Manikarnikashtakam
tvattīrē maṇikarṇikē hariharau sāyujyamuktipradau
vādantau kurutaḥ parasparamubhau jantōḥ prayāṇōtsavē |
madrūpō manujō’yamastu hariṇā prōktaḥ śivastat-kṣaṇā-
ttanmadhyādbhr̥gulāñchanō garuḍagaḥ pītāmbarō nirgataḥ || 1 ||
indrādyāstridaśāḥ patanti niyataṃ bhōgakṣayē yē puna-
rjāyantē manujāstatō’pi paśavaḥ kīṭāḥ pataṅgādayaḥ |
yē mātarmaṇikarṇikē tava jalē majjaṇti niṣkalmaṣāḥ
sāyujyē’pi kirīṭakaustubhadharā nārāyaṇāḥ syurnarāḥ || 2 ||
kāśī dhanyatamā vimuktanagarī sālaṅkr̥tā gaṅgayā
tatrēyaṃ maṇikarṇikā sukhakarī muktirhi tatkiṅkarī |
swarlōkastulitaḥ sahaiva vibudhaiḥ kāśyā samaṃ brahmaṇā
kāśī kṣōṇitalē sthitā gurutarā swargō laghutvaṃ gataḥ || 3 ||
gaṅgātīramanuttamaṃ hi sakalaṃ tatrāpi kāśyuttamā
tasyāṃ sā maṇikarṇikōttamatamā yatrēśvarō muktidaḥ |
dēvānāmapi durlabhaṃ sthalamidaṃ pāpaughanāśakṣamaṃ
pūrvōpārjitapuṇyapuñjagamakaṃ puṇyairjanaiḥ prāpyatē || 4 ||
duḥkhāmbhōdhigatō hi jantunivahastēṣāṃ kathaṃ niṣkr̥tiḥ
jñātvā taddhi viriñcinā viracitā vārāṇasī śarmadā |
lōkāḥ swargasukhāstatō’pi laghavō bhōgāntapātapradāḥ
kāśī muktipurī sadā śivakarī dharmārtthamōkṣapradā || 5 ||
ēkō vēṇudharō dharādharadharaḥ śrīvatsabhūṣādharaḥ
yō’pyēkaḥ kila śaṅkarō viṣadharō gaṅgādharō mādhavaḥ |
yē mātarmaṇikarṇikē tava jalē majjaṇti tē mānavāḥ
rudrā vā harayō bhavanti bahavastēṣāṃ bahutvaṃ katham || 6 ||
tvattīrē maraṇaṃ tu maṅgaḷakaraṃ dēvairapi ślāghyatē
śakrastaṃ manujaṃ sahasranayanair-draṣṭuṃ sadā tatparaḥ |
āyāntaṃ savitā sahasrakiraṇaiḥ pratyudgatō’bhūtsadā
puṇyō’sau vṛṣagō’thavā garuḍagaḥ kiṃ mandiraṃ yāsyati || 7 ||
madhyāhnē maṇikarṇikā-snapanajaṃ puṇyaṃ na vaktuṃ kṣamaḥ
svīyairabdaśataiś-caturmukhadharō vēdārtthadīkṣāguruh |
yōgābhyāsabalēna candraśikhara-stat-puṇyapāraṅgata-
stvattīrē prakarōti suptapuruṣaṃ nārāyaṇaṃ vā śivam || 8 ||
kr̥cchraiḥ kōṭiśataih swapāpanidhanaṃ yaccāśwamēdhaiḥ phalam
tatsarvē maṇikarṇikā-snapanajē puṇyē praviṣṭaṃ bhavēt |
snātvā stōtramidaṃ naraḥ paṭhati cēt-saṃsārapāthōnidhiṃ
tīrtvā palvalavat-prayāti sadanaṃ tējōmayaṃ brahmaṇaḥ || 9 ||
iti śrī maṇikarṇikāṣṭakaṃ saṃpūrṇam ||