Sharabhesha Ashtakam
śrī śiva uvāca
śṛṇu dēvi mahāguhyaṃ paraṃ puṇyavivardhanam |
śarabheśāṣṭakaṃ mantraṃ vakṣyāmi tava tattvataḥ ||
ṛṣinyāsādikaṃ yattatsarvapūrvavadācarēt |
dhyānabhēdaṃ viśēṣēṇa vakṣyāmyahamatas śivē ||
dhyānam
jvalanakuṭilakēśaṃ sūryacandrāgninētraṃ
niśitatharanakhāgrōddhūtahēmābhadeham |
śarabhamatha munīndraiḥ sēvyamānaṃ sitāṅgaṃ
praṇatabhayavināśaṃ bhāvayētpakṣirājam ||
atha stōtram
dēvādidevāya jaganmayāya śivāya nālīkanibhānanāya |
śarvāya bhīmāya śarādhipāya namō’stu tubhyaṃ śarabheśvarāya || 1 ||
harāya bhīmāya haripriyāya bhavāya śāntāya parātparāya |
mṛḍāya rudrāya vilōcanāya namō’stu tubhyaṃ śarabheśvarāya || 2 ||
śītāṃśucūḍāya digambarāya sṛṣṭisthitidhvaṃsanakāraṇāya |
jaṭākalāpāya jitēndriyāya namō’stu tubhyaṃ śarabheśvarāya || 3 ||
kalaṅkakaṇṭhāya bhavāntakāya kapālaśūlāttakarāmbujāya |
bhujangabhūṣāya purāntakāya namō’stu tubhyaṃ śarabheśvarāya || 4 ||
śamādiṣaṭkāya yamāntakāya yamādiyōgāṣṭakasiddhidāya |
umādhināthāya purātanāya namō’stu tubhyaṃ śarabheśvarāya || 5 ||
ghṛṇādipāśāṣṭakavarjitāya khilīkṛtāsmatpathi pūrvagāya |
guṇādihīnāya guṇatrayāya namō’stu tubhyaṃ śarabheśvarāya || 6 ||
kālāya vēdāmṛtakandalāya kalyāṇakautūhalakāraṇāya |
sthūlāya sūkṣmāya svarūpagāya namō’stu tubhyaṃ śarabheśvarāya || 7 ||
pañcānanāyānilabhāskarāya pañcāśadarṇādyaparākṣayāya |
pañcākṣarēśāya jagaddhitāya namō’stu tubhyaṃ śarabheśvarāya || 8 ||
iti śrī śarabheśāṣṭakam ||