ఉచ్ఛిష్ట గణపతి స్తోత్రం
దేవ్యువాచ |
నమామి దేవం సకలార్థదం తం
సువర్ణవర్ణం భుజగోపవీతమ్ |
గజాననం భాస్కరమేకదంతం
లంబోదరం వారిభవాసనం చ || ౧ ||
కేయూరిణం హారకిరీటజుష్టం
చతుర్భుజం పాశవరాభయాని |
సృణిం చ హస్తం గణపం త్రినేత్రం
సచామరస్త్రీయుగలేన యుక్తమ్ || ౨ ||
షడక్షరాత్మానమనల్పభూషం
మునీశ్వరైర్భార్గవపూర్వకైశ్చ |
సంసేవితం దేవమనాథకల్పం
రూపం మనోజ్ఞం శరణం ప్రపద్యే || ౩ ||
వేదాంతవేద్యం జగతామధీశం
దేవాదివంద్యం సుకృతైకగమ్యమ్ |
స్తంబేరమాస్యం నను చంద్రచూడం
వినాయకం తం శరణం ప్రపద్యే || ౪ ||
భవాఖ్యదావానలదహ్యమానం
భక్తం స్వకీయం పరిషించతే యః |
గండస్రుతాంభోభిరనన్యతుల్యం
వందే గణేశం చ తమోఽరినేత్రమ్ || ౫ ||
శివస్య మౌలావవలోక్య చంద్రం
సుశుండయా ముగ్ధతయా స్వకీయమ్ |
భగ్నం విషాణం పరిభావ్య చిత్తే
ఆకృష్టచంద్రో గణపోఽవతాన్నః || ౬ ||
పితుర్జటాజూటతటే సదైవ
భాగీరథీ తత్ర కుతూహలేన |
విహర్తుకామః స మహీధ్రపుత్ర్యా
నివారితః పాతు సదా గజాస్యః || ౭ ||
లంబోదరో దేవకుమారసంఘైః
క్రీడన్కుమారం జితవాన్నిజేన |
కరేణ చోత్తోల్య ననర్త రమ్యం
దంతావలాస్యో భయతః స పాయాత్ || ౮ ||
ఆగత్య యోచ్చైర్హరినాభిపద్మం
దదర్శ తత్రాశు కరేణ తచ్చ |
ఉద్ధర్తుమిచ్ఛన్విధివాదవాక్యం
ముమోచ భూత్వా చతురో గణేశః || ౯ ||
నిరంతరం సంస్కృతదానపట్టే
లగ్నాం తు గుంజద్భ్రమరావలీం వై |
తం శ్రోత్రతాలైరపసారయంతం
స్మరేద్గజాస్యం నిజహృత్సరోజే || ౧౦ ||
విశ్వేశమౌలిస్థితజహ్నుకన్యా
జలం గృహీత్వా నిజపుష్కరేణ |
హరం సలీలం పితరం స్వకీయం
ప్రపూజయన్హస్తిముఖః స పాయాత్ || ౧౧ ||
స్తంబేరమాస్యం ఘుసృణాంగరాగం
సిందూరపూరారుణకాంతకుంభమ్ |
కుచందనాశ్లిష్టకరం గణేశం
ధ్యాయేత్స్వచిత్తే సకలేష్టదం తమ్ || ౧౨ ||
స భీష్మమాతుర్నిజపుష్కరేణ
జలం సమాదాయ కుచౌ స్వమాతుః |
ప్రక్షాలయామాస షడాస్యపీతౌ
స్వార్థం ముదేఽసౌ కలభాననోఽస్తు || ౧౩ ||
సించామ నాగం శిశుభావమాప్తం
కేనాపి సత్కారణతో ధరిత్ర్యామ్ |
వక్తారమాద్యం నియమాదికానాం
లోకైకవంద్యం ప్రణమామి విఘ్నమ్ || ౧౪ ||
ఆలింగితం చారురుచా మృగాక్ష్యా
సంభోగలోలం మదవిహ్వలాంగమ్ |
విఘ్నౌఘవిధ్వంసనసక్తమేకం
నమామి కాంతం ద్విరదాననం తమ్ || ౧౫ ||
హేరంబ ఉద్యద్రవికోటికాంతః
పంచాననేనాపి విచుంబితాస్యః |
మునీన్సురాన్భక్తజనాంశ్చ సర్వా-
-న్స పాతు రథ్యాసు సదా గజాస్యః || ౧౬ ||
ద్వైపాయనోక్తాని స నిశ్చయేన
స్వదంతకోట్యా నిఖిలం లిఖిత్వా |
దంతం పురాణం శుభమిందుమౌలి-
-స్తపోభిరుగ్రం మనసా స్మరామి || ౧౭ ||
క్రీడాతటాంతే జలధావిభాస్యే
వేలాజలే లంబపతిః ప్రభీతః |
విచింత్య కస్యేతి సురాస్తదా తం
విశ్వేశ్వరం వాగ్భిరభిష్టువంతి || ౧౮ ||
వాచాం నిమిత్తం స నిమిత్తమాద్యం
పదం త్రిలోక్యామదదత్స్తుతీనామ్ |
సర్వైశ్చ వంద్యం న చ తస్య వంద్యః
స్థాణోః పరం రూపమసౌ స పాయాత్ || ౧౯ ||
ఇమాం స్తుతిం యః పఠతీహ భక్త్యా
సమాహితప్రీతిరతీవ శుద్ధః |
సంసేవ్యతే చేందిరయా నితాంతం
దారిద్ర్యసంఘం స విదారయేన్నః || ౨౦ ||
ఇతి శ్రీరుద్రయామలతంత్రే హరగౌరీసంవాదే ఉచ్ఛిష్ట గణేశ స్తోత్రం సమాప్తమ్ |
Uchchista Ganesha Stotram
dēvyuvāca |
namāmi dēvaṃ sakalārthadaṃ taṃ
suvarṇavarṇaṃ bhujagōpavītam |
gajānanaṃ bhāskaramēkadantaṃ
lambōdaraṃ vāribhavāsanaṃ ca || 1 ||
