 8 ||
tatastvayā prēritanādakēna suṣuptisaṃjñaṃ racitaṃ jagadvai |
samānarūpaṃ ca tathaikabhūtaṃ tamēkadantaṃ śaraṇaṃ vrajāmaḥ || 9 ||
tadēva viśvaṃ kr̥payā prabhūtaṃ dvibhāvamādau tamasā vibhātam |
anēkarūpaṃ ca tathaikabhūtaṃ tamēkadantaṃ śaraṇaṃ vrajāmaḥ || 10 ||
tatastvayā prēritakēna sṛṣṭaṃ susūkṣmabhāvaṃ jagadēkasaṃstham |
susāttvikaṃ svapnamanantamādyaṃ tamēkadantaṃ śaraṇaṃ vrajāmaḥ || 11 ||
tat svapnamēvaṃ tapasā gaṇēśa susiddhirūpaṃ dvividhaṃ babhūva |
sadaikarūpaṃ kr̥payā ca tē ya-ttamēkadantaṃ śaraṇaṃ vrajāmaḥ || 12 ||
tvadājñayā tēna sadā hr̥distha tathā susṛṣṭaṃ jagadaṃśarūpam |
vibhinnajāgranmayamapramēyaṃ tamēkadantaṃ śaraṇaṃ vrajāmaḥ || 13 ||
tadēva jāgradrajasā vibhātaṃ vilōkitaṃ tvatkr̥payā smr̥tēśca |
babhūva bhinnaṃ ca sadaikarūpaṃ tamēkadantaṃ śaraṇaṃ vrajāmaḥ || 14 ||
tadēva sṛṣṭvā prakṛtisvabhāvā-ttadantarē tvaṃ ca vibhāsi nityam |
dhiyaḥ pradātā gaṇanātha ēka-stamēkadantaṃ śaraṇaṃ vrajāmaḥ || 15 ||
sarvē grahā bhāni yadājñayā ca prakāśarūpāṇi vibhānti khē vai |
bhramanti nityṃ svavihārakāryā-ttamēkadantaṃ śaraṇaṃ vrajāmaḥ || 16 ||
tvadājñayā sṛṣṭikarō vidhātā tvadājñayā pālaka ēva viṣṇuḥ |
tvadājñayā saṃharakō harō vai tamēkadantaṃ śaraṇaṃ vrajāmaḥ || 17 ||
yadājñayā bhūstu jalē prasaṃsthā yadājñayā’paḥ pravahanti nadyaḥ |
svatīrasaṃsthaśca kr̥taḥ samudra-stamēkadantaṃ śaraṇaṃ vrajāmaḥ || 18 ||
yadājñayā dēvagaṇā divisthā yacchanti vai karmaphalāni nityam |
yadājñayā śailagaṇāḥ sthirā vai tamēkadantaṃ śaraṇaṃ vrajāmaḥ || 19 ||
yadājñayā śēṣa ilādharō vai yadājñayā mōhada ēva kāmaḥ |
yadājñayā kāladharō’ryamā ca tamēkadantaṃ śaraṇaṃ vrajāmaḥ || 20 ||
yadājñayā vāti vibhāti vāyu-ryadājñayā’gnirjaṭharādisaṃsthaḥ |
yadājñayēdaṃ sacarācaraṃ ca tamēkadantaṃ śaraṇaṃ vrajāmaḥ || 21 ||
tadantarikṣaṃ sthitamēkadantaṃ tvadājñayā sarvamidaṃ vibhāti |
anantarūpaṃ hr̥di bōdhakaṃ tvāṃ tamēkadantaṃ śaraṇaṃ vrajāmaḥ || 22 ||
suyōginō yōgabalēna sādhyaṃ prakurvatē kaḥ stavanē samarthaḥ |
ataḥ praṇāmēna susiddhidō’stu tamēkadantaṃ śaraṇaṃ vrajāmaḥ || 23 ||
gr̥tsamada uvāca |
ēvaṃ stutvā gaṇēśānaṃ dēvāḥ samunayaḥ prabhum |
tūṣṇīṃ bhāvaṃ prapadyēiva nanr̥turharṣasaṃyutāḥ || 24 ||
sa tānūvāca prītātmā dēvarṣīṇāṃ stavēna vai |
ēkadantō mahābhāgān dēvarṣīn bhaktavatsalaḥ || 25 ||
ēkadanta uvāca |
stōtrēṇāhaṃ prasannō’smi surāḥ sarṣigaṇāḥ khalu |
vṛṇudhvaṃ varadō’haṃ vō dāsyāmi manasīpsitam || 26 ||
bhavatkr̥taṃ madīyaṃ yat stōtraṃ prītipradaṃ ca tat |
bhaviṣyati na sandēhaḥ sarvasiddhipradāyakam || 27 ||
yadyadicchati tattadvai prāpnōti stōtrapāṭhakaḥ |
putrapautrādikaṃ sarvaṃ kalatraṃ dhanadhānyakam || 28 ||
gajāśvādikamatyantaṃ rājyabhōgādikaṃ dhrruvam |
bhuktiṃ muktiṃ ca yōgaṃ vai labhatē śāntidāyakam || 29 ||
māraṇōccāṭanādīni rājyabandhādikaṃ ca yat |
paṭhatāṃ śr̥ṇvatāṃ nṛṇāṃ bhavēttadbandhahīnatā || 30 ||
ēkaviṃśativāraṃ yaḥ ślōkānēvaikaviṃśatim |
paṭhēdvai hr̥di māṃ smr̥tvā dināni tvēkaviṃśatim || 31 ||
na tasya durlabhaṃ kiñcittriṣu lōkēṣu vai bhavēt |
asādhyaṃ sādhayēnmartyaḥ sarvatra vijayī bhavēt || 32 ||
nityaṃ yaḥ paṭhati stōtraṃ brahmībhūtaḥ sa vai naraḥ |
tasya darśanataḥ sarvē dēvāḥ pūtā bhavanti ca || 33 ||
ēvaṃ tasya vacaḥ śr̥tvā prahr̥ṣṭā amararṣayaḥ |
ūcuḥ sarvē karapuṭairbhaktyā yuktā gajānanam || 34 ||