సుందరకాండ - చతుస్త్రింశ సర్గః
తస్యాత్ తద్వచనం శ్రుత్వా హనుమాన్ హరియూథపః |
దుఃఖా దుఃఖాభిభూతాయాః సాంత్వ ముత్తర మబ్రవీత్ || ౧ ||
అహం రామస్య సందేశాత్ దేవి దూతస్తవాగతః |
వైదేహీ కుశలీ రామః త్వాం చ కౌశలమబ్రవీత్ || ౨ ||
యో బ్రహ్మమస్త్రం వేదాంశ్చ వేద వేదవిదాం వరః |
స త్వా దాశరథీ రామో దేవి కౌశల మబ్రవీత్ || ౩ ||
లక్ష్మణశ్చ మహాతేజా భర్తుస్తేఽనుచరః ప్రియః |
కృతవాన్ శోకసంతప్తః శిరసా తే అభివాదనమ్ || ౪ ||
సా తయోః కుశలం దేవీ నిశమ్య నరసింహయోః |
ప్రీతిసంహృష్ట సర్వాంగీ హనూమంతం అథాబ్రవీత్ || ౫ ||
కల్యాణీ బతగాథేయం లౌకీకి ప్రతిభాతి మా |
ఏతి జీవితమానందో నరం వర్షశతాదపి || ౬ ||
తయా సమాగతే తస్మిన్ ప్రీతిరుత్పాదితాద్భుతా |
పరస్పరేణ చాలాపం విశ్వస్తౌతౌ ప్రచక్రతుః || ౭ ||
తస్యాః తద్వచనం శ్రుత్వా హనుమాన్ హరియూథపః |
సీతాయాః శోకదీనాయాః సమీపముపచక్రమే || ౮ ||
యథా యథా సమీపం స హనుమానుపసర్పతి |
తథా తథా రావణం సా తం సీతా పరిశంకతే || ౯ ||
అహోధిగ్దుష్కృత మిదం కథితం హి య దస్య మే |
రూపాంతర ముపాగమ్య స ఏవాయం హి రావణః || ౧౦ ||
తామశోకస్య శాఖాం సా విముక్త్వా శోకకర్శితా |
తస్యా మే వానవద్యాంగీ ధరణ్యాం సముపావిశత్ || ౧౧ ||
హనుమానపి దుఃఖార్తాం తాం దృష్ట్వా భయమోహితామ్ |
అవందత మహాబాహుః తతస్తాం జనకాత్మజామ్ || ౧౨ ||
సా చైనం భయవిత్రస్తా భూయో నైవాభ్యుదైక్షత |
తం దృష్ట్వా వందమానం తు సీతా శశినిభాననా || ౧౩ ||
అబ్రవీత్ దీర్ఘముచ్ఛ్వస్య వానరం మధురస్వరా |
మాయాం ప్రవిష్టో మాయావీ యది త్వం రావణః స్వయమ్ || ౧౪ ||
ఉత్పాదయసి మే భూయః సంతాపం తన్నశోభనమ్ |
స్వం పరిత్యజ్య రూపం యః పరివ్రాజకరూపధృత్ || ౧౫ ||
జనస్థానే మయా దృష్టః త్వం స ఏవాసి రావణః |
ఉపవాసకృశాం దీనాం కామరూప నిశాచర || ౧౬ ||
సంతాపయసి మాం భూయః సంతప్తాం తన్నశోభనమ్ |
అథవా నైతదేవం హి యన్మయా పరిశంకితమ్ || ౧౭ ||
మనసో హి మమ ప్రీతిరుత్పన్నా తవదర్శనాత్ |
యది రామస్య దూతస్త్వం ఆగతో భద్రమస్తుతే || ౧౮ ||
పృఛ్ఛామి త్వాం హరిశ్రేష్ఠ ప్రియా రామకథా హి మే |
గుణాన్ రామస్య కథయ ప్రియస్య మమ వానర || ౧౯ ||
చిత్తం హరసి మే సౌమ్య నదీకూలం యథా రయః |
అహో స్వప్నస్య సుఖతా యాsహమేవం చిరాహృతా || ౨౦ ||
ప్రేషితం నామ పశ్యామి రాఘవేణ వనౌకసం |
స్వప్నేఽపి యద్యహం వీరం రాఘవం సహ లక్ష్మణమ్ || ౨౧ ||
పశ్యేయం నావసీదేయం స్వప్నోఽసి మమమత్సరీ |
