శ్రీ నటరాజ స్తోత్రం
సదంచిత ముదంచిత నికుంచిత పదం ఝలఝలం-చలిత మంజు కటకం
పతంజలి దృగంజన-మనంజన-మచంచలపదం జనన భంజన కరమ్
కదంబరుచిమంబరవసం పరమమంబుద కదంబ కవిడంబక గళమ్
చిదంబుధి మణిం బుధ హృదంబుజ రవిం పర చిదంబర నటం హృది భజ || ౧ ||
హరం త్రిపుర భంజన-మనంతకృతకంకణ-మఖండదయ-మంతరహితం
విరించిసురసంహతిపురంధర విచింతితపదం తరుణచంద్రమకుటమ్
పరం పద విఖండితయమం భసిత మండితతనుం మదనవంచన పరం
చిరంతనమముం ప్రణవసంచితనిధిం పర చిదంబర నటం హృది భజ || ౨ ||
అవంతమఖిలం జగదభంగ గుణతుంగమమతం ధృతవిధుం సురసరిత్-
తరంగ నికురుంబ ధృతి లంపట జటం శమనదంభసుహరం భవహరమ్
శివం దశదిగంతర విజృంభితకరం కరళసన్మృగశిశుం పశుపతిం
హరం శశిధనంజయపతంగనయనం పర చిదంబర నటం హృది భజ || ౩ ||
అనంతనవరత్నవిలసత్కటకకింకిణిఝలం ఝలఝలం ఝలరవం
ముకుందవిధి హస్తగతమద్దల లయధ్వనిధిమిద్ధిమిత నర్తన పదమ్
శకుంతరథ బర్హిరథ నందిముఖ భృంగిరిటిసంఘనికటం భయహరమ్
సనంద సనక ప్రముఖ వందిత పదం పర చిదంబర నటం హృది భజ || ౪ ||
అనంతమహసం త్రిదశవంద్య చరణం ముని హృదంతర వసంతమమలమ్
కబంధ వియదింద్వవని గంధవహ వహ్నిమఖ బంధురవిమంజు వపుషమ్
అనంతవిభవం త్రిజగదంతర మణిం త్రినయనం త్రిపుర ఖండన పరమ్
సనంద ముని వందిత పదం సకరుణం పర చిదంబర నటం హృది భజ || ౫ ||
అచింత్యమళివృంద రుచి బంధురగళం కురిత కుంద నికురుంబ ధవళమ్
ముకుంద సుర వృంద బల హంతృ కృత వందన లసంతమహికుండల ధరమ్
అకంపమనుకంపిత రతిం సుజన మంగళనిధిం గజహరం పశుపతిమ్
ధనంజయ నుతం ప్రణత రంజనపరం పర చిదంబర నటం హృది భజ || ౬ ||
పరం సురవరం పురహరం పశుపతిం జనిత దంతిముఖ షణ్ముఖమముం
మృడం కనక పింగళ జటం సనక పంకజ రవిం సుమనసం హిమరుచిమ్
అసంఘమనసం జలధి జన్మకరలం కవలయంత మతులం గుణనిధిమ్
సనంద వరదం శమితమిందు వదనం పర చిదంబర నటం హృది భజ || ౭ ||
అజం క్షితిరథం భుజంగపుంగవగుణం కనక శృంగి ధనుషం కరలసత్
కురంగ పృథు టంక పరశుం రుచిర కుంకుమ రుచిం డమరుకం చ దధతం
ముకుంద విశిఖం నమదవంధ్య ఫలదం నిగమ వృంద తురగం నిరుపమం
స చండికమముం ఝటితి సంహృతపురం పర చిదంబర నటం హృది భజ || ౮ ||
అనంగపరిపంథినమజం క్షితి ధురంధరమలం కరుణయంతమఖిలం
జ్వలంతమనలం దధతమంతకరిపుం సతతమింద్ర సురవందితపదమ్
ఉదంచదరవిందకుల బంధుశత బింబరుచి సంహతి సుగంధి వపుషం
పతంజలి నుతం ప్రణవ పంజర శుకం పర చిదంబర నటం హృది భజ || ౯ ||
ఇతి స్తవమముం భుజగపుంగవ కృతం ప్రతిదినం పఠతి యః కృతముఖః
సదః ప్రభుపద ద్వితయదర్శనపదం సులలితం చరణ శృంగ రహితమ్
సరః ప్రభవ సంభవ హరిత్పతి హరిప్రముఖ దివ్యనుత శంకరపదం
స గచ్ఛతి పరం న తు జనుర్జలనిధిం పరమదుఃఖజనకం దురితదమ్ ||
ఇతి శ్రీ పతంజలి ముని ప్రణీతం చరణ శృంగ రహిత నటరాజ స్తోత్రం సంపూర్ణం ||
Shri Nataraja Stotram
sadañcita mudañcita nikuñcita padaṃ jhalajhalaṃ-calita mañju kaṭakaṃ
patañjali dr̥gañjana-manañjana-macañcalapadaṃ janana bhañjana karam
kadambaruci-mambaravasaṃ paramamambuda kadamba kaviḍambaka gaḷam
cidaṃbudhi maṇiṃ budha hr̥dambuja raviṃ para cidambara naṭaṃ hr̥di bhaja || 1 ||
haraṃ tripura bhañjana-manantakr̥takaṅkaṇa-makhaṇḍadaya-mantarahitaṃ
