శ్రీ శివ శంకర స్తోత్రం
అతిభీషణకటుభాషణయమకింకిరపటలీ-
-కృతతాడనపరిపీడనమరణాగమసమయే |
ఉమయా సహ మమ చేతసి యమశాసన నివసన్
శివశంకర శివశంకర హర మే హర దురితం || ౧ ||
అసదింద్రియవిషయోదయసుఖసాత్కృతసుకృతేః
పరదూషణపరిమోక్షణ కృతపాతకవికృతేః |
శమనాననభవకానననిరతేర్భవ శరణం
శివశంకర శివశంకర హర మే హర దురితం || ౨ ||
విషయాభిధబడిశాయుధపిశితాయితసుఖతో
మకరాయితగతిసంసృతికృతసాహసవిపదమ్ |
పరమాలయ పరిపాలయ పరితాపితమనిశం
శివశంకర శివశంకర హర మే హర దురితం || ౩ ||
దయితా మమ దుహితా మమ జననీ మమ జనకో
మమ కల్పితమతిసంతతిమరుభూమిషు నిరతమ్ |
గిరిజాసఖ జనితాసుఖవసతిం కురు సుఖినం
శివశంకర శివశంకర హర మే హర దురితం || ౪ ||
జనినాశన మృతిమోచన శివపూజననిరతేః
అభితోఽదృశమిదమీదృశమహమావహ ఇతి హా |
గజకచ్ఛపజనితశ్రమ విమలీకురు సుమతిం
శివశంకర శివశంకర హర మే హర దురితం || ౫ ||
త్వయి తిష్ఠతి సకలస్థితికరుణాత్మని హృదయే
వసుమార్గణకృపణేక్షణమనసా శివవిముఖమ్ |
అకృతాహ్నికమసుపోషకమవతాద్గిరిసుతయా
శివశంకర శివశంకర హర మే హర దురితం || ౬ ||
పితరావితి సుఖదావితి శిశునా కృతహృదయౌ
శివయా హృతభయకే హృది జనితం తవ సుకృతమ్ |
ఇతి మే శివ హృదయం భవ భవతాత్తవ దయయా
శివశంకర శివశంకర హర మే హర దురితం || ౭ ||
శరణాగతభరణాశ్రిత కరుణామృతజలధే
శరణం తవ చరణౌ శివ మమ సంసృతివసతేః |
పరిచిన్మయ జగదామయభిషజే నతిరవతాత్
శివశంకర శివశంకర హర మే హర దురితం || ౮ ||
వివిధాధిభిరతిభీతిభిరకృతాధికసుకృతం
శతకోటిషు నరకాదిషు హతపాతకవివశమ్ |
మృడ మామవ సుకృతీభవ శివయా సహ కృపయా
శివశంకర శివశంకర హర మే హర దురితం || ౯ ||
కలినాశన గరలాశన కమలాసనవినుత
కమలాపతినయనార్చిత కరుణాకృతిచరణ |
కరుణాకర మునిసేవిత భవసాగరహరణ
శివశంకర శివశంకర హర మే హర దురితం || ౧౦ ||
విజితేంద్రియవిబుధార్చిత విమలాంబుజచరణ
భవనాశన భయనాశన భజితాంగితహృదయ |
ఫణిభూషణ మునివేషణ మదనాంతక శరణం
శివశంకర శివశంకర హర మే హర దురితం || ౧౧ ||
త్రిపురాంతక త్రిదశేశ్వర త్రిగుణాత్మక శంభో
వృషవాహన విషదూషణ పతితోద్ధర శరణమ్ |
కనకాసన కనకాంబర కలినాశన శరణం
శివశంకర శివశంకర హర మే హర దురితం || ౧౨ ||
ఇతి శ్రీ శివ శంకర స్తోత్రం ||
Shri Shiva Shankara Stotram
atibhīṣaṇakaṭubhāṣaṇayamakiṅkirapaṭalī-
-kr̥tatāḍanaparipīḍanamaraṇāgamasamayē |
umayā saha mama cētasi yamaśāsana nivasann
śivaśaṅkara śivaśaṅkara hara mē hara duritaṃ || 1 ||
asadiṃdriyaviṣayōdayasukhasātkr̥tasukr̥tēḥ
paradūṣaṇaparimōkṣaṇa kr̥tapātakavikr̥tēḥ |
