శ్రీ సుబ్రహ్మణ్య భుజంగం
సదా బాలరూపాపి విఘ్నాద్రిహంత్రీ
మహాదంతివక్త్రాఽపి పంచాస్యమాన్యా |
విధీంద్రాదిమృగ్యా గణేశాభిధా మే
విధత్తాం శ్రియం కాఽపి కళ్యాణమూర్తిః || ౧ ||
న జానామి శబ్దం న జానామి చార్థం
న జానామి పద్యం న జానామి గద్యమ్ |
చిదేకా షడాస్యా హృది ద్యోతతే మే
ముఖాన్నిఃసరంతే గిరశ్చాపి చిత్రమ్ || ౨ ||
మయూరాధిరూఢం మహావాక్యగూఢం
మనోహారిదేహం మహచ్చిత్తగేహమ్ |
మహీదేవదేవం మహావేదభావం
మహాదేవబాలం భజే లోకపాలమ్ || ౩ ||
యదా సంనిధానం గతా మానవా మే
భవాంభోధిపారం గతాస్తే తదైవ |
ఇతి వ్యంజయన్సింధుతీరే య ఆస్తే
తమీడే పవిత్రం పరాశక్తిపుత్రమ్ || ౪ ||
యథాబ్ధేస్తరంగా లయం యాంతి తుంగా-
స్తథైవాపదః సంనిధౌ సేవతాం మే |
ఇతీవోర్మిపంక్తీర్నృణాం దర్శయంతం
సదా భావయే హృత్సరోజే గుహం తమ్ || ౫ ||
గిరౌ మన్నివాసే నరా యేఽధిరూఢా-
స్తదా పర్వతే రాజతే తేఽధిరూఢాః |
ఇతీవ బ్రువన్గంధశైలాధిరూఢః
స దేవో ముదే మే సదా షణ్ముఖోఽస్తు || ౬ ||
మహాంభోధితీరే మహాపాపచోరే
మునీంద్రానుకూలే సుగంధాఖ్యశైలే |
గుహాయాం వసంతం స్వభాసా లసంతం
జనార్తిం హరంతం శ్రయామో గుహం తమ్ || ౭ ||
లసత్స్వర్ణగేహే నృణాం కామదోహే
సుమస్తోమసంఛన్నమాణిక్యమంచే |
సముద్యత్సహస్రార్కతుల్యప్రకాశం
సదా భావయే కార్తికేయం సురేశమ్ || ౮ ||
రణద్ధంసకే మంజులేఽత్యంతశోణే
మనోహారిలావణ్యపీయూషపూర్ణే |
మనఃషట్పదో మే భవక్లేశతప్తః
సదా మోదతాం స్కంద తే పాదపద్మే || ౯ ||
సువర్ణాభదివ్యాంబరైర్భాసమానాం
క్వణత్కింకిణీమేఖలాశోభమానామ్ |
లసద్ధేమపట్టేన విద్యోతమానాం
కటిం భావయే స్కంద తే దీప్యమానామ్ || ౧౦ ||
పులిందేశకన్యాఘనాభోగతుంగ-
స్తనాలింగనాసక్తకాశ్మీరరాగమ్ |
నమస్యామ్యహం తారకారే తవోరః
స్వభక్తావనే సర్వదా సానురాగమ్ || ౧౧ ||
విధౌ క్లృప్తదండాన్స్వలీలాధృతాండా-
న్నిరస్తేభశుండాన్ద్విషత్కాలదండాన్ |
హతేంద్రారిషండాన్జగత్రాణశౌండా-
న్సదా తే ప్రచండాన్శ్రయే బాహుదండాన్ || ౧౨ ||
సదా శారదాః షణ్మృగాంకా యది స్యుః
సముద్యంత ఏవ స్థితాశ్చేత్సమంతాత్ |
సదా పూర్ణబింబాః కళంకైశ్చ హీనా-
స్తదా త్వన్ముఖానాం బ్రువే స్కంద సామ్యమ్ || ౧౩ ||
స్ఫురన్మందహాసైః సహంసాని చంచ-
త్కటాక్షావలీభృంగసంఘోజ్జ్వలాని |
సుధాస్యందిబింబాధరాణీశసూనో
తవాలోకయే షణ్ముఖాంభోరుహాణి || ౧౪ ||
విశాలేషు కర్ణాంతదీర్ఘేష్వజస్రం
