Ayōdhyākāṇḍa - Ēkōnasaptatitama Sargaḥ
yāmēva rātriṃ tē dūtāḥ praviśanti sma tāṃ purīm |
bharatēnāpi tāṃ rātriṃ svapnō dṛṣṭōyamapriyaḥ || 1
vyuṣṭāmēva tu tāṃ rātriṃ dṛṣṭvā taṃ svapnamapriyam |
putrō rājādhirājasya subhṛśaṃ paryatapyata || 2
tapyamānaṃ samājñāya vayasyāḥ priyavādinaḥ |
āyāsaṃ hi vinēṣyanta ssabhāyāṃ cakrirē kathāḥ || 3
vādayanti tathā śāntiṃ lāsa yantyapi cāparē |
nāṭakānyaparē prāhurhāsyāni vividhāni ca || 4
sa tairmahātmā bharatassakhibhiḥ priyavādibhiḥ |
gōṣṭhīhāsyāni kurvadbhirna prāhṛṣyata rāghavaḥ || 5
tamabravītpriyasakhō bharataṃ sakhibhirvṛtam |
suhṛdbhiḥ paryupāsīnaḥ kiṃ sakhē! nānumōdasē || 6
ēvaṃ bruvāṇaṃ suhṛdaṃ bharataḥ pratyuvāca ha |
śṛṇu tvaṃ yannimittaṃ mē danyamētadupāgatam || 7
svapnē pitaramadrākṣaṃ malinaṃ mukta mūrdhajam |
patantamadriśikharātkaluṣē gōmayahradē || 8
plavamānaśca mē dṛṣṭassa tasmingōmayahradē |
pibannañjalinā tailaṃ hasannapi muhurmuhuḥ || 9
tatastilāudanaṃ bhuktvā punaḥ punaradhaśśirāḥ |
tailēnābhyaktasarvāṅgaḥ tailamēvānvagāhata || 10
svapnēpi sāgaraṃ śuṣkaṃ candraṃ ca patitaṃ bhuvi |
uparuddhāṃ ca jagatīṃ tamasēva samāvṛtām || 11
āupavāhyasya nāgasya viṣāṇaṃ śakalīkṛtam |
sahasācāpi saṃśāntaṃ jvalitaṃ jātavēdasam || 12
avatīrṇāṃ ca pṛthivīṃ śuṣkāṃ śca vividhān drumān |
ahaṃ paśyāmi vidhvastān sadhūmāṃścāpi parvatān || 13
pīṭhē kārṣṇāyasē cainaṃ niṣaṇṇaṃ kṛṣṇavāsasam |
prahasanti sma rājānaṃ pramadāḥ kṛṣṇapiṅgalāḥ || 14
tvaramāṇaśca dharmātmā raktamālyānulēpanaḥ |
rathēna kharayuktēna prayātō dakṣiṇāmukhaḥ || 15
prahasantīva rājānaṃ pramadā raktavāsinī |
prakarṣantī mayā dṛṣṭā rākṣasī vikṛtānanā || 16
ēvamētanmayā dṛṣṭamimāṃ rātriṃ bhayāvaham |
ahaṃ rāmōthavā rājā lakṣmaṇō vā mariṣyati || 17
narō yānēna ya ssvapnē svarayuktēna yāti hi |
acirāttasya dhūmāgraṃ citāyāṃ sampradṛśyatē || 18
ētannimittaṃ dīnōhaṃ tannavaḥ pratipūjayē |
śuṣyatīva ca mē kaṇṭhaḥ na svasthamiva mē manaḥ || 19
na paśyāmi bhayasthānaṃ bhayaṃ caivōpadhārayē |
bhraṣṭaśca svarayōgō mē chāyā cōpahatā mama |
jugupsanniva cātmānaṃ na paśyāmi ca kāraṇam || 20
imāṃ ca dussvapnagatiṃ niśāmyatāmanēkarūpāmavitarkitāṃ purā |
bhayaṃ mahattaddhṛdayānnayāti mē vicintya rājānamacintadarśanam || 21
iti śrīmadrāmāyaṇē vālmīkīyē ādikāvyē ayōdhyākāṇḍē ēkōnasaptatitama sargaḥ