సుందరకాండ - వింశ సర్గః
స తాం పరివృతామ్ దీనాం నిరానన్దాం తపస్స్వినీమ్ |
సాకారైర్మథురైర్వాక్యైః న్యదర్శయత రావణః || ౧ ||
మాం దృష్ట్వా నాగనాసోరు గూహమాన స్తనోదరమ్ |
అదర్శనమివాత్మానం భయాన్నేతుం త్వ మిచ్చసి || ౨ ||
కామయేత్వాం విశాలాక్షీ బహుమన్యస్వ మాం ప్రియే |
సర్వాఙ్గ గుణ సంపన్నే సర్వలోకమనోహరే || ౩ ||
నేహ కేచిన్మనుష్యా వా రాక్షసాః కామరూపిణః |
వ్యపసర్పతు తే సీతే భయం మత్తస్సముత్థితమ్ || ౪ ||
స్వధర్మో రక్షసాం భీరు సర్వథైవ నసంశయః |
గమనం వా పరస్త్రీణాం హరణం సంప్రమధ్య వా || ౫ ||
ఏవం చైతదకామం తు న త్వాం స్ప్రక్ష్యామి మైథిలి |
కామం కామః శరీరే మే యథా కామం ప్రవర్తతామ్ || ౬ ||
దేవీ నేహ భయం కార్యం మయి విశ్వసిహి ప్రియే |
ప్రణయస్వ చ తత్వేన మైవం భూః శోకలాలసా || ౭ ||
ఏకవేణీధరాశయ్యా ధ్యానం మలిన మంబరమ్ |
అస్థానేఽపయుపవాసశ్చ నైతా న్యౌపయికాని తే || ౮ ||
విచిత్రాణి చ మాల్యాని చన్దనాన్యగరూణి చ |
వివిధాని చ వాసాంసి దివ్యాన్యాభరణానిచ || ౯ ||
మహార్హాణి చ పానాని శయనాన్యాసనాని చ |
గీతం నృత్తం చ వాద్యంచ లభ మాం ప్రాప్య మైథిలి || ౧౦ ||
స్త్రీ రత్నమసి మైవం భూః కురు గాత్రేషు భూషణం |
మాం ప్రాప్య హి కథం ను స్యాత్ త్వమనర్హా సువిగ్రహే || ౧౧ ||
ఇదం తే చారు సంజాతం యౌవనం వ్యతివర్తతే |
యత్ అతీతం పునర్నైతి స్రోతః శీఘ్రమపామివ || ౧౨ ||
త్వాం కృత్వోపరతో మన్యే రూపకర్తా స విశ్వసృక్ |
న హి రూపోపమా త్వన్యా తవాస్తి శుభదర్శనే || ౧౩ ||
త్వాం సమసాద్య వైదేహీ రూపయౌవనశాలినీమ్ |
కః పుమా నతివర్తేత సాక్షా దపి పితామహః || ౧౪ ||
యద్యత్ పశ్యామి తే గాత్రం శీతాంశుసదృశాననే |
తస్మిం స్తస్మిన్ పృథుశ్రోణీ చక్షుర్మమ నిబధ్యతే || ౧౫ ||
భవ మైథిలి భార్యా మే మోహ మేనం విసర్జయ |
బహ్వినాం ఉత్తమస్త్రీణాం ఆహృతానామ్ ఇతః తతః || ౧౬ ||
సర్వాసామేవ భద్రంతే మమాగ్రమహీషీభవ |
లోకేభ్యో యాని రత్నాని సంప్రమథ్యాహృతాని వై || ౧౭ ||
తాని మే భీరు సర్వాణి రాజ్యం చైతదహం చ తే |
విజిత్య పృథివీం సర్వాం నానానగరమాలినీమ్ || ౧౮ ||
జనకాయ ప్రదాస్యామి తవ హేతోర్విలాసినీ |
నేహ పశ్యామి లోకేఽన్యం యో మే ప్రతిబలో భవేత్ || ౧౯ ||
పశ్యమే సుమహద్వీర్యం అప్రతిద్వన్ద్వమాహవే |