śamanānanabhavakānananiratērbhava śaraṇaṃ
śivaśaṅkara śivaśaṅkara hara mē hara duritaṃ || 2 ||
viṣayābhidhabaḍiśāyudhapiśitāyitasukhatō
makarāyitagati saṃsr̥tikr̥tasāhasavipadam |
paramālaya paripālaya paritāpitamaniśaṃ
śivaśaṅkara śivaśaṅkara hara mē hara duritaṃ || 3 ||
dayitā mama duhitā mama jananī mama janakō
mama kalpitatamatisantatimarubhūmiṣu niratam |
girijāsakha janitāsukhavasatiṃ kuru sukhinaṃ
śivaśaṅkara śivaśaṅkara hara mē hara duritaṃ || 4 ||
janināśana mr̥tyumōcana śivapūjananiratēḥ
abhitō’dr̥śamidamīdr̥śamahamāvaha iti hā |
gajakacchapajanitaśrama vimalīkuru sumatiṃ
śivaśaṅkara śivaśaṅkara hara mē hara duritaṃ || 5 ||
tvayi tiṣṭhati sakalasthitikaruṇātmani hr̥dayē
vasumārgāṇakr̥paṇēkṣaṇamanasā śivavimukham |
akr̥tāhnikamasupōṣakamavatādgirisutayā
śivaśaṅkara śivaśaṅkara hara mē hara duritaṃ || 6 ||
pitarāviti sukhadāviti śiśunā kr̥tahr̥dayau
śivayā hr̥tabhayakē hr̥di janitaṃ tava sukr̥tam |
iti mē śiva hr̥dayaṃ bhava bhavatāttava dayayā
śivaśaṅkara śivaśaṅkara hara mē hara duritaṃ || 7 ||
śaraṇāgatabharaṇāśrita karuṇāmr̥tajaladhē
śaraṇaṃ tava caraṇau śiva mama saṃsr̥tivasatēḥ |
paricinmaya jagadāmayabhiṣajē natiravatāt
śivaśaṅkara śivaśaṅkara hara mē hara duritaṃ || 8 ||
vividhādhibhiratibhīthibhirakr̥tādhikasukr̥taṃ
śatakōṭiṣu narakādiṣu hatapātakavivaśam |
mr̥ḍa māmava sukr̥tībhavā śivayā saha kr̥payā
śivaśaṅkara śivaśaṅkara hara mē hara duritaṃ || 9 ||
kalināśana garalāśana kamalāsanavinuta
kamalāpatinayanārcita karuṇākr̥ticaraṇa |
karuṇākara munisēvita bhavasāgaraharaṇa
śivaśaṅkara śivaśaṅkara hara mē hara duritaṃ || 10 ||
vijitēndriyavibudhārcita vimalāmbujacaraṇa
bhavanāśana bhayanāśana bhajitāṅgitahr̥daya |
phaṇībhūṣaṇa munivēṣaṇa madanāntaka śaraṇaṃ
śivaśaṅkara śivaśaṅkara hara mē hara duritaṃ || 11 ||
tripurāntaka tridaśēśvara triguṇātmaka śambhō
vṛṣavāhana viṣadūṣaṇa patitōddhara śaraṇam |
kanakāsana kanakāmbara kalināśana śaraṇaṃ
śivaśaṅkara śivaśaṅkara hara mē hara duritaṃ || 12 ||
iti śrī śiva śaṅkara stōtram ||