annapūrṇā aṣṭakam
nityānandakarī varābhayakarī sāundaryaratnākarī
nirdhūtākhilaghōrapāvanakarī pratyakṣamāhēśvarī |
prālēyācalavaṃśapāvanakarī kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 1 ||
nānāratnavicitrabhūṣaṇakarī hēmāmbarāḍambarī
muktāhāravilambamānavilasadvakṣōjakuṃbhāntarī |
kāśmīrāgaruvāsitāṅgarucirā kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 2 ||
yōgānandakarī ripukṣayakarī dharmārthaniṣṭhākarī
candrārkānalabhāsamānalaharī trāilōkyarakṣākarī |
sarvāiśvaryasamastavāṃchitakarī kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 3 ||
kāilāsācalakandarālayakarī gāurī umā śaṅkarī
kāumārī nigamārthagōcarakarī ōṃkārabījākṣarī |
mōkṣadvārakavāṭapāṭanakarī kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 4 ||
dr̥śyādr̥śyavibhūtivāhanakarī brahmāṇḍabhāṇḍōdarī
līlānāṭakasūtrakhēlanakarī vijñānadīpāṅkurī |
śrīviśvēśamanaḥprasādanakarī kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 5 ||
urvīsarvajanēśvarī jayakarī mātā kr̥pāsāgarī
vēṇīnīlasamānakuntaladharī nityānnadānēśvarī |
sarvānandakarī sadā śubhakarī kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 6 ||
ādikṣāntasamastavarṇanakarī śambhōstribhāvākarī
kāśmīrātrijalēśvarī trilaharī nityāṅkurā śarvarī |
svargadvārakavāṭapāṭanakarī kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 7 ||
dēvī sarvavicitraratnaracitā dākṣāyaṇī sundarī
vāmē svādupayōdharā priyakarī sāubhāgyamāhēśvarī |
bhaktābhīṣṭakarī sadā śubhakarī kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 8 ||
candrārkānalakōṭikōṭisadr̥śā candrāṃśubimbādharī
candrārkāgnisamānakuṇḍaladharī candrārkavarṇēśvarī |
mālāpustakapāśasāṃkuśadharī kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 9 ||
kṣatratrāṇakarī mahā'bhayakarī mātā kr̥pāsāgarī
sākṣānmōkṣakarī sadā śivakarī viśvēśvaraśrīdharī |
dakṣākrandakarī nirāmayakarī kāśīpurādhīśvarī
bhikṣāṃ dēhi kr̥pāvalambanakarī mātānnapūrṇēśvarī || 10 ||
annapūrṇē sadāpūrṇē śaṅkaraprāṇavallabhē |
jñānavāirāgyasiddhyarthaṃ bhikṣāṃ dēhi ca pārvati || 11 ||
mātā ca pārvatī dēvī pitā dēvō mahēśvaraḥ |
bāndhavāḥ śivabhaktāśca svadēśō bhuvanatrayam || 12 ||
iti śrī annapūrṇā aṣṭakaṃ sampūrṇam ||