kēyūriṇaṃ hāra-kirīṭajuṣṭaṃ
caturbhujaṃ pāśavarābhayāni |
sṛṇiṃ ca hastaṃ gaṇapaṃ trinētraṃ
sacāmarastrī-yugalēna yuktam || 2 ||
ṣaḍakṣarātmānam-analpabhūṣaṃ
munīśvarair-bhārgava-pūrvakaiśca |
saṃsēvitaṃ dēvam-anāthakalpaṃ
rūpaṃ manōjñaṃ śaraṇaṃ prapadyē || 3 ||
vēdāntavēdyaṃ jagatāmadhīśaṃ
dēvādivandyaṃ sukṛtaikagamyam |
stambēramāsyaṃ nanu candracūḍaṃ
vināyakaṃ taṃ śaraṇaṃ prapadyē || 4 ||
bhavākhyadāvānala-dahyamānaṃ
bhaktaṃ svakīyaṃ pariṣiñcatē yaḥ |
gaṇḍasrutāmbhōbhir-ananyatulyaṃ
vandē gaṇēśaṃ ca tamō’rinētram || 5 ||
śivasya maulāvavalōkya candraṃ
suśuṇḍayā mugdhatayā svakīyam |
bhagnaṃ viṣāṇaṃ paribhāvya cittē
ākṛṣṭacandrō gaṇapō’vatānnaḥ || 6 ||
piturjaṭājūṭataṭē sadaiva
bhāgīrathī tatra kutūhalēna |
vihartukāmaḥ sa mahīdhraputryā
nivāritaḥ pātu sadā gajāsyaḥ || 7 ||
lambōdarō dēvakumārasaṅghaiḥ
krīḍankumāraṃ jitavānnijēna |
karēṇa cōttōlya nanarta ramyaṃ
dantāvalāsyō bhayataḥ sa pāyāt || 8 ||
āgatya yōccair-harinābhipadmaṃ
dadarśa tatrāśu karēṇa tacca |
uddhartumicchan-vidhivādavākyaṃ
mumōca bhūtvā caturō gaṇēśaḥ || 9 ||
nirantaraṃ saṃskṛtadānapaṭṭē
lagnāṃ tu guñjadbhramarāvalīṃ vai |
taṃ śrōtratālair-apasārayantaṃ
smarēdgajāśyaṃ nijahṛtsarōjē || 10 ||
viśvēśamaulisthitajahnu-kanyā
jalaṃ gṛhītvā nijapuṣkarēṇa |
haraṃ salīlaṃ pitaraṃ svakīyaṃ
prapūjayan-hastimukhaḥ sa pāyāt || 11 ||
stambēramāsyaṃ ghusṛṇāṅgarāgaṃ
sindūrapūrāruṇakāntakumbham |
kucandanāśliṣṭakaraṃ gaṇēśaṃ
dhyāyētsvacittē sakalēṣṭadaṃ tam || 12 ||
sa bhīṣmamāturnijapuṣkarēṇa
jalaṃ samādāya kucau svamātuḥ |
prakṣālayāmāsa ṣaḍāsyapītau
svārthaṃ mudē’sau kalabhānanō’stu || 13 ||
siñcāma nāgaṃ śiśubhāvamāptaṃ
kēnāpi satkāraṇatō dharitryām |
vaktāramādyaṃ niyamādikānāṃ
lōkaikavandyaṃ praṇamāmi vighnam || 14 ||
āliṅgitaṃ cārurucā mṛgākṣyā
sambhōgalōlaṃ madavihvalāṅgam |
vighnaughavidhvaṃsanasaktamēkaṃ
namāmi kāntaṃ dviradānanaṃ tam || 15 ||
hēramba udyadravikōṭikāntaḥ
pañcānanēnāpi vicumbitāsyaḥ |
munīnsurānbhaktajanāṃśca sarvā-
-nsa pātu rathyāsu sadā gajāsyaḥ || 16 ||
dvaipāyanōktāni sa niścayēna
svadantakōṭyā nikhilaṃ likhitvā |
dantaṃ purāṇaṃ śubhamindumauli-
-stapōbhirugraṃ manasā smarāమి || 17 ||
krīḍātaṭāntē jaladhāvibhāsyē
vēlājalē lambapatiḥ prabhītaḥ |
vicitya kasyēti surāstadā taṃ
viśvēśvaraṃ vāgbhirabhiṣṭuvanti || 18 ||
vācāṃ nimittaṃ sa nimittamādyaṃ
padaṃ trilōkyāmadadatstutīnām |
sarvaiśca vandyaṃ na ca tasya vandyaḥ
sthāṇōḥ paraṃ rūpamasau sa pāyāt || 19 ||
imāṃ stutiṃ yaḥ paṭhatīha bhaktyā
samāhitaprītiratīva śuddhaḥ |
saṃsēvyatē cēndirayā nitāntaṃ
dāridryasaṅghaṃ sa vidārayēnnaḥ || 20 ||
iti śrīrudrayāmalatantrē haragaurīsaṃvādē ucchiṣṭa gaṇēśa stōtraṃ samāptam |