Ashta Lakshmi Stotram
1. Ādilakṣmī
sumanasa-vandita sundari mādhavi candra-sahōdari hēmamayē |
munigaṇa-vandita mōkṣapradāyini mañjulabhāṣiṇi vēdanutē ||
paṅkajavāsini dēvasupūjita sadguṇavarṣiṇi śāntiyutē |
jaya jaya hē madhusūdana kāmini ādilakṣmi sadā pālaya mām || 1 ||
2. Dhānyalakṣmī
ayi kalikalmaṣa-nāśini kāmini vaidikārūpiṇi vēdamayē |
kṣīrasamudbhava maṅgaḷarūpiṇi mantranivāsini mantranutē ||
maṅgaḷadāyini ambujavāsini dēvagaṇāśrita-pādayutē |
jaya jaya hē madhusūdana kāmini dhānyalakṣmi sadā pālaya mām || 2 ||
3. Dhairyalakṣmī
jaya varavarṇini vaiṣṇavi bhārgavi mantrasvarūpiṇi mantramayē |
suragaṇapūjita śīghraphalaprada jñānavikāsini śāstranutē ||
bhavabhayahāriṇi pāpavimōcani sādhujanāśrita-pādayutē |
jaya jaya hē madhusūdana kāmini dhairyalakṣmi sadā pālaya mām || 3 ||
4. Gajalakṣmī
jaya jaya durgatināśini kāmini sarvaphalaprada śāstramayē |
rathagajaturaga-padātisamāvṛta parijanamaṇḍita-lōkanutē ||
hariharabrahma-supūjitasēvita tāpanivāraṇa-pādayutē |
jaya jaya hē madhusūdana kāmini gajalakṣmi rūpēṇa pālaya mām || 4 ||
5. Santānalakṣmī
ayi khagavāhini mōhini cakriṇi rāgavivardhini jñānamayē |
guṇagaṇavāridhi lōkahitaiṣiṇi svarasaptabhūṣita-gānanutē ||
sakala surāsura dēvamunīśvara mānavavandita-pādayutē |
jaya jaya hē madhusūdana kāmini santānalakṣmi sadā pālaya mām || 5 ||
6. Vijayalakṣmī
jaya kamalāsani sadgatidāyini jñānavikāsini gānamayē |
anudinamarccita kuṅkumadhūsarabhūṣita-vāsita vādyanutē ||
kanakadhārāstuti vaibhava vandita śaṅkaradēśika mānyapadē |
jaya jaya hē madhusūdana kāmini vijayalakṣmi sadā pālaya mām || 6 ||
7. Vidyalakṣmī
praṇata surēśvari bhārati bhārgavi śōkavināśini ratnamayē |
maṇimayabhūṣita karṇavibhūṣaṇa śāntisamāvṛta hāsyamukhē ||
navanidhidāyini kalimalahāriṇi kāmitaphalaprada-hastayutē |
jaya jaya hē madhusūdana kāmini vidyalakṣmi sadā pālaya mām || 7 ||
8. Dhanalakṣmī
dhimidhimi dhiṇḍhimi dhiṇḍhimi dhiṇḍhimi dundubhināda supūrṇamayē |
ghumaghuma ghuṅghuma ghuṅghuma ghuṅghuma śaṅkhanināda suvādyanutē ||
vēdapurāṇētihāsa-supūjita vaidikamārga-pradarśayutē |
jaya jaya hē madhusūdana kāmini dhanalakṣmi rūpēṇa pālaya mām || 8 ||
iti śrī aṣṭalakṣmī stōtraṃ sampūrṇam ||