సుందరకాండ - చత్వారింశ సర్గః (సీతాదేవి సందేశం - హనుమంతుని ప్రయాణోన్ముఖత)
శ్రుత్వాతు వచనం తస్య వాయుసూనోర్మహాత్మనః |
ఉవాచ్మహితం వాక్యం సీతా సురసుతోపమా || ౧ ||
తాం దృష్ట్వాప్రియవక్తారం సంప్ర హృష్యామి వానర |
అర్థ సంజాతసస్యేన వృష్టిం ప్రాప్య వసుంధరా || ౨ ||
యథా తం పురుషవ్యాఘ్రం గాత్రైః శోకాభికర్శితైః |
సంస్పృశేయం సకామాహం తథా కురు దయాం మయి || ౩ ||
అభిజ్ఞానం చ రామస్య దద్యా హరిగోత్తమ |
క్షిప్తామిషికాం కాకస్య కోపాత్ ఏకాక్షి శాతనీమ్ || ౪ ||
మనశ్శిలాయాః తిలకో గండపార్శ్వే నివేశితః |
త్వయా ప్రణష్టే తిలకే తం కిల స్మర్తుమర్హసి || ౫ ||
స వీర్యవాన్ కథం సీతాం హృతాం స మనుమన్యసే |
వసంతీం రక్షసాం మధ్యే మహేంద్ర వరుణోపమః || ౬ ||
ఏష చూడామణిర్దివ్యో మయ సు పరిరక్షితః |
ఏతం దృష్ట్వా ప్రహృష్యామి వ్యసనే త్వాం ఇవానఘ || ౭ ||
ఏష నిర్యాతితః శ్రీమాన్ మయాతే వారిసంభవః |
అతః పరం న శక్ష్యామి జీవితుం శోకలాలసా || 8 ||
అసహ్యాని చ దుఃఖాని వాచశ్చ హృదయచ్ఛిదః |
రాక్షసీనాం సుఘోరాణాం త్వత్కృతే మర్షయామ్యహమ్ || ౯ ||
ధారయిష్యామి మాసం తు జీవితం శత్రు సూదన |
ఊర్ధ్వం మాసాన్ నజీవిష్యే త్వయా హీనా నృపాత్మజ || ౧౦ ||
ఘోరోరాక్షసరాజోఽయం దృష్టిశ్చ న సుఖామయి |
త్వాం చ శ్రుత్వా విపద్యంతం న జీవేయమహం క్షణమ్ || ౧౧ ||
వైదేహ్యా వచనం శ్రుత్వా కరుణం సాశ్రుభాషితమ్ |
అథాబ్రవీన్ మహాతేజా హనుమాన్ మారుతాత్మజః || ౧౨ ||
త్వచ్ఛోకవిముఖో రామో దేవి సత్యేన తే శపే |
రామే దుఃఖాభిభూతే తు లక్ష్మణః పరితప్యతే || ౧౩ ||
కథంచిత్ భవతి దృష్టా న కాలః పరిశోచితుమ్ |
ఇమం ముహూర్తం దుఃఖానాం అంతం ద్రక్ష్యసి భామిని || ౧౪ ||
తావుభౌ పురుషవ్యాఘ్రౌ రాజపుత్త్రావరిందమౌ |
త్వద్దర్శన కృతోత్సాహౌ లంకాం భస్మీకరిష్యతః || ౧౫ ||
హత్వాతు సమరే క్రూరం రావణం సహబాంధవమ్ |
రాఘవౌ త్వా విశాలాక్షి స్వాం పురీం ప్రాపయిష్యతః || ౧౬ ||
యత్తు రామో విజానీయాత్ అభిజ్ఞానమనిందితే |
ప్రీతిసంజననం తస్య భూయస్త్వం దాతుమర్హసి || ౧౭ ||
సాsబ్రవీ ద్దత్తమేవేతి మయాఽభిజ్ఞాన ముత్తమమ్ |
ఏతదేవ హి రామస్య దృష్ట్వా మత్కేశభూషణమ్ || ౧౮ ||
శ్రద్ధేయం హనుమాన్వాక్యం తవ వీర భవిష్యతి |
స తం మణివరం గృహ్య శ్రీమాన్ ప్లవగసత్తమః || ౧౯ ||
ప్రణమ్య శిరసా దేవీం గమనాయోపచక్రమే |
తముత్పాత కృతోత్సాహమ్ అవేక్ష్య హరిపుంగవమ్ || ౨౦ ||
వర్థమాణం మహావేగం ఉవాచ జనకాత్మజా |
అశ్రుపూర్ణముఖీ దీనా భాష్పగద్గదయా గిరా || ౨౧ ||
హనుమాన్ సింహ సంకాశౌ భ్రాతరౌ రామలక్ష్మణౌ |
సుగ్రీవం చ సహామాత్యం సర్వాన్ బ్రూయా హ్యనామయమ్ || ౨౨ ||
యథా చ మహాబాహుః మాం తారయతి రాఘవః |
అస్మాద్దుఃఖాంబు సంరోధాత్ త్వం సమాధాతు మర్హసి || ౨౩ ||
ఇమం చ తీవ్రం మమ శోకవేగం రక్షోభి రేభిః పరిభర్త్సనం చ |
బ్రూయాస్తు రామస్య గతస్సమీపం శివశ్చ తే sధ్వాస్తు సహరిప్రవీర || ౨౪ ||
స రాజపుత్త్ర్యా ప్రతివేదితార్థః కపిః కృతార్థః పరిహృష్టచేతాః |
అల్పావశేషం ప్రసమీక్ష్య కార్యం దిశం హ్యుదీచీం మనసా జగామ || ౨౫ ||
ఇత్యార్షే శ్రీమద్రామాయణే ఆదికావ్యే వాల్మీకీయే
చతుర్వింశత్ సహస్రికాయాం సంహితాయామ్
శ్రీమత్సుందరకాండే చత్వారింశస్సర్గః ||