śrī akhilāṇḍēśvarī stōtram
ōṃkārārṇavamadhyagē tripathagē ōṃkārabījātmikē
ōṃkārēṇa sukhapradē śubhakarē ōṃkārabindupriyē |
ōṃkārē jagadaṃbikē śaśikalē ōṃkārapīṭhasthitē
dāsō'haṃ tava pādapadmayugaḷaṃ vandē akhilāṇḍēśvari || 1 ||
hrīṃkārārṇavavarṇamadhyanilayē hrīṃkāravārṇātmikē |
hrīṃkārābdhisucārucāndrakadharē hrīṃkāranādapriyē |
hrīṃkārē tripurēśvarī sucaritē hrīṃkārapīṭhasthitē
dāsō'haṃ tava pādapadmayugaḷaṃ vandē akhilāṇḍēśvari || 2 ||
śrīcakrāṅkitabhūṣaṇōjjvalamukhē śrīrājarājēśvari
śrīkaṇṭhārdhaśarīrabhāganilayē śrījambunāthapriyē |
śrīkāntasya sahōdarē sumanasē śrībindupīṭhapriyē
dāsō'haṃ tava pādapadmayugaḷaṃ vandē akhilāṇḍēśvari || 3 ||
kastūrītilakōjjvalē kaliharē klīṃkārabījātmikē
kalyāṇī jagadīśvarī bhagavatī kādaṃbavāsapriyē |
kāmākṣī sakalēśvarī śubhakarē klīṃkārapīṭhasthitē
dāsō'haṃ tava pādapadmayugaḷaṃ vandē akhilāṇḍēśvari || 4 ||
nādē nāradatuṃburādivinutē nārāyaṇī maṅgaḷē
nānālaṅkr̥tahāranūpuradharē nāsāmaṇībhāsurē |
nānābhaktasupūjyapādakamalē nāgārimadhyasthalē
dāsō'haṃ tava pādapadmayugaḷaṃ vandē akhilāṇḍēśvari || 5 ||
śyāmāṅgī śaradindukōṭivadanē siddhāntamārgapriyē
śāntē śāradavigrahē śubhakarē śāstrādiṣaḍdarśanē |
śarvāṇī paramātmikē paraśivē pratyakṣasiddhipradē
dāsō'haṃ tava pādapadmayugaḷaṃ vandē akhilāṇḍēśvari || 6 ||
māṅgaḷyē madhurapriyē madhumatī māṅgaḷyasūtrōjjvalē
māhātmyaśravaṇē sutē sutamayī māhēśvarī cinmayi |
māndhāt r̥pramukhādipūjitapadē mantrārthasiddhipradē
dāsō'haṃ tava pādapadmayugaḷaṃ vandē akhilāṇḍēśvari || 7 ||
tattvē tattvamayī parātparamayī jyōtirmayī cinmayi
nādē nādamayī sadāśivamayī tattvārthasārātmikē |
śabdabrahmamayī carācaramayī vēdāntarūpātmikē
dāsō'haṃ tava pādapadmayugaḷaṃ vandē akhilāṇḍēśvari || 8 ||
kādaṃbavr̥kṣamūlē tvaṃ vāsinī śubhadhāriṇī |
dharādharasutē dēvi maṅgaḷaṃ kuru śaṅkari || 9 ||
Phalaśruti:
dhyātvā tvāṃ dēvi daśakaṃ yē paṭhanti bhr̥gōrdinē |
tēṣāṃ ca dhanamāyuṣyamārōgyaṃ putrasaṃpadaḥ || 10 ||
iti śrī akhilāṇḍēśvarī stōtram |