దయాస్యందిషు ద్వాదశస్వీక్షణేషు |
మయీషత్కటాక్షః సకృత్పాతితశ్చే-
ద్భవేత్తే దయాశీల కా నామ హానిః || ౧౫ ||
సుతాంగోద్భవో మేఽసి జీవేతి షడ్ధా
జపన్మంత్రమీశో ముదా జిఘ్రతే యాన్ |
జగద్భారభృద్భ్యో జగన్నాథ తేభ్యః
కిరీటోజ్జ్వలేభ్యో నమో మస్తకేభ్యః || ౧౬ ||
స్ఫురద్రత్నకేయూరహారాభిరామ-
శ్చలత్కుండలశ్రీలసద్గండభాగః |
కటౌ పీతవాసాః కరే చారుశక్తిః
పురస్తాన్మమాస్తాం పురారేస్తనూజః || ౧౭ ||
ఇహాయాహి వత్సేతి హస్తాన్ప్రసార్యా-
హ్వయత్యాదరాచ్ఛంకరే మాతురంకాత్ |
సముత్పత్య తాతం శ్రయంతం కుమారం
హరాశ్లిష్టగాత్రం భజే బాలమూర్తిమ్ || ౧౮ ||
కుమారేశసూనో గుహ స్కంద సేనా-
పతే శక్తిపాణే మయూరాధిరూఢ |
పులిందాత్మజాకాంత భక్తార్తిహారిన్
ప్రభో తారకారే సదా రక్ష మాం త్వమ్ || ౧౯ ||
ప్రశాంతేంద్రియే నష్టసంజ్ఞే విచేష్టే
కఫోద్గారివక్త్రే భయోత్కమ్పిగాత్రే |
ప్రయాణోన్ముఖే మయ్యనాథే తదానీం
ద్రుతం మే దయాలో భవాగ్రే గుహ త్వమ్ || ౨౦ ||
కృతాంతస్య దూతేషు చండేషు కోపా-
ద్దహచ్ఛింద్ధి భింద్ధీతి మాం తర్జయత్సు |
మయూరం సమారుహ్య మా భైరితి త్వం
పురః శక్తిపాణిర్మమాయాహి శీఘ్రమ్ || ౨౧ ||
ప్రణమ్యాసకృత్పాదయోస్తే పతిత్వా
ప్రసాద్య ప్రభో ప్రార్థయేఽనేకవారమ్ |
న వక్తుం క్షమోఽహం తదానీం కృపాబ్ధే
న కార్యాంతకాలే మనాగప్యుపేక్షా || ౨౨ ||
సహస్రాండభోక్తా త్వయా శూరనామా
హతస్తారకః సింహవక్త్రశ్చ దైత్యః |
మమాంతర్హృదిస్థం మనఃక్లేశమేకం
న హంసి ప్రభో కిం కరోమి క్వ యామి || ౨౩ ||
అహం సర్వదా దుఃఖభారావసన్నో
భవాందీనబంధుస్త్వదన్యం న యాచే |
భవద్భక్తిరోధం సదా క్లృప్తబాధం
మమాధిం ద్రుతం నాశయోమాసుత త్వమ్ || ౨౪ ||
అపస్మారకుష్టక్షయార్శః ప్రమేహ-
జ్వరోన్మాదగుల్మాదిరోగా మహాంతః |
పిశాచాశ్చ సర్వే భవత్పత్రభూతిం
విలోక్య క్షణాత్తారకారే ద్రవంతే || ౨౫ ||
దృశి స్కందమూర్తిః శ్రుతౌ స్కందకీర్తి-
ర్ముఖే మే పవిత్రం సదా తచ్చరిత్రమ్ |
కరే తస్య కృత్యం వపుస్తస్య భృత్యం
గుహే సంతు లీనా మమాశేషభావాః || ౨౬ ||
మునీనాముతాహో నృణాం భక్తిభాజా-
మభీష్టప్రదాః సంతి సర్వత్ర దేవాః |
నృణామంత్యజానామపి స్వార్థదానే
గుహాద్దేవమన్యం న జానే న జానే || ౨౭ ||
కలత్రం సుతా బంధువర్గః పశుర్వా
నరో వాథ నారీ గృహే యే మదీయాః |
యజంతో నమంతః స్తువంతో భవంతం
స్మరంతశ్చ తే సంతు సర్వే కుమార || ౨౮ ||
