śrī dharmaśāstā pañcakam
pādāravindabhaktalōkapālanāikalōlupaṃ
sadārapārśvamātmajādimōdakaṃ surādhipaṃ |
udāramādināthabhūtanāthamadbhutātmavaibhavaṃ
sadā ravīndukuṇḍalaṃ namāmi bhāgyasambhavaṃ || 1 ||
kr̥pākaṭākṣavīkṣaṇaṃ vibhūtivētrabhūṣaṇaṃ
supāvanaṃ sanātanādisatyadharmapōṣaṇaṃ |
apāraśaktiyuktamātmalakṣaṇaṃ sulakṣaṇaṃ
prabhāmanōharaṃ harīśabhāgyasambhavaṃ bhajē || 2 ||
mr̥gāsanaṃ varāsanaṃ śarāsanaṃ mahāujasaṃ
jagaddhitaṃ samastabhaktacittaraṅgasaṃsthitaṃ |
nagādhirājarājayōgapīṭhamadhyavartinaṃ
mr̥gāṅkaśēkharaṃ harīśabhāgyasambhavaṃ bhajē || 3 ||
samastalōkacintitapradaṃ sadā sukhapradaṃ
samutthitāpadandhakārakr̥ntanaṃ prabhākaram |
amartyanr̥ttagītavādyalālasaṃ madālasaṃ
namaskarōmi bhūtanāthamādidharmapālakam || 4 ||
carācarāntarasthita prabhāmanōhara prabhō
surāsurārcitāṅghripādapadma bhūtanāyaka |
virājamānavaktra bhaktamitra vētraśōbhita
harīśabhāgyajāta sādhupārijāta pāhi mām || 5 ||
iti śrī dharmaśāstā pañcakam ||