śrī durgāṣṭakam
kātyāyani mahāmāyē khaḍgabāṇadhanurdharē |
khaḍgadhāriṇi caṇḍi durgādēvi namōstutē || 1 ||
vasudēvasutē kāli vāsudēvasahōdarī |
vasundharāśriyē nandē durgādēvi namōstutē || 2 ||
yōganidrē mahānidrē yōgamāyē mahēśvarī |
yōgasiddhikarī śuddhē durgādēvi namōstutē || 3 ||
śaṅkhacakragadāpāṇē śārṅgajyāyatabāhavē |
pītāmbaradharē dhanyē durgādēvi namōstutē || 4 ||
r̥gyajussāmātharvāṇaścatussāmantalōkinī |
brahmasvarūpiṇi brāhmi durgādēvi namōstutē || 5 ||
vr̥ṣṇīnāṃ kulasambhūtē viṣṇunāthasahōdarī |
vr̥ṣṇirūpadharē dhanyē durgādēvi namōstutē || 6 ||
sarvajñē sarvagē śarvē sarvēśē sarvasākṣiṇī |
sarvāmr̥tajaṭābhārē durgādēvi namōstutē || 7 ||
aṣṭabāhu mahāsattvē aṣṭamī navamī priyē |
aṭṭahāsapriyē bhadrē durgādēvi namōstutē || 8 ||
Phalaśruti:
durgāṣṭakamidaṃ puṇyaṃ bhaktitō yaḥ paṭhēnnaraḥ |
sarvakāmamavāpnōti durgālōkaṃ sa gacchati ||
iti śrī durgāṣṭakam |