Sri Dakshinamurthy Stotram
Shanti Patha
ōṃ yō brahmāṇaṃ vidadhāti pūrvaṃ
yō vai vēdāṃśchapra hiṇōti tasmai |
taṃ ha dēvamātmabuddhiprakāśaṃ
mumukṣurvai śaraṇamahaṃ prapadyē ||
Dhyanam
maunavyākhyā prakaṭita parabrahmatattvaṃ yuvānaṃ
varṣiṣṭhāntē vasadṛṣigaṇairāvṛtaṃ brahmaniṣṭhaiḥ |
āchāryēndraṃ karakalita chinmudramānandamūrtiṃ
svātmārāmaṃ muditavadanaṃ dakṣiṇāmūrtimīḍē || 1 ||
vaṭaviṭapisamīpē bhūmibhāgē niṣaṇṇaṃ
sakalamunijanānāṃ jñānadātāramārāt |
tribhuvanagurumīśaṃ dakṣiṇāmūrtidēvaṃ
jananamaraṇaduḥkhachChēdadakṣaṃ namāmi || 2 ||
chitraṃ vaṭatarōrmūlē vṛddhāḥ śiṣyā gururyuvā |
gurōstu maunaṃ vyākhyānaṃ śiṣyāstuchChinnasaṃśayāḥ || 3 ||
nidhayē sarvavidyānāṃ bhiṣajē bhavarōgiṇām |
guravē sarvalōkānāṃ dakṣiṇāmūrtayē namaḥ || 4 ||
ōṃ namaḥ praṇavārthāya śuddhajñānaikamūrtayē |
nirmalāya praśāntāya dakṣiṇāmūrtayē namaḥ || 5 ||
chidghanāya mahēśāya vaṭamūlanivāsinē |
sachchidānandarūpāya dakṣiṇāmūrtayē namaḥ || 6 ||
īśvarō gururātmēti mūrtibhēdavibhāginē |
vyōmavadvyāptadēhāya dakṣiṇāmūrtayē namaḥ || 7 ||
ōṃ śāntiḥ śāntiḥ śāntiḥ || 8 ||
Stotram
viśvaṃ darpaṇa-dṛśyamāna-nagarī tulyaṃ nijāntargataṃ
paśyannātmani māyayā bahirivōdbhūtaṃ yathā nidrayā |
ya-ssākṣātkurutē prabōdhasamayē svātmānamē-vādvayaṃ
tasmai śrīgurumūrtayē nama idaṃ śrī dakṣiṇāmūrtayē || 1 ||
bījasyāntari-vāṅkurō jagadidaṃ prāṅnirvikalpaṃ punaḥ
māyākalpita dēśakālakalanā vaichitryachitrīkṛtam |
māyāvīva vijṛmbhayatyapi mahāyōgīva yaḥ svēchChayā
tasmai śrīgurumūrtayē nama idaṃ śrī dakṣiṇāmūrtayē || 2 ||
yasyaiva sphuraṇaṃ sadātmakamasatkalpārthakaṃ bhāsatē
sākṣāttattvamasīti vēdavachasā yō bōdhayatyāśritān |
yatsākṣātkaraṇādbhavēnna punarāvṛttirbhavāmbhōnidhau
tasmai śrīgurumūrtayē nama idaṃ śrī dakṣiṇāmūrtayē || 3 ||
nānāchChidra ghaṭōdara sthita mahādīpa prabhābhāsvaraṃ
jñānaṃ yasya tu chakṣurādikaraṇa dvārā bahiḥ spandatē |
jānāmīti tamēva bhāntamanubhātyētatsamastaṃ jagat
tasmai śrī gurumūrtayē nama idaṃ śrī dakṣiṇāmūrtayē || 4 ||
dēhaṃ prāṇamapīndriyāṇyapi chalāṃ buddhiṃ cha śūnyaṃ viduḥ
strī bālāndha jaḍōpamāstvahamiti bhrāntābhṛśaṃ vādinaḥ |
māyāśakti vilāsakalpita mahāvyāmōha saṃhāriṇē
tasmai śrī gurumūrtayē nama idaṃ śrī dakṣiṇāmūrtayē || 5 ||
rāhugrasta divākarēndu sadṛśō māyā samāchChādanāt
sanmātraḥ karaṇōpasaṃharaṇatō yō'bhūtsuṣuptaḥ pumān |
prāgasvāpsamiti prabōdhasamayē yaḥ pratyabhijñāyatē
tasmai śrī gurumūrtayē nama idaṃ śrī dakṣiṇāmūrtayē || 6 ||
bālyādiṣvapi jāgradādiṣu tathā sarvāsvavasthāsvapi
vyāvṛttā-svanuvartamāna-mahamityantaḥ sphurantaṃ sadā |
svātmānaṃ prakaṭīkarōti bhajatāṃ yō mudrayā bhadrayā
tasmai śrī gurumūrtayē nama idaṃ śrī dakṣiṇāmūrtayē || 7 ||
viśvaṃ paśyati kāryakāraṇatayā svasvāmisambandhataḥ
śiṣyāchāryatayā tathaiva pitṛ putrādyātmanā bhēdataḥ
svapnē jāgrati vā ya ēṣa puruṣō māyā paribhrāmitaḥ
tasmai śrī gurumūrtayē nama idaṃ śrī dakṣiṇāmūrtayē || 8 ||
bhūrambhāṃsyanalō'nilō'mbara-maharnāthō himāṃśuḥ pumān
ityābhāti charācharātmakamidaṃ yasyaiva mūrtyaṣṭakam |
nānyatkiñchana vidyatē vimṛśatāṃ yasmātparasmādvibhōḥ
tasmai śrī gurumūrtayē nama idaṃ śrī dakṣiṇāmūrtayē || 9 ||
sarvātmatvamiti sphuṭīkṛtamidaṃ yasmādamuṣmin stavē
tēnāsya śravaṇāttadartha mananāddhyānāchcha saṅkīrtanāt |
sarvātmatva mahāvibhūtisahitaṃ syādīśvaratvaṃ svataḥ
siddhyēttatpunaraṣṭadhā pariṇataṃ chaiśvarya-mavyāhatam || 10 ||
iti śrīmachChaṅkarāchāryavirachitaṃ dakṣiṇāmūrtistōtraṃ sampūrṇam