māyā pañcakam
nirupamanityaniraṃśakē'pyakhaṇḍē –
mayi citi sarvavikalpanādiśūnyē |
ghaṭayati jagadīśajīvabhēdaṃ –
tvaghaṭitaghaṭanāpaṭīyasī māyā || 1 ||
śrutiśatanigamāntaśōdhakāna-
pyahaha dhanādinidarśanēna sadyaḥ |
kaluṣayati catuṣpadādyabhinnā-
naghaṭitaghaṭanāpaṭīyasī māyā || 2 ||
sukhacidakhaṇḍavibōdhamadvitīyaṃ –
viyadanalādivinirmitē niyōjya |
bhramayati bhavasāgarē nitāntaṃ –
tvaghaṭitaghaṭanāpaṭīyasī māyā || 3 ||
apagataguṇavarṇajātibhēdē –
sukhaciti vipraviḍādyahaṅkr̥tiṃ ca |
sphuṭayati sutadāragēhamōhaṃ –
tvaghaṭitaghaṭanāpaṭīyasī māyā || 4 ||
vidhihariharavibhēdamapyakhaṇḍē –
bata viracayya budhānapi prakāmam |
bhramayati hariharabhēdabhāvā-
naghaṭitaghaṭanāpaṭīyasī māyā || 5 ||
iti śrī māyā pañcakaṃ sampūrṇam ||