śrī dhanalakṣmī stōtram
śrī dhanadā uvāca |
dēvī dēvamupāgamya nīlakaṇṭhaṃ mama priyam |
kṛpayā pārvatī prāha śaṅkaraṃ karuṇākaram || 1 ||
śrī dēvyuvāca |
brūhi vallabha sādhūnāṃ daridrāṇāṃ kuṭumbinām |
daridradalanōpāyamañjasaiva dhanapradam || 2 ||
śrī śiva uvāca |
pūjayan pārvatīvākyamidamāha mahēśvaraḥ |
ucitaṃ jagadhambāsi tava bhūtānukampayā || 3 ||
sa sītaṃ sānujāṃ rāmaṃ sāñjanēyaṃ sahānugam |
praṇamya paramānandaṃ vakṣyē’haṃ stōtramuttamam || 4 ||
dhanadaṃ śraddadhānānāṃ sadyaḥ sulabhakārakam |
yōgakṣēmakaraṃ satyaṃ satyamēva vacō mama || 5 ||
paṭhantaḥ pāṭhayantō’pi brāhmaṇairāstikōttamaiḥ |
dhanalābhō bhavēdāśu nāśamēti daridratā || 6 ||
bhūbhavāṃśabhavāṃ bhūtyai bhaktikalpalatāṃ śubhām |
prārthayēttāṃ yathākāmaṃ kāmadhēnusvarūpiṇīm || 7 ||
dhanadē dharmadē dēvi dānaśīlē dayākarē |
tvaṃ prasīda mahēśāni yadarthaṃ prārthayāmyaham || 8 ||
dharā’marapriyē puṇyē dhanyē dhanadapūjitē |
sudhanaṃ dhārmikē dēhi yajamānāya satvaram || 9 ||
ramyē rudrapriyē rūpē rāmarūpē ratipriyē |
śikhīsakhamanōmūrtē prasīda praṇatē mayi || 10 ||
āraktacaraṇāmbhōjē siddhisarvārthadāyikē |
divyāmbaradharē divyē divyamālyānuśōbhitē || 11 ||
samastaguṇasampannē sarvalakṣaṇalakṣitē |
śaraccandramukhē nīlē nīlanīrajalōcanē || 12 ||
cañcarīka camū cāru śrīhāra kuṭilālakē |
mattē bhagavatī mātaḥ kalakaṇṭharavāmṛtē || 13 ||
hāsā’valōkanairdivyairbhaktacintāpahārikē |
rūpa lāvaṇya tāruṇya kāruṇya guṇabhājanē || 14 ||
kvaṇatkaṅkaṇamañjīrē lasallīlākarāmbhōjē |
rudraprakāśitē tattvē dharmādhārē dharālayē || 15 ||
prayaccha yajamānāya dhanaṃ dharmaiikasādhanam |
mātastvaṃ mē’vilambēna diśasva jagadhambikē || 16 ||
kṛpayā karuṇāgārē prārthitaṃ kuru mē śubhē |
vasudhē vasudhārūpē vasuvāsavavanditē || 17 ||
dhanadē yajamānāya varadē varadā bhava |
brahmaṇyairbrāhmaṇaiḥ pūjyē pārvatīśivaśaṅkarē || 18 ||
stōtraṃ daridratāvyādhiśamanaṃ sudhanapradam |
śrīkarē śaṅkarē śrīdē prasīda mayi kiṅkarē || 19 ||
pārvatīśaprasādēna surēśakiṅkarēritam |
śraddhayā yē paṭhiṣyanti pāṭhayiṣyanti bhaktitaḥ || 20 ||
sahasramayutaṃ lakṣaṃ dhanalābhō bhavēddhruvam |
dhanadāya namastubhyaṃ nidhipadmādhipāya ca |
bhavantu tvatprasādānmē dhanadhānyādisampadaḥ || 21 ||
iti śrī dhanalakṣmī stōtram |