nārāyaṇa sūktam
ōṃ sa॒ha nā॑vavatu | sa॒ha nāu॑ bʰunaktu | sa॒ha vī॒rya॑ṃ karavāvahāi |
tē॒ja॒svinā॒vadʰī॑tamastu॒ mā vi॑dviṣā॒vahāi” ||
ōṃ śānti॒ḥ śānti॒ḥ śānti॑ḥ ||
sa॒ha॒sra॒śīr॑ṣaṃ dē॒va॒ṃ vi॒śvākṣa॑ṃ vi॒śvaśa॑ṃbʰuvam |
viśva॑ṃ nā॒rāya॑ṇaṃ dē॒vama॒kṣara॑ṃ para॒maṃ pa॒dam |
vi॒śvata॒ḥ para॑mānni॒tya॒ṃ vi॒śvaṃ nā॑rāya॒ṇag-m ha॑rim |
viśva॑mē॒vēdaṃ puru॑ṣa॒stadviśva॒mupa॑jīvati |
pati॒ṃ viśva॑syā॒tmēśva॑rag-m śāśvatag-m śi॒vama॑cyutam |
nā॒rāya॑ṇaṃ ma॑hājñē॒ya॒ṃ vi॒śvātmā॑naṃ pa॒rāya॑ṇam |
nā॒rāya॑ṇa parō jyō॒ti॒rā॒tmā nā॑rāya॒ṇaḥ pa॑raḥ |
nā॒rāya॑ṇa paraṃ bra॒hma॒ ta॒ttvaṃ nā॑rāya॒ṇaḥ pa॑raḥ |
nā॒rāya॑ṇa parō dʰyā॒tā॒ dʰyā॒naṃ nā॑rāya॒ṇaḥ pa॑raḥ |
yacca॑ ki॒ñcijjāgatsa॒rva॒ṃ dr̥॒śyatē” śrūya॒tē'pi॑ vā |
anta॑rba॒hiśca॑ tatsa॒rva॒ṃ vyā॒pya nā॑rāya॒ṇaḥ stʰi॑taḥ |
ana॑nta॒mavyayaṃ ka॒vig-m sa॑mu॒drē'nta॑ṃ vi॒śvaśa॑ṃbʰuvam |
pa॒dma॒kō॒śa pra॑tīkā॒śag-m hr̥̥॒daya॑ṃ cāpyā॒dʰōmu॑kʰam |
adʰō॑ ni॒ṣṭyā vi॑tastyā॒ntē॒ nā॒bʰyāmu॑pari॒ tiṣṭʰ॑ati |
jvā॒la॒mā॒lāku॑laṃ bʰā॒tī॒ vi॒śvasyā॑yata॒naṃ ma॑hat |
santa॑tag-m śi॒lābʰi॑stu॒ lamba॑tyākōśa॒sanni॑bʰam |
tasyāntē॑ suṣi॒rag-m sū॒kṣmaṃ tasmin” sa॒rvaṃ prati॑ṣṭʰitam |
tasya॒ madʰyē॑ ma॒hāna॑gnirvi॒śvārci॑rvi॒śvatō॑mukʰaḥ |
sō'gra॑bʰu॒gvibʰajanti॒ṣṭʰānnāhā॑ramaja॒raḥ ka॒viḥ |
ti॒rya॒gū॒rdʰvama॑dʰaśśā॒yī॒ ra॒śmayastasya॒ santa॑tā |
sa॒ntā॒paya॑ti svaṃ dē॒hāmāpā॑datalama॒stakaḥ |
tasya॒ madʰyē॒ vahnī॑śikʰā a॒ṇīyō”rdʰvā vya॒vastʰi॑taḥ |
nī॒latō॒yada॑madʰyastʰā॒dvi॒dyullē॑kʰēva॒ bʰāsva॑rā |
nī॒vāra॒śūkava॑ttanvī॒ pītā bʰā”svatya॒ṇūpa॑mā |
tasyā”: śikʰā॒yā ma॑dʰyē pa॒ramā”tmā vya॒vastʰi॑taḥ |
sa brahma॒ sa śiva॒ḥ sa hari॒ḥ sēndra॒ḥ sō'kṣa॑raḥ para॒maḥ sva॒rāṭ |
r̥̥॒tag-m sa॒tyaṃ paraṃ bra॒hma॒ pu॒ruṣa॑ṃ kr̥ṣṇapi॒ṅgalam |
ū॒rdʰvarē॑taṃ vi॑rūpā॒kṣa॒ṃ vi॒śvarū॑pāya॒ vāi namō॒ nama॑ḥ |
ōṃ nā॒rā॒ya॒ṇāya॑ vi॒dmahē॑ vāsudē॒vāya॑ dʰīmahi |
tannō॑ viṣṇuḥ pracō॒dayā”t ||
ōṃ śānti॒ḥ śānti॒ḥ śānti॑ḥ ||