Sankata Nashana Ganesha Stotram
praṇamya śirasā dēvaṃ gaurīputraṃ vināyakam |
bhaktāvāsaṃ smarēnnityaṃ āyuṣkāmārthasiddhayē || 1 ||
prathamaṃ vakratuṇḍaṃ ca ēkadantaṃ dvitīyakam |
tṛtīyaṃ kṛṣṇapiṅgākṣaṃ gajavaktraṃ caturthakam || 2 ||
lambōdaraṃ pañcamaṃ ca ṣaṣṭhaṃ vikaṭamēva ca |
saptamaṃ vighnarājaṃ ca dhūmravarṇaṃ tathāṣṭakam || 3 ||
navamaṃ bālacandraṃ ca daśamaṃ tu vināyakam |
ēkādaśaṃ gaṇapatiṃ dvādaśaṃ tu gajānanam || 4 ||
dvādaśaitāni nāmāni trisandhyaṃ yaḥ paṭhēnnaraḥ |
na ca vighnabhayaṃ tasya sarvasiddhikaraṃ param || 5 ||
vidyārthī labhatē vidyāṃ dhanārthī labhatē dhanam |
putrārthī labhatē putrānmōkṣārthī labhatē gatim || 6 ||
japēdgaṇapatistōtraṃ ṣaḍbhirmāsaiḥ phalaṃ labhēt |
saṃvatsarēṇa siddhiṃ ca labhatē nātra saṃśayaḥ || 7 ||
aṣṭabhyō brāhmaṇēbhyaśca likhitvā yaḥ samarpayēt |
tasya vidyā bhavētsarvā gaṇēśasya prasādataḥ || 8 ||
iti śrī nārada purāṇē saṅkaṭa nāśana gaṇēṣa stōtraṃ sampūrṇam ||