మృగాః పక్షిణో దంశకా యే చ దుష్టా-
స్తథా వ్యాధయో బాధకా యే మదంగే |
భవచ్ఛక్తితీక్ష్ణాగ్రభిన్నాః సుదూరే
వినశ్యంతు తే చూర్ణితక్రౌంచశైల || ౨౯ ||
జనిత్రీ పితా చ స్వపుత్రాపరాధం
సహేతే న కిం దేవసేనాధినాథ |
అహం చాతిబాలో భవాన్ లోకతాతః
క్షమస్వాపరాధం సమస్తం మహేశ || ౩౦ ||
నమః కేకినే శక్తయే చాపి తుభ్యం
నమశ్ఛాగ తుభ్యం నమః కుక్కుటాయ |
నమః సింధవే సింధుదేశాయ తుభ్యం
పునః స్కందమూర్తే నమస్తే నమోఽస్తు || ౩౧ ||
జయానందభూమం జయాపారధామం
జయమోఘకీర్తే జయానందమూర్తే |
జయానందసింధో జయాశేషబంధో
జయ త్వం సదా ముక్తిదానేశసూనో || ౩౨ ||
భుజంగాఖ్యవృత్తేన క్లృప్తం స్తవం యః
పఠేద్భక్తియుక్తో గుహం సంప్రణమ్య |
స పుత్రాన్కలత్రం ధనం దీర్ఘమాయు-
ర్లభేత్స్కందసాయుజ్యమంతే నరః సః || ౩౩ ||
ఇతి శ్రీ సుబ్రహ్మణ్య భుజంగం సంపూర్ణం ||
śrī subrahmaṇya bhujaṅgam
sadā bālarūpāpi vighnādrihantrī
mahādantivaktrā'pi pañcāsyamānyā |
vidhīndrādimr̥gyā gaṇēśābhidhā mē
vidhattāṃ śriyaṃ kā'pi kaḷyāṇamūrtiḥ || 1 ||
na jānāmi śabdaṃ na jānāmi cārthaṃ
na jānāmi padyaṃ na jānāmi gadyam |
cidēkā ṣaḍāsyā hr̥di dyōtatē mē
mukhānniḥsarantē giraścāpi citram || 2 ||
mayūrādhirūḍhaṃ mahāvākyagūḍhaṃ
manōhāridēhaṃ mahaccittagēham |
mahīdēvadēvaṃ mahāvēdabhāvaṃ
mahādēvabālaṃ bhajē lōkapālam || 3 ||
yadā saṃnidhānaṃ gatā mānavā mē
bhavāmbhōdhipāraṃ gatāstē tadāiva |
iti vyañjayansindhutīrē ya āstē
tamīḍē pavitraṃ parāśaktiputram || 4 ||
yathābdhēstaraṅgā layaṃ yānti tuṅgā-
stathāivāpadaḥ saṃnidhāu sēvatāṃ mē |
itīvōrmipaṅktīrnnr̥ṇāṃ darśayantaṃ
sadā bhāvayē hr̥tsarōjē guhaṃ tam || 5 ||
girāu mannivāsē narā yē'dhirūḍhā-
stadā parvatē rājatē tē'dhirūḍhāḥ |
itīva bruvaṅgandhaśāilādhirūḍhaḥ
sa dēvō mudē mē sadā ṣaṇmukhō'stu || 6 ||
mahāmbhōdhitīrē mahāpāpacōrē
munīndrānukūlē sugandhākhyaśāilē |
guhāyāṃ vasantaṃ svabhāsā lasantaṃ
janārtiṃ harantaṃ śrayāmō guhaṃ tam || 7 ||
lasat-svarṇagēhē nr̥ṇāṃ kāmadōhē
sumastōmasañchannamāṇikyamancē |
samudyat-sahasrārkatulyaprakāśaṃ
sadā bhāvayē kārtikēyaṃ surēśam || 8 ||
