ṣaṣṭhō'dhyāyaḥ (dhūmralōcanavadhaḥ)
dhyānam: oṃ nāgādhīśvaraviṣṭarāṃ phaṇiphaṇōttaṃsōruratnāvalī- bhāsvaddēhalatāṃ divākaranibhāṃ nētratrayōdbhāsitām |
mālākumbhakapālanīrajakarāṃ candrārdhacūḍāṃ parāṃ, sarvajñēśvarabhairavāṅkanilayāṃ padmāvatīṃ cintayē ||
r̥ṣiruvāca: ityākarṇya vacō dēvyāḥ sa dūtō'marṣapūritaḥ |
samācaṣṭa samāgamya daityarājāya vistarāt | 2
tasya dūtasya tadvākyam-ākarṇyāsurarāṭ tataḥ |
sakrōdhaḥ prāha daityānām-adhipaṃ dhūmralōcanam | 3
hē dhūmralōcanāśu tvaṃ svasainyaparivāritaḥ |
tām-ānaya balād-dhuṣṭāṃ kēśākarṣaṇa-vihvalām | 4
tat-paritrāṇadaḥ kaścidyadi vōttiṣṭhatē paraḥ |
sa hantavyō amarō vāpi yakṣō gandharva ēva vā | 5
r̥ṣiruvāca: tēnājñaptas-tataḥ śīghraṃ sa daityō dhūmralōcanaḥ |
vr̥taḥ ṣaṣṭyā sahasrāṇām-asurānāṃ drutaṃ yayāu | 7
sa dṛṣṭvā tāṃ tatō dēvīṃ tuhinācala-saṃstthitām |
jagādōccāiḥ prayāhīti mūlaṃ śumbhaniśumbhayōḥ | 8
na cēt-pratyadya bhavatī mad-bhartāram-upāiṣyati |
tatō balān-nayāmyēṣa kēśākarṣaṇa-vihvalām | 9
dēvyuvāca: daityēśvarēṇa prahitō balavān-balasaṃvr̥taḥ |
balān-nayasi mām-ēvaṃ tataḥ kiṃ tē karōmyaham | 11
r̥ṣiruvāca: ityuktaḥ sō'bhyadhāvattām-asurō dhūmralōcanaḥ |
huṅkārēṇāiva taṃ bhasma sā cakārāmbikā tataḥ | 13
atha kruddhaṃ mahāsainyam-asurānāṃ tathāmbikā |
vavarṣa sāyakāit-tīkṣṇāis-tathā śaktiparaśvadhāiḥ | 14
tatō dhuta-saṭaḥ kōpāt-kr̥tvā nādaṃ subhairavam |
papātāsurasēnāyāṃ siṃhō dēvyāḥ svavāhanaḥ | 15
kāṃś-cit-karaprahārēṇa daityān-āsyēna cāparān |
ākrāmya cādharēṇānyān sa jaghāna mahāsurān | 16
kēṣāñ-cit-pāṭayāmāsa nakhāiḥ kōṣṭhāni kēsarī |
tathā talaprahārēṇa śirāṃsi kr̥tavān-pr̥thak | 17
vicchinna-bāhu-śirasaḥ kr̥tāstēna tathāparē |
papāu ca rudhiraṃ kōṣṭhād-anyēṣāṃ dhuta-kēsaraḥ | 18
kṣaṇēna tad-balaṃ sarvaṃ kṣayaṃ nītaṃ mahātmanā |
tēna kēsarīṇā dēvyā vāhanēnātikōpinā | 19
śrutvā tam-asuraṃ dēvyā nihataṃ dhūmralōcanam |
balaṃ ca kṣayitaṃ kr̥tsnaṃ dēvī-kēsariṇā tataḥ | 20
cukōpa daityādhipatiḥ śumbhaḥ prasphuritādharaḥ |
ājñāpayāmāsa ca tāu caṇḍamuṇḍāu mahāsurāu | 21
hē caṇḍa hē muṇḍa balāir-bahu-bhiḥ parivāritāu |
tatra gacchata gatvā ca sā samānīyatāṃ laghu | 22
kēśēṣvākr̥ṣya baddhvā vā yadi vaḥ saṃśayō yudhi |
tadāśēṣāyudhāiḥ sarvāir-asurāir-vinihanyatām | 23
tasyāṃ hatāyāṃ duṣṭāyāṃ siṃhē ca vinipātitē |
śīghram-āgamyatāṃ baddhvā gr̥hītvā tām-athāmbikām | 24
iti śrīmārkaṇḍēyapurāṇē sāvarṇikē manvantarē dēvīmāhātmye śumbhaniśumbhasēnānīdhūmralōcanavadho nāma ṣaṣṭhō'dhyāyaḥ