Ayōdhyākāṇḍa - Aṣṭanavatitama Sargaḥ
nivēśya sēnāṃ tu vibhuḥ padbhyāṃ pādavatāṃ varaḥ |
abhigantuṃ sa kākutthamiyēṣa guruvaartakam || 1
niviṣṭamātrē sainyē tu yathōddēśaṃ vinītavat |
bharatō bhrātaraṃ vākyaṃ śatrughnam-idam-abravīt || 2
kṣipraṃ vanam-idaṃ sāumya! narasaiṅghāi ssamantataḥ |
lubdhaiśca sahitāir-ēbhi stvam-anvēṣitum-arhasi || 3
guhō jñātisahasrēṇa śarachāpāsidhāriṇā |
samanvēṣatu kākutstham-asmin parivṛtassvayam || 4
amātyāi ssaha pāurāiśca gurubhiśca dvijātibhiḥ |
vanaṃ sarvaṃ chariṣyāmi padbhyāṃ parivṛta ssvayam || 5
yāvanna rāmaṃ drakṣyāmi lakṣmaṇaṃ vā mahābalam |
vaidēhīṃ ca mahābhāgāṃ na mē śāntirbhaviṣyati || 6
yāvanna candrasaṅkāśaṃ drakṣyāmi śubhamānanam |
bhrātuḥ padmapalāśākṣaṃ na mē śāntirbhaviṣyati || 7
yāvanna caraṇāu bhrātuḥ pārthivavyañjanānvitāu |
śirasā dhārayiṣyāmi na mē śāntirbhaviṣyati || 8
yāvanna rājyē rājyārhaḥ pitṛpāitāmahē sthitaḥ |
abhiṣēkajalaklinnō na mē śāntirbhaviṣyati || 9
siddhārthaḥ khalu sāumitrir-yaścandravimalōpamam |
mukhaṃ paśyati rāmasya rājīvākṣaṃ mahādyuti || 10
kr̥takr̥tyā mahābhāgā vaidēhī janakātmajā |
bhartāraṃ sāgarāntāyāḥ pṛthivyā yānugacchati || 11
subhagaś-citrakūṭō'sāu girirājōpamō giriḥ |
yasmin-vasati kākutsthaḥ kubēra iva nandanē || 12
kr̥takāryam-idaṃ durgaṃ vanaṃ vyālaniṣēvitam |
yad-adhyāstē mahātējā rāma śśastrabhr̥tāṃ varaḥ || 13
ēvam-uktvā mahātējā bharataḥ puraṣarṣabhaḥ |
padbhyām-ēva mahābāhuḥ pravivēśa mahādvanam || 14
sa tāni drumajālāni jātāni girisānuṣu |
puṣpitāgrāṇi madhyēna jagāma vadatāṃ varaḥ || 15
sa girēś-citrakūṭasya sālam-āsādya puṣpitam |
rāmāśramagatasyāgnērdadarśa dhvajam-ucchritam || 16
taṃ dṛṣṭvā bharata śrīmān-mumōda saha bāndhavaḥ |
atra rāma iti jñātvā gataḥ pāram-ivāmbhasaḥ || 17
sa citrakūṭē tu girāu niśamyava rāmāśramaṃ puṇyajanōpappannam |
guhēna sārdhaṃ tvaritō jagāma punar-nivēśyāiva camūṃ mahātmā || 18
iti śrīmadrāmāyaṇē vālmīkīyē ādikāvyē ayōdhyākāṇḍē aṣṭanavatitamasargaḥ