raṇaddhamsakē mañjulē'tyantaśōṇē
manōhārilāvaṇyapīyūṣapūrṇē |
manaḥṣatpadō mē bhavaklēśataptaḥ
sadā mōdatāṃ skanda tē pādapadmē || 9 ||
suvarṇābha-divyāmbarāir-bhāsamānāṃ
kvaṇat-kiṅkiṇī-mēkhalā-śōbhamānām |
lasad-dhēmapaṭṭēna vidyōtamānāṃ
kaṭiṃ bhāvayē skanda tē dīpyamānām || 10 ||
pulindēśakanyāghanābhōgatuṅga-
stanāliṅganāsaktakāśmīrarāgam |
namasyāmyahaṃ tārakārē tavōraḥ
svabhaktāvanē sarvadā sānurāgam || 11 ||
vidhāu kl̥ptadaṇḍānsvalīlādhr̥tāṇḍā-
nnirastēbhaśuṇḍāndviṣatkāladaṇḍān |
hatēndrāriṣaṇḍānjagat-trāṇaśauṇḍā-
nsadā tē pracaṇḍānśrayē bāhudaṇḍān || 12 ||
sadā śāradāḥ ṣaṇmr̥gāṅkā yadi syuḥ
samudyanta ēva sthitāścētsamantāt |
sadā pūrṇabimbāḥ kaḷaṅkāiśca hīnā-
stadā tvanmukhānāṃ bruvē skanda sāmyam || 13 ||
sphuranmandahāsāiḥ sahamsāni cañca-
tkātākṣāvalībhr̥ṅgasaṅghōjjvalāni |
sudhāsyandibimbādharāṇīśasūnō
tavālōkayē ṣaṇmukhāmbhōruhaṇī || 14 ||
viśālēṣu karṇāntadīrghēṣvajasraṃ
dayāsyandiṣu dvādaśasvīkṣaṇēṣu |
mayīṣatkaṭākṣaḥ sakr̥tpātitāścē-
dbhavēttē dayāśīla kā nāma hāniḥ || 15 ||
sutāṅgōdbhavō mē'si jīvēti ṣaddhā
japanmantramīśō mudā jigratē yān |
jagadbhārabh r̥dbhyō jagannātha tēbhyaḥ
kirīṭōjjvalēbhyō namō mastakēbhyaḥ || 16 ||
sphuradratnakēyūrahārābhirāma-
ścalatkuṇḍalaśrīlasadgaṇḍabhāgaḥ |
kaṭāu pītavāsāḥ karē cāruśaktiḥ
purastānmamāstāṃ purārēstanūjaḥ || 17 ||
ihāyāhi vatsēti hastānprasāryā-
hvayatyādarācchaṅkarē māturankāt |
samutpatya tātaṃ śrayantaṃ kumāraṃ
harāśliṣṭagātraṃ bhajē bālamūrtim || 18 ||
kumārēśasūnō guha skanda sēnā-
patē śaktipāṇē mayūrādhirūḍha |
pulindātmajakānta bhaktārtihārin
prabhō tārakārē sadā rakṣa māṃ tvam || 19 ||
praśāntēndriyē naṣṭasañjñē vicēṣṭē
kaphōdgārivaktrē bhayōtkampigātrē |
prayāṇōnmukhē mayyanāthē tadānīṃ
drutaṃ mē dayālō bhavāgrē guha tvam || 20 ||
kr̥tāntasya dūtēṣu caṇḍēṣu kōpā-
ddhacchindhi bhindhīti māṃ tarjayatsu |
mayūraṃ samāruhya mā bhāiriti tvaṃ
puraḥ śaktipāṇirmamāyāhi śīghram || 21 ||
praṇamyāsak r̥tpādayōstē patitvā
prasādya prabhō prārthayē'nēkavāram |
na vaktuṃ kṣamō'haṃ tadānīṃ kr̥pābdhē
na kāryāntakālē manāgapyupēkṣā || 22 ||
sahasrāṇḍabhōktā tvayā śūranāmā
hatastārakaḥ simhavaktraśca dāityaḥ |
mamāntarhr̥disthaṃ manaḥklēśamēkaṃ
na hamsi prabhō kiṃ karōmi kva yāmi || 23 ||
ahaṃ sarvadā duḥkhabhārāvasannō
bhavāndīnabandhustvadanyaṃ na yācē |
bhavadbhaktirōdhaṃ sadā kl̥ptabādhaṃ
mamādhiṃ drutaṃ nāśayōmāsuta tvam || 24 ||
apasmārakusṭhakṣayārśaḥ pramēha-
jvarōnmādagulmādirōgā mahāntaḥ |
piśācāśca sarvē bhavatpatrabhūtiṃ
vilōkya kṣaṇāttārakārē dravantē || 25 ||
dr̥śi skandamūrtiḥ śrutāu skandakīrti-
rmukhē mē pavitraṃ sadā taccaritram |
karē tasya kr̥tyaṃ vapustasya bh r̥tyaṃ
guhē santu līnā mamāśēṣabhāvāḥ || 26 ||
munīnāmutāhō nr̥ṇāṃ bhaktibhājā-
mabhīṣṭapradāḥ santi sarvatra dēvāḥ |
nr̥ṇāmantyajānāmapi svārthadānē
guhāddēvamanyaṃ na jānē na jānē || 27 ||
kalatraṃ sutā bandhuvarghaḥ paśurvā
narō vātha nārī gr̥hē yē madīyāḥ |
yajantō namantaḥ stuvantō bhavantaṃ
smarantas-ca tē santu sarvē kumāra || 28 ||
mr̥ghāḥ pakṣiṇō daṃśakā yē ca duṣṭā-
stathā vyādhayō bādhakā yē madaṅgē |
bhavacchaktitīkṣṇāgrabhinnāḥ sudūrē
vinaśyantu tē cūrṇitakrāuñcaśāila || 29 ||
janitrī pitā ca svaputrāparādhaṃ
sahētē na kiṃ dēvasēnādhinātha |
ahaṃ cātibālō bhavān lōkatātaḥ
kṣamasvāparādhaṃ samastaṃ mahēśa || 30 ||
namaḥ kēkinē śaktayē cāpi tubhyaṃ
namacchāga tubhyaṃ namaḥ kukkuṭāya |
namaḥ sindhavē sindhudēśāya tubhyaṃ
punaḥ skandamūrtē namastē namō'stu || 31 ||
jayānandabhūmaṃ jayāpāradhāmaṃ
jayāmōghakīrtē jayānandamūrtē |
jayānandasindhō jayāśēṣabandhō
jaya tvaṃ sadā muktidānēśasūnō || 32 ||
bhujaṅghākhyavr̥ttēna kl̥ptaṃ stavaṃ yaḥ
paṭhēdbhaktiyuktō guhaṃ saṃpraṇamya |
sa putrānkalatraṃ dhanaṃ dīrghamāyu-
rlabhētskandasāyujyamantē naraḥ saḥ || 33 ||
iti śrī subrahmaṇya bhujaṅgaṃ sampūrṇam ||