daśāvatāra stōtram
dēvō naśśubhamātanōtu daśadhā nirvartayanbhūmikāṃ
raṅgē dhāmani labdhanirbhararasairadhyakṣitō bhāvukaiḥ |
yadbhāvēṣu pṛthagvidhēṣvanuguṇānbhāvānsvayaṃ bibhratī
yaddharmairiha dharmiṇī viharatē nānākṛtirnāyikā || 1 ||
nirmagnaśrutijālamārgaṇadaśādattakṣaṇāirvīkṣaṇāi-
rantastānvadivāravindagahanānyāudatvatīnāmapām |
niṣpratyūhataraṅgariṅkhaṇamithaḥ pratyūḍhapāthaśchaṭā-
dōlārōhasadōhaḷaṃ bhagavatō mātsyaṃ vapuḥ pātu naḥ || 2 ||
avyāsuṛbhuvanatrayīmanibhṛtaṃ kaṇḍūyanāiradriṇā
nidrāṇasya parasya kūrmavapuṣō niśvāsavātōrmayaḥ |
yadvikṣēpaṇasamskṛtōdadhīpayaḥ prēṅkhōḷaparyaṅkikā-
nityārōhaṇanirvṛtō viharatē dēvassahāiva śriyā || 3 ||
gōpāyēdaniśaṃ jaganti kuhanāpōtrī pavitrīkṛta-
brahmāṇḍapralayōrmighōṣagurubhirghōṇāravāirghurghurāiḥ |
yaddaṃṣṭrāṅkurakōṭigāḍhaghaṭanāniṣkampsanityasthi-ti-
rbrahmastambamasāudasāu bhagavatīmustēvaviśvambharā || 4 ||
pratyādiṣṭapurātanapraharaṇagrāmaḥ kṣaṇaṃ pāṇijāi-
ravyāt-trīṇi jagantyakuṇṭhamahimā vaikuṇṭhakaṇṭhīravaḥ |
yatprādurbhavanādavandhyajaṭharāyādr̥cchikādvēdhasāṃ-
yā kācitsahasā mahāsuragṛhasthūṇāpitāmahyabhṛt || 5 ||
vrīḍāviddhavadānyadānavayaśōnāsīradhāṭībhaṭa-
straiyakṣaṃ makuṭaṃ punannavatu nastraivikramō vikramaḥ |
yatprastāvasamucchritadhvajapaṭīvṛttāntasiddhāntibhi-
ss rōtōbhissurasindhuraṣṭasudiśāsāudhēṣu dōdhūyatē || 6 ||
krōdhāgniṃ jamadagnipīḍanabhavaṃ santarpayiṣyan kramā-
dakṣatrāmiha santatakṣa ya imāṃ trissaptakṛtvaḥ kṣitim |
datvā karmaṇi dakṣiṇāṃ kvacana tāmāskandya sindhuṃ vasa-
nnabrahmanyamapākarōtu bhagavānābrahmakīṭaṃ muniḥ || 7 ||
pārāvārapayōviṣōṣaṇakalāpārīṇakālānala-
jvālājālavi hārahāriviśikhavyāpāraghōrakramaḥ |
sarvāvasthasakṛtprapannajanatāsaṃrakṣaṇāikavratī
dharmō vigrahavānadharmaviratiṃ dhanvī satanvītu naḥ || 8 ||
phakkātkāuravapaṭṭanaprabhṛtayaḥ prāstaprālambādaya-
stālāṅkāsyatathāvidhā vihṛtayastanvantu bhadrāṇi naḥ |
kṣīraṃ śarkarayēva yābhirapṛthagbhūtāḥ prabhūtairguṇāi-
rākāumārakamasvadan tajagatē kṛṣṇasya tāḥ kēḷayaḥ || 9 ||
nāthāyāiva namaḥ padaṃ bhavatu naścitraiścaritrakramāi-
rbhūyōbhīrbhuvanānyamūnikuhanāgōpāya gōpāyatē |
kāḷindīrasikāyakāḷiyaphaṇisphārasphaṭāvāṭikā-
raṅgōtsaṅgaviśaṅkacaṅkramadhurāparyāya caryāyatē || 10 ||
bhāvinyā daśayā bhavanniha bhavadhvaṃsāya naḥ kalpatāṃ
kalkī viṣṇuyaśassutaḥ kalikathākāluṣyakūlaṅkaṣaḥ |
niśṣēṣakṣatakaṇṭakē kṣititalē dhārājalāughāirdhruvaṃ
dharmaṃ kārtayugaṃ prarōhayati yannistriṃśadhārādharaḥ || 11 ||
icchāmīna vihārakacchapa mahāpōtrin yadr̥cchāharē
rakṣāvāmana rōṣarāma karuṇākākutstha hēlāhalin |
krīḍāvallava kalkivāhana daśākalkinniti pratyahaṃ
jalpantaḥ puruṣāḥ punantu bhuvanaṃ puṇyāughapanyāpaṇāḥ || 12 ||
vidyōdanvati vēṅkaṭēśvarakavāu jātaṃ jaganmaṅgalaṃ
dēvēśasyadaśāvatāraviṣayaṃ stōtraṃ vivakṣēta yaḥ |
vaktrē tasya sarasvatī bahumukhī bhaktiḥ parā mānasē
śuddhiḥ kāpi tanāu diśāsu daśasu khyātiśśubhā jṛmbhatē || 13 ||
iti kavitārkikasiṃhasya sarvatantrasvatantrasya śrīmadvēṅkaṭanāthasya vēdāntācāryasya kṛtiṣu daśāvatāra stōtraṃ |