viriñcisurasaṃhatipuraṃdhara viciñtitapadaṃ taruṇacandramakuṭam
paraṃ pada vikhaṇḍitayamaṃ bhasita maṇḍitatnuṃ madanavañcana paraṃ
cirantanamamuṃ praṇavasañcitanidhiṃ para cidambara naṭaṃ hr̥di bhaja || 2 ||
avantamakhilaṃ jagadabhaṅga guṇatuṅgamamataṃ dhr̥tavidhuṃ surasarit-
taraṅga nikurumba dhr̥ti lampata jaṭaṃ śamanadaṃbhasuharaṃ bhavaharam
śivaṃ daśadigantara vijr̥mbhitakaraṃ karaḷasanmr̥gaśiśuṃ paśupatiṃ
haraṃ śaśidhanañjayapataṅganayanaṃ para cidambara naṭaṃ hr̥di bhaja || 3 ||
anantanavaratnavilasatkaṭakakiṅkiṇijhalaṃ jhalajhalaṃ jhalaravaṃ
mukundavidhi hastagatamaddala layadhvanidhimiddhimita nartana padam
śakuntaratha barhiratha nandimukha bhṛṅgiriṭisaṅghanikaṭaṃ bhayaharam
sananda sanaka pramukha vandita padaṃ para cidambara naṭaṃ hr̥di bhaja || 4 ||
anantamahasaṃ tridaśavandya caraṇaṃ muni hr̥dantara vasantamamalam
kabandha viyadindvavani gandhavaha vahnimakha bandhuravimañju vapuṣam
anantavibhavaṃ trijagadantara maṇiṃ trinayanaṃ tripura khaṇḍana param
sananda muni vandita padaṃ sakaruṇaṃ para cidambara naṭaṃ hr̥di bhaja || 5 ||
acintyamalivr̥nda ruci bandhuragaḷaṃ kurita kunda nikuromba dhavaḷam
mukunda sura vr̥nda bala hantr̥ kr̥ta vandana lasantamahikuṇḍala dharam
akampamanukampita ratiṃ sujana maṅgaḷanidhiṃ gajaharaṃ paśupatim
dhanañjaya nutaṃ praṇata rañjanaparaṃ para cidambara naṭaṃ hr̥di bhaja || 6 ||
paraṃ suravaraṃ puraharaṃ paśupatiṃ janita dantimukha ṣaṇmukhamamuṃ
mr̥ḍaṃ kanaka piṅgaḷa jaṭaṃ sanaka paṅkaja raviṃ sumanasaṃ himarucim
asaṅghamanasaṃ jaladhi janmakaralaṃ kavalayanta matulaṃ guṇanidhim
sananda varadaṃ śamitamiṃdu vadanaṃ para cidambara naṭaṃ hr̥di bhaja || 7 ||
ajaṃ kṣitirathaṃ bhujaṅgapuṅgavaguṇaṃ kanaka śr̥ṅgi dhanuṣaṃ karalasat
kuraṅga pr̥thu ṭaṅka paraśuṃ rucira kuṅkuma ruciṃ ḍamarukaṃ ca dadhatam
mukunda viśikhaṃ namadavandhya phaladaṃ nigama vr̥nda turagaṃ nirupamam
sa caṇḍikamamuṃ jhaṭiti saṃhr̥tapuraṃ para cidambara naṭaṃ hr̥di bhaja || 8 ||
anaṅgaparipanthinamajaṃ kṣiti dhurandharāmalaṃ karuṇayantamakhilaṃ
jvalantamanalaṃ dadhatamantakaripuṃ satatamiṃdra suravanditapadam
udañcadaraviṃdakula bandhuśata biṃbaruci saṃhati sugandhi vapuṣaṃ
patañjali nutaṃ praṇava pañjara śukaṃ para cidambara naṭaṃ hr̥di bhaja || 9 ||
iti stavamamuṃ bhujaṅgapuṅgava kr̥taṃ pratidinaṃ paṭhati yaḥ kr̥tamukhaḥ
sadaḥ prabhupada dvitayadarśanapadaṃ sulalitaṃ caraṇa śr̥ṅga rahitam
saraḥ prabhava saṃbhava haritpati haripramukha divyanuta śaṅkarapadaṃ
sa gacchati paraṃ na tu janurjalanidhiṃ paramaduḥkhajanakaṃ duritadam ||
iti śrī patañjali muni praṇītaṃ caraṇa śr̥ṅga rahita naṭarāja stōtraṃ saṃpūrṇam ||