నాహం స్వప్న మహం మన్యే స్వప్నే దృష్ట్వా హి వానరమ్ || ౨౨ ||
న శక్యోఽభ్యుదయః ప్రాప్తుం ప్రాప్త శ్చాభ్యుదయో మమ |
కిన్ను స్యాచ్చిత్తమోహోఽయం భవేద్వాతగతిస్త్వియమ్ || ౨౩ ||
ఉన్మాదజో వికారో వా స్యాదియం మృగతృష్ణికా |
అథవా నాయమున్మాదో మోహోఽప్యున్మాదలక్షణః || ౨౪ ||
సంబుధ్యే చాహ మాత్మానం ఇమం చాపి వనౌకసమ్ |
ఇత్యేవం బహుధా సీతా సంప్రధార్య బలాబలమ్ || ౨౫ ||
రక్షసాం కామరూపత్వాన్ మేనే తం రాక్షసాధిపమ్ |
ఏతాం బుద్ధిం తదా కృత్వా సీతా సా తనుమధ్యమా || ౨౬ ||
న ప్రతి వ్యాజహారాsథ వానరం జనకాత్మజా |
సీతాయాశ్చింతితం బుద్ధ్వా హనుమాన్ మారుతాత్మజః || ౨౭ ||
శ్రోత్రానుకూలై ర్వచనైః తదా తాం సంప్రహర్షయత్ |
అదిత్య ఇవ తేజస్వీ లోకకాంతః శశీ యథా || ౨8 ||
రాజా సర్వస్య లోకస్య దేవో వైశ్రవణో యథా |
విక్రమేణోపపన్నశ్చ యథా విష్ణు ర్మహాయశాః || ౨౯ ||
సత్యవాదీ మథురవాగ్దేవో వాచస్పతి ర్యథా |
రూపవాన్ సుభగః శ్రీమాన్ కందర్ప ఇవ మూర్తిమాన్ || ౩౦ ||
స్థానక్రోథఃప్రహర్తా చ శ్రేష్ఠో లోకే మహారథః |
బాహుచ్ఛాయా మవష్టబ్ధో యస్య లోకో మహాత్మనః || ౩౧ ||
అపకృష్యాశ్రమపదాన్ మృగరూపేణ రాఘవం |
శూన్యే యేనాపనీతాపి తస్య ద్రక్ష్యసి యత్ ఫలమ్ || ౩౨ ||
న చిరాత్ రావణం సంఖ్యే యో వధిష్యతి వీర్యవాన్ |
రోషప్రముక్తై రిషుభిః జ్వలద్భిరివ పావకైః || ౩౩ ||
తేనాహం ప్రేషితో దూతః త్వత్సకాశ మిహాగతః |
తద్వియోగేన దుఃఖార్తః స త్వాం కౌశలమబ్రవీత్ || ౩౪ ||
లక్ష్మణశ్చ మహాతేజాః సుమిత్రానందవర్ధనః |
అభివాద్య మహాబాహుః స త్వాం కౌశలమబ్రవీత్ || ౩౫ ||
రామస్య చ సఖా దేవి సుగ్రీవో నామ వానరః |
రాజా వానరముఖ్యానాం స త్వాం కౌశలమబ్రవీత్ || ౩౬ ||
నిత్యం స్మరతి రామః త్వాం ససుగ్రీవః సలక్ష్మణః |
దిష్ట్యా జీవసి వైదేహీ రాక్షసీవశమాగతా || ౩౭ ||
న చిరాత్ ద్రక్ష్యసే రామం లక్ష్మణం చ మహాబలమ్ |
మధ్యే వానర కోటీనాం సుగ్రీవం చామితౌజసమ్ || ౩౮ ||
అహం సుగ్రీవ సచివో హనుమాన్ నామ వానరః |
ప్రవిష్ఠో నగరీం లంకాం లంఘయిత్వా మహోదధిమ్ || ౩౯ ||
కృత్వా మూర్థ్ని పదన్యాసం రావణస్య దురాత్మనః |
త్వాం ద్రష్టు ముపయాతోఽహం సమాశ్రిత్య పరాక్రమమ్ || ౪౦ ||
నాహ మస్మి తథా దేవీ యథా మామ్ అవగచ్ఛసి |
విశంకా త్యజతాం ఏషా శ్రద్ధత్స్వ వదతో మమ || ౪౧ ||
ఇత్యార్షే శ్రీమద్రామాయణే ఆదికావ్యే వాల్మీకీయే
చతుర్వింశత్ సహస్రికాయాం సంహితాయామ్
శ్రీమత్సుందరకాండే చతుస్త్రింశస్సర్గః ||