అసకృత్ సంయుగే భగ్నా మయా విమృదితధ్వజాః || ౨౦ ||
అశక్తాః ప్రత్యనీకేషు స్థాతుం మమ సురాసురాః |
ఇచ్చయా క్రియతా మద్య ప్రతికర్మ తవోత్తమమ్ || ౨౧ ||
సప్రభాణ్యవసజ్యన్తాం తవాఙ్గే భూషణానిచ |
సాధు పశ్యామి తే రూపం సంయుక్తం ప్రతికర్మణా || ౨౨ ||
ప్రతికర్మాభి సంయుక్తా దాక్షిణ్యేన వరాననే |
భుంక్ష్వభోగాన్ యథాకామం పిబ భీరు రమస్వ చ || ౨౩ ||
యథేష్టం చ ప్రయచ్చ త్వం పృథివీం వా ధనాని చ |
లలస్వ మయి విస్రబ్దా ధృష్ట మాజ్ఞాపయస్వ చ || ౨౪ ||
మత్ప్రసాదా ల్లలన్త్యాశ్చ లలన్తాం భాన్ధవా స్తవ |
బుద్ధిం మామనుపశ్య త్వం శ్రియం భద్రే యశశ్చ మే || ౨౫ ||
కిం కరిష్యసి రామేణ సుభగే చీరవాససా |
నిక్షిప్త విజయో రామో గతశ్రీః వనగోచరః || ౨౬ ||
వ్రతీ స్థణ్డిలశాయీ చ శఙ్కే జీవతి వా న వా |
న హి వైదేహి రామ స్త్వాం ద్రష్టుం వాప్యుపలప్స్యతే || ౨౭ ||
పురో బలాకై రసితైః మేఘైః జ్యోత్స్నామివావృతమ్ |
న చాపి మమ హస్తా త్త్వామ్ ప్రాప్తు మర్హతి రాఘవః || ౨౮ ||
హిరణ్యకశిపుః కీర్తిం ఇంద్రహస్తగతామివ |
చారుస్మితే చారుదతి చారునేత్రే విలాసిని || ౨౯ ||
మనోహరసి మే భీరు సుపర్ణః పన్నగం యథా |
క్లిష్ట కౌశేయవసనాం తన్వీ మప్యనలఙ్కృతామ్ || ౩౦ ||
తాం దృష్ట్వా స్వేషు దారేషు రతిం నోపలభామ్యహమ్ |
అన్తఃపుర నివాసిన్యః స్త్రియః సర్వగుణాన్వితాః || ౩౧ ||
యావంత్యో మమ సర్వాసామ్ ఐశ్వ్వర్యం కురు జానకి |
మమ హ్యసితకేశాంతే త్రైలోక్యప్రవరా స్స్త్రియః || ౩౨ ||
తాస్త్వాం పరిచరిష్యన్తి శ్రియ మప్సరసో యథా |
యాని వైశ్రవణే సుభ్రు రత్నాని ధనాని చ || ౩౩ ||
తాని లోకాంశ్చ సుశ్రోణి మాం చ భుఙ్క్ష్వ యథా సుఖమ్ |
న రామస్తపసా దేవి న బలేన న విక్రమైః |
న ధనేన మయా తుల్యః తేజసా యశసాఽపి వా || ౩౪ ||
పిబ విహర రమస్వ భుఙ్క్ష్వ భోగాన్
ధననిచయం ప్రదిశామి మేదినీం చ |
మయి లల లలనే యథాసుఖం త్వం
త్వయి చ సమేత్య లలన్తు బాన్ధవాస్తే || ౩౫ ||
కుసుమిత తరుజాల సంతతాని
భ్రమరయుతాని సముద్రతీరజాని |
కనక విమల హారభూషితాఙ్గి
విహర మయా సహ భీరు కాననాని || ౩౬ ||
ఇత్యార్షే శ్రీమద్రామాయణే ఆదికావ్యే వాల్మీకీయే
చతుర్వింశత్ సహస్రికాయాం సంహితాయామ్
శ్రీమత్సుందరకాండే వింశస్సర్గః ||