Bhadra Lakshmi Stotram
śrīdēvī prathamaṃ nāma dvitīyam-amṛtōdbhavā |
tṛtīyaṃ kamalā prōktā caturthaṃ lōkasundarī || 1 ||
pañcamaṃ viṣṇupatnīti ṣaṣṭhaṃ śrīvaiṣṇavīti ca |
saptamaṃ tu varārōhā aṣṭamaṃ harivallabhā || 2 ||
navamaṃ śārṅgiṇī prōktā daśamaṃ dēvadēvikā |
ēkādaśaṃ mahālakṣmiḥ dvādaśaṃ lōkasundarī || 3 ||
śrīḥ padma kamalā mukundamahiṣī lakṣmīstrilōkēśvarī |
mā kṣīrābdhi sutā’ravindajananī vidyā sarōjātmikā || 4 ||
sarvābhīṣṭaphalapradēti satataṃ nāmāni yē dvādaśā |
prātaḥ śuddhatarāḥ paṭhanti satataṃ sarvān labhantē śubhān || 5 ||
bhadralakṣmī stavaṃ nityaṃ puṇyamētacchubhāvaham |
kālē snātvāpi kāvēryāṃ japa śrīvṛkṣasannidhau || 6 ||
iti śrī bhadralakṣmī stōtraṃ